TETE’E TOEAINA 62 I ONA MOLIAGA

O le aso 14 o Me lea ua faatulaga e faia ai le ulua’i iloiloga o le mataupu faasaga i se tama e 62 tausaga le matua, ina ua ia teena tuuaiga a le malo faasaga ia te ia, ona o le faalavelave lea fai mai sa la faiaiga ai ma se teineititi e 16 tausaga le matua, ma i’u ina ma’itaga ai lea tama’ita’i.

O lo’o tu’uaia faatasi e le malo lenei tama matua ma se alii talavou e 22 tausaga le matua, e faapea sa o la faiaiga uma i le tama’ita’i na aafia ma i’u ina ma’itaga ai o ia.

O tu’uaiga o loo faia faasaga i lenei alii e aofia ai le faiaiga ma se teineititi e laititi i lalo o le tulafono, tagofia o itutinosa o se teineititi, faapea ai ma lona faia o ni gaioiga e ono lamatia ai le saogalemu o se fanau e laititi i lalo o le tulafono.

I fa’amaumauga a le fa’amasinoga o lo’o taua ai e faapea, o le masina o Tesema 2011 na tula’i mai ai lenei fa’alavelave e pei ona tuuaia ai le ua molia, o ia fo’i lea o le sponsor a le aiga o le teineititi o lo’o aafia, ae o le matai fo’i lea o le latou aiga.

Ina ua fa’ailoa e le teineititi na aafia le mea ua tupu i lona tina, sa alu lona tina ma talanoa i le to’alua a le ua molia e tusa ai o le mea ua tupu, ma fa’atoese ai le to’alua a le ua molia i le tina o le teineititi na a’afia ona o le mea ua tupu.

Na talanoa fo’i le tama o le teineititi ua a’afia i le ua molia e uiga i lenei mataupu, lea fo’i na fa’atoese ai le ua molia ma ia fa’ailoa i ai e fa’apea, o le malosi tele le tiapolo ua mafua ai ona tula’i mai lenei faafitauli.

PIO FAGAAUTAU

O le aso 22 o Iuni lea ua faamoemoe e lau ai le faasalaga o se alii e 19 tausaga o loo taofia i le toese i Tafuna, ina ua ta’usalaina o ia i le moliaga lea ua toe suia e le malo, o lona taumafai lea e talepe se fale o se isi aiga ina ia faataunuu ai le solitulafono o le gaoi.

Na ta’utino le ali’i o Pio Fagaautau i luma o le faamasinoga maualuga e fa’apea, i se taimi o le aso 7 Tesema 2011, sa ia taumafai ai e ulufale fa’amalosi i totonu o le fale o Ivan Talamoni ma le fa’anaunauga, na te gaoia mai ai ni mea taua mai totonu.

I le taliaina ai e le faamasinoga o le tali ioe a le ua molia, ua na solofua ai loa le isi moliaga mamafa na totoe ai o le gaoi.

Ua malilie loia o le a tuuina atu ni a laua faafinauga mo se faasalaga mama mo lenei alii, peitai ua malamalama le ua molia, tusa lava pe fautua atu loia i le faamasinoga mo se faasalaga mama mo ia, e pule le faamasinoga pe talia pe teena ia faafinauga.

Ua malamalama foi le ua molia, e le mafai ona toe suia lana tali ioe ua tuuina atu i le faamasinoga, pe afai e tuuina mai lana faasalaga e le tusa ai ma lona mana’o.

O loo taofia pea i le toese i Tafuna le ua molia e faatali ai le aso lea ua faatulaga e lau ai lona faasalaga.

O le tamaitai loia ia Cecilia Reyna o loo tulai mo le malo i lenei mataupu, ae o le tamaitai loia fautua ia Leslie Cardine o loo tula’i mo Fagaautau.

O le alii faamasino sili ia Michael Kruse na faatautaia lenei mataupu, i le lagolagosua a le afioga i le alii faamasino lagolago o Fa’amausili Pomele.

VILI ONEY

O le aso Tofi nei lea ua faamoemoe ai loia a itu e lua, e tatau ona fofogaina ai i luma o le faamasinoga le maliliega lea ua maea ona latou sainia, ma faamuta ai loa le mataupu e pei na tuuaia ai le alii o Vili Oney.

I le toe valaauina ai o le mataupu a Oney i le vaiaso na te’a nei, na faailoa ai e le loia fautua a le ua molia o Sharron Rancourt e faapea, ua maea ona i ai se maliliega ua latou faia ma le malo, peitai e manaomia se taimi e toe iloilo ma talanoaina ai nisi o vaega laititi o loo i totonu o le maliliega, a’o le’i faila ma tu’uina atu i luma o le faamasinoga.

Na talia a le faamasinoga le talosaga a le itu tete’e, lea fo’i e le’i faatuiese i ai le loia a le malo o Cabel Poag, ma toe tolopo ai loa le fofogaina o lenei mataupu i le taeao o le aso Tofi o le vaiaso nei.

O Oney o loo tu’uaia e le malo i lona umia faasolitulafono o vaega o le laau faasaina o le mariuana, ina ua osofaia e leoleo lona fale i lalo o se poloaiga mai le faamasinoga, ma maua i ai e leoleo ni vaega o mariuana i totonu o lona potu.

O loo tatalaina pea i tua le ua molia i lalo o poloaiga a le faamasinoga e faatali ai le isi ana iloiloga lea ua faatulaga.

O le afioga i le alii faamasino sili lagolago ia Lyle L. Richmond o loo faatautaia lenei mataupu, i le lagolagosua a le afioga i le alii faamasino lagolago ia Mamea Sala Jr.