Na te’ena e le ali’i fusu mai Samoa lea o lo o tu’uaia i lona faiaiga ma se teineititi e 16 tausaga le matua tu’uaiga a le malo fa’asaga ia te ia ina ua tula’i i luma o le Fa’amasinoga Maualuga i le taeao ananafi.Ma ua fa’atulaga ai loa le ulua’i iloiloga o Aokuso Fa’amanu, e 20 tausaga, mo le aso 19 o Tesema.O le tama’ita’i loia o Ruth Risch-Fuatagavi na tula’i mo Fa’amanu i le taeao ananafi.O lo o taofia pea le ua molia i le toese i Tafuna ina ua le mafai ona ia totogia le $100,000 na fa’atulaga e le fa’amasinoga e tatala ai o ia i tua.Na fa’aalia e le loia a le malo, o Mitzie Folau, o lo o faia feutanaiga a le Ofisa o le Loia Sili ma le Ofisa o le Konesula a Samoa i Fagatogo, mo se auala e fa’amanino ai lenei mataupu.DAVID MAEAO le aso 21 o Novema lea ua fa’amoemoe le loia a le ali’i o David Maea, e tatau ona o’o atu i ai ua mae’a ona sainia se maliliega i le va o Maea ma le malo, peita’i sa fa’ailoa i ai e le fa’amasino sili ia Michael Kruse, afai e toe vala’auina le mataupu lea i le vaiaso fou ae tumau pea le leai o se maliliega a itu e lua, o le a fa’atulaga loa le fa’amasinoga autu o lenei mataupu.O Maea na to’afa i ai pagota o lo o tu’uaia e le malo i lo latou sosola mai i le toese i le masina o Ianuari 2010, ma latou fasi fa’amo’amo’a se leoleopo o le faletupe o le ANZ Amerika Samoa i Tafuna.O le isi to’alua o le to’afa lea ua mae’a ona la tali ioe i moliaga o le sosola ese mai i le toese, o i laua ia e aofia ai Sefo Lemalu ma Gasona Mafiti. O le isi to’atasi o lo o tumau pea lona te’ena o tu’uaiga a le malo o le ali’i o Pati Lepou, lea ua fa’atulaga lana fa’amasinoga autu e faia i le masina fou.O lo o taofia pea Maea i le toese, e tuli lona fa’asalaga ina ua ta’usala o ia e le fa’amasinoga i le moliaga o le talepe fale i le tulaga muamua, e fa’atali ai se fa’aiuga o lana mataupu fou e pei ona tula’i ai i luma o le fa’amasinoga.TU’UAIA SE ALII I LONA TAUMAFAI E FA’AMATA’U LONA TO’ALUAO le ali’i lea na loka mai e leoleo i le fa’aiuga o le vaiaso mai Tafuna ina ua ia fa’alala se agaese i lona to’alua ma ia folafola sasa ai o ia, ua fa’atonu e le fa’amasinoga e aua ne’i toe alu i lo latou aiga i Tafuna, pe toe taumafai fo’i e fa’afeso’ota’i lona to’alua ma le la fanau, ae ia saili se isi nofoaga e nofo ai i le taimi nei, se’i tau fa’ato’a filemu le vevesi na tula’i mai ona toe mafai lea ona toe tu’u fa’atasi lo la aiga.O lenei fa’alavelave na tula’i mai i le po o le Aso Tofi na te’a nei ina ua ‘ona atu le ua molia i le fale ma ia fasi lona to’alua, e ala i lona ta tu’i ma ta kiki. Ina ua folafola atu i ai e le fafine lona fa’afeso’ota’iina o leoleo, sa tago le ua molia i le agaese ma fa’alala i le fafine ma fai i ai, na te viliina loa leoleo ona ia fa’aaogaina loa lea o le agaese e fa’ao’o ai nisi manu’a tuga ia te ia.O le Aso Tofi o le vaiaso nei lea ua fa’amoemoe le malo e tatau ona o’o atu i ai, ua manino moliaga fa’aopoopo e tatau ona faila fa’asaga i lenei ali’i, ae mo le taimi nei, o lo’o tu’uaia o ia i le moliaga mama o le save’uina lea o le filemu i totonu o lona aiga.