Ads by Google Ads by Google

Tala o Fa’amasinoga

TUUAIA FAAAOGA O TUPE AUNOA MA SE FAATANAGA

Ua toe tolopo i le vaiaso fou le ulua’i iloiloga o le mataupu faasaga ia Marie Lorraine Reid, lea o loo tuuaia e le malo i lona faaaogaina lea o ni tupe e aunoa ma se faatanaga.

I faamaumauga a le faamasinoga o lo o taua ai e faapea, o se tupe mai totonu o le teugatupe a le American Samoa Sailing Association (ASSS) lea foi e avea ai Reid ma se tasi o saini i le tusi tupe, o loo tuuaia na tala e le ua molia ma faaaoga e aunoa ma se faatanaga aloaia.

Fai mai faamaumauga a le faamasinoga, e lua saini e manaomia ina ia mafai ai ona tala ese mai se tupe mai totonu o le teugatupe a le ASSS,mai lana teugatupe i le Faletupe o Hawaii.

Fai mai le malo, e 6 siaki na saini e Reid ma ia talaina ai i le faletupe o Hawaii, i le aofaiga e $1,130 ma ia faaaoga mo ia lava. O siaki uma foi ia, e na o le saini a Reid o loo i ai peitai e lua saini e manaoina ina ia mafai ai ona tala se siaki.

Na tuuina atu e Reid sana faamatalaga tusitusiga i leoleo e uiga i lenei mataupu ma ia taua ai e faapea, i le va o Aokuso ma Novema 2010, sa ia sainia ai siaki mai le teugatupe a le ASSS ina ia mafai ai ona aveese mai tupe mai ia James Mcguire. Sa ia faamaonia foi i leoleo o le tupe sa ia faaaogaina mo ia lava.

Sa ia faamaonia foi i leoleo tauala atu i lana faamatalaga tusitusia le tasi o le saini sa ia faaaogaina e tala mai ai siaki uma nei e 6, ma ia faaaogaina ai tupe a le ASSS mo ia lava.

E $5,000 le tupe ua faatulaga e tatala ai Reid i tua mai le toese, i lalo o poloaiga a le faamasinoga, ao faatalitali ai taualumaga o lana faamasinoga.

JULIANO TAVALE

O le alii lea o loo tuuaia i le maliu o lona atalii e tasi le tausaga le matua i le 2010, ua faatulaga e le faamasinoga lana ulua’i iloiloga e faia lea i le aso 16 Iulai, ina ua ia teena moliaga mamafa e lua faasaga ia te ia i le taeao ananafi i luma o le faamasinoga maualuga.

O Juliano Tavale na faatulaga lana uluai iloiloga e faia lea  i luma o le faamasinoga faaitumalo i le aso Gafua na te’a nei, peitai e lei faataunuuina lea iloiloga ina ua manatu o ia e faaagafua, ae tuu sao atu loa lana mataupu i luma o le faamasinoga maualuga e faaauau ai.

O loo tuuaia e le malo Tavale i le moliaga mamafa o le fasioti tagata pa’ivalea, atoa ai ma le maliu o se tagata ia te ia e mafua mai i se taavale sa ia aveina.

O ia moliaga na afua mai i se faalavelave na tulai mai i le aso 25 Iulai 2010, ao malaga  Tavale ma lona atalii i le la taavale, sa ia faailoa ai ai leoleo le tupu o se faalavelave ao ia taumafai e faanofo lona atalii i luga o le nofoa ina ua taumafai e totolo atu i luga o lona tauau, ma  faafuasei ai  ona tu lona vae i le taofi o le taavale, ma i’u ina tifa ai le taavale ma lelea atu ai lona atalii ua tau lona ulu i le pito i luma o le taavale.

Sa faapea foi ona toe tau le ulu o lona atalii i le faitotoa ina ua tulai mai lea faalavelave. Na faamaonia e Tavale i leoleo na te lei faaaogaina se nofoa mo tamaiti laiti e faanofo ai lona atalii ao la o i le taavale, ae o manu’a foi sa vaaia i lona tino, na mafua mai ina ua ia sasaina o ia i le isi vaiaso ae le’i tupu le faalavelave lea.

Fai mai faamaumauga a le faamasinoga, o le aso lea na tulai mai ai le faalavelave, na alu ai le ua molia i le fale o le tina o lona atalii ma faanoi mai o ia, pe mafai ona la o la te eva i lona aiga i Leone, peitai i le afiafi o le aso lava lea, na toe telefoni ai le ua molia i le tina o lona atalii e faailoa i ai, e i ai le faalavelave ua tupu ia te ia.

O loo tumau pea tuutuuga a le faamasinoga o loo tatala ai Tavale i tua, ina ua ia totogiina le $15,000 na faatulaga e le faamasinoga e tatala ai o ia, a’o faagasolo ai taualumaga o lona faamasinoga.

(English version of this story is in today’s Court Report)

LOKA LE TOATOLU AE TAOFIA I LE FALEMAI LE TOATASI

O tauaiga ma’a i le va o tupulaga i le vaveao o le  aso Toona’i na te’a nei i Pago Pago, na taofia ai e leoleo ni alii se toatolu ma tuuaia i le faatupu vevesi i nofoaga faitele, ae o le isi toatasi na faanatinati atu i le falema’i ona o manu’a tuga na aafia ai o ia.

Na taua e le loia a le malo i le Samoa News e faapea, o se vevesi na tulai mai i le va o ni tupulaga na faai’u ai i se tauaiga ma’a atigifagu faapea ai ma le pa’ilima o nisi o i latou nei.

E le o i ai ni moliaga mamafa ua faila i le taimi nei faasaga ia i latou na taofia mai i le faaiuga o le vaiaso, peitai o loo i ai le fuafuaga a le malo e tatau ona oo atu i le aso Tofi nei ua maea suesuega a leoleo o  loo faaauau ma manino ai loa moliaga faaopoopo e ono faila faasaga ia i latou o loo tuuaia.

Manu’a na aafia ai le alii sa lavea e le o ni manu’a e ono oo ai se tulaga faaletonu i lona soifua, e pei ona faamaonia mai e le itu a le malo,