TOE VALAAU MATAUPU FAASAGA I ALII TOATOLU TUUAIA FASIOTI TAGATA

O le taeao nei lea ua faatulaga e toe fofogaina ai mataupu faasaga i alii e toatolu ia o lo o tuuaia i le maliu o se isi alii, i le tausaga na tea nei.

O i latou e toatolu o lo o tuuaia i le fasioti tagata i le tulaga lua e aofia ai Misa Migo, Raponi Siaulaiga ma Neemia Poamo  O lo o taofia uma i latou, i le toese i Tafuna ina ua le mafai ona o latou totogia le vaega tupe sa faatulaga e le faamasinoga e tatala ai i latou i tua.

E tusa ai ma faamaumauga a le faamasinoga  o lo o taua ai e faapea, na muamua faaoolima Siaulaiga, Misa ma Poama i le alii o Sio Chico Faumui o Iliili i le po na tulai mai ai le faalavelave, e ala i le faaaogaina o latou lima e fasi ai o ia, ma taatia ai le ua molia i tafatafa o le auala i Malaeimi ua matapogia.

Mulimuli ane i se taimi o le po lava lea, na toe agai atu ai Siaulaiga ma Poamo ma ni ma’a ma toe faaoo ai manu’a ia Faumui, mulimuli ane ai loa alu atu Misa ma se fagupia ma ta ai ona foliga.

O alii laiti  e toalua na ulua’i amataina le vevesi sa molia i moliaga mamafa ina ua faatoa tulai mai lenei mataupu i le tausaga na tea nei, ma faanofovaavaaia ai i lalo o poloaiga a le faamasinoga.

LOMITUSI FILIAGA

E le’i talia e le alii faamasino o le Fa’amasinoga Fa’aitumalo le talosaga a le malo, ina ia solofua le moliaga mamafa na o latou uluai tuuaia ai le alii o Lomitusi Filiaga, ma le faamoemoe o le a latou toe failaina isi moliaga faasaga ia te ia, ae o moliaga mama uma.

O Filiaga o loo tuuaia e le malo i lona faaaoga faasolitulafono lea o se fana, lea sa ia ta’i i foliga o se tasi o ona au aiga a’o ‘ona o ia i le masina na tea nei, peitai ina ua fesiligia e leoleo o ia e tusa ai o lenei mataupu, sa ia faailoa i ai e le o ni mea moni sa ia faia, o ana mea pepelo.

I faamaumauga a le faamasinoga o loo taua ai e faapea, o le taimi lava na maea ai ona faia e le ua molia le gaioiga lea i le alii na aafia, na agai sao atu ai loa le alii lea ma faila lana tagi i le ofisa o leoleo.

O lo o tatala i tua Filiaga i lalo o poloaiga a le faamasinoga ao fa’aauau ai taualumaga o lana mataupu i luma o le faamasinoga faaitumalo.

FAATULAGA FAAMASINOGA AUTU O SE ALII PISINISI

O le aso 6 Iuni lea ua faatulaga e faia ai le faamasinoga autu o le alii faipisinisi lea o loo tuuaia i lona faia lea o ni uiga mataga i se teineititi e laititi i lalo o le tulafono, faatasi ai ma se alii sa faigaluega ia te ia.

O le alii o Mike Kim ma Motau Samani ia o loo tatala i tua i lalo o tuutuuga mai le faamasinoga, ua faamoemoe e tutulai i luma o le alii faamasino sili lagolago ia Lyle L. Richmond mo le la faamasinoga autu i le masina o Iuni.

O Kim ma Samani o loo tuuaia faatasi ma le alii leoleo o Apisai Atoe lea o loo tuuaia e le malo i lona faalavelave lea i galuega a le malo, e aofia ai lona fautuaina o le tama o le teineititi na aafia e toe ave i tua le mataupu mai le ofisa o leoleo.

I faamaumauga a le faamasinoga o loo taua ai e faapea, o le aso 29 Iuni 2010 na tulai mai ai le faalavelave lenei i le Tumu’s Apartment i Tafuna, ina ua fai Samani i le teineititi na aafia, e maua le galuega mo ia i le Tumu’s apartment, peitai ina ua taunuu atu i ai le teineititi, e leai se galuega ae sa faia i ai e Kim uiga mataga ia te ia, e pei ona tuuaia ai i laua nei e le malo.

Na taua e le itu a le malo e faapea, afai ae maea le faamasinoga autu a Kim ma Samani, ona sosoo atu ai loa lea ma le faamasinoga autu a le alii leoleo o Atoe.

O le tamaitai loia ia Mitzie Folau o loo tulai mo le malo i le mataupu lenei, peitai o le alii loia ia Fiti Sunia o loo tulai mo Kim, o Sharron Rancourt  o loo tulai mo Atoe, ae o le tamaitai loia fautua ia Rith Risch-Fuatagavi o loo tulai mo Samani.