Ina ua le mafai ona fa’ato’ese le ali’i Peresetene o Amerika i le malo o Pakisitana e afua mai i le osofa’iga a le Nato lea na fasiotia ai le to’a 24 o fitafita a Pakisitana, ua fa’ataunu’u loa lava ma le fa’atonuga sa loma, ina ia tu’ua uma e fitafita ma auupega a Amerika o lo’o i le latou nofoaga fa’amautu i Shamsi Pakisitana, ona ua le toe mana’omia.

O le fa’ataunu’uina o lea fa’atonuga, ua iloga mai ai, ua amata lava ona fa’aititia feutaga’iga i le va o malo e lua, Amerika ma Pakisitana. O se fa’alogo atu i le tele o tala fa’asalalauina mai e le nusipepa a le Politico i Pakisitana, e i ai se fa’alagona fa’anoanoa ma e foliga mai ua tau popole o i ai, aua ua lagona le o’otia e i latou ona o le maliliu uma o lea to’a 24 o fitafita, ae o lo’o mana’omia pea ona feso’ota’i lelei malo e lua i le taimi nei.

O lenei fo’i mea ua tula’i mai, ua le toe fa’aaogaina ai e Amerika lea nofoaga fa’apitoa o le vaega au i Shamsi, ua tula’i mai o se fa’ai’uga e le toe suia lava e Amerika, ma o le a se’e ese atu fo’i lea vaega tupe tele sa maua mai le totogia e Amerika o latou nofoaga nei. O lea nofoaga sa fa’aaogaina e le Air Force ina ia fa’aoso atu ai latou va’alele fa’atonutonu, ae leai se pailate o ‘avea.

I se fa’amatalaga mai, e ui lava ina ua va’aia le tulaga fa’anoanoa o Pakisitana i le tulaga ua tula’i ese Amerika ma se tasi o ona nofoaga sa fa’atumua i o latou laufanua, ae o lea nofoaga, sa na’o na fa’aaogaina mo le toe fa’aleleia o va’alele fa’atonutonu nei. Afai lava e lelei va’alele nei e le tau o ane fua i lea nofoaga i Shamsi, ae fa’aaoga lava le isi nofoaga. Peita’i, e tauau lava ua na’o na fa’aaogaina lea nofoaga mo le toe fa’aleleia o nei va’alele fa’atonutonu ma ua le mana’omia i le taimi nei e Amerika.

O le isi nofoaga o lo’o fa’aoso atu ai pea sailiga ma le osofa’iga a le Fuava’alele fa’atonutonu i so’o se vaipanoa lava ua mana’omia ona osofa’iga i Iran, Pakisitana ma Afakanisitana ae maise ai o nofoaga o lo’o nofoia e le vaega a Talipana.

Na fa’asalalauina lava fo’i e le CNN muamua, e le o mana’omia tele lava lea nofoaga i Shamsi, aua e mafai ona fa’aoso atu osofa’iga a va’alele o le fuava’alele fa’atonutonu mai nofoaga i totonu o Afakanisitana. Ae ona o le mana’oga lava sa i ai muamua, ia fa’ateleina nofoaga o Amerika ma ana vaega au fa’apa’aga a le Nato, lea sa mafua ai ona fa’atuina lea nofoaga ua tu’ua nei.

Ua fa’ailoa fo’i e le “Dawn” le tasi o nusipepa a le Malo o Pakisitana, “O le nofoaga lea i Shamsi, e pei ua na’o se isi nofoaga fa’apipi’i a Amerika, ae leai sona mana’omia tele o i ai, ma o lea lava nofoaga sa iloga mai na tele ina faia atu ai osofa’iga, ma ua matele ina maliliu ai nisi o tagata sivili a Pakisitana.

VALAAU OBAMA - TAITAI PAKISITANA E UIGA OSOFAIGA A LE NATO

Mai Uosigitone, sa fa’ailoa mai ai e le Associates Press, sa matua vala’au lava le afioga le Peresetene o Amerika, Obama i le ta’ita’i o le Malo o Pakisitana e tusa ai o le osofa’iga a le NATO lea ua tula’i mai ua tauau e tu’ua’ia ai Amerika. O lava osofa’iga, ua fa’ailoa mai sa maliliu ai le to’a 24 o fitafita tau a le Malo o Pakisitana, ma ua lagona ai fo’i le le fiafia o lea malo ma ona tagatanu’u ia Amerika ma le vasega o malo fa’apa’aga a Amerika.

Peita’i, ua fa’ailoa nei e Obama i le ta’ita’i o Pakisitana, e o’o lava ia Amerika, ua manana’o fo’i i latou e faia se sailiga i lea osofa’iga ma ia talanoaina fa’avaomalo lea mataupu, aua e le o i ai se sao o Amerika i lea osofa’iga.

O le osofa’iga lea sa tupu i le tuaoi ua avea lea ma se tasi fo’i o fa’afitauli e toe afaina ai le va o Amerika ma Pakisitana, ae o lea lava e naunau Amerika ina ia fa’amae’a lelei loa le vevesi lea e tupu mai i totonu o Afakanisitana.

Ua fa’ailoa mai e le sui fa’asalalau o le Fale Pa’epa’e, o lo’o ua toe mausali nei feso’ota’iga i le va o le Malo o Pakisitana ma Amerika e pei ona toe feutaga’i ai nei i la’ua ma le ali’i Peresetene Asif Ali Zardari, ma ua toe amatalia nei feutaga’iga lelei i le va o ta’ita’i o nei malo.Ua malilie fa’atasi i la’ua e toe feso’ota’i lelei, e toe afua ai se taeao fou i mataupu uma, ma ia muamua lava tu’usa’ole vala’au a le tasi i le tasi i taimi fa’apenei i le lumana’i.

Na vala’au ai Obama ia Zardari i le taeao o le aso Sa.