Ads by Google Ads by Google

Tala moni ae Kailo

Ua fa’ailoa mai e le Matagaluega o Pagota & Fa’asalaga {Dpeartment of Corrections} a le malo o Guam le su’esu’ega tele ua faia nei i le mafuaga o le maliu o se tasi o pagota Bernard Jennings. Ua fa’ailoa mai, e maua atu Bernard ua tautau mai lona tino i totonu o lona sela i le taeao o le aso Lua na te’a nei. Ua fa’ailoa mai e le fa’atonu o lea matagaluega, Jose San Agustin, ua fa’ate’ia tele o ia i lea mea ua tupu mai, ma ia asia lea sui, aua o se tagata o lo’o tautua i le Navy, ma i la’ua talanoaga sa faia ma ia, e iloga ai le poto tele o ia, ma e manino fo’i ia te ia le tulafono.

Ua fa’ailoa mai e le fa’atonu, o lo ua faia le su’esu’ega, ae o lo ua ia taumafai atili e fa’ateleina polokalama e fa’atautaia i totonu o le to’ese e mafai ona fiafia i ai ituaiga o tagata fa’apei o Bernard. E le faigofie lona tagata ona fa’afiafia i se mea na te faia e fa’aaoga i ai lona tomai a’o fa’afalepuipuia o ia. E ui ina taumafai i latou uma o i ai i le matagaluega, ae afai o polokalama o i ai e le mafai ona fa’atino e lea ituaiga o pagota, ona leai lea o se latou mea e mafai. Sa taumafai fo’i le matagaluega ina ia fa’asaoina mai le soifua o lea pagota e ala i le va’ai toto’a o mea e mafai ai e ia ona faia e pei ona ia fa’ataunu’uina nei, o le maliu lea ua pule i lona ola.

E le’i fa’ailoa mai le afuaga o le nofosala o lea tama i le to’ese i Guam ae peita’i ua fa’ailoa mai, atonu e mae’a lelei le sailiga a le matagaluega i le afuaga o lona faia o lea mea ia te ia, pe na fa’ao’o fo’i e se tasi ia te ia lea tulaga.

 Fa’amaonia mai ‘AAFB’ Nofoaga Eafosi na Esikegi Va’alele:

Mai Guam fo’i ua fa’amaonia fo’i e le Andersen Air Force Base, ua fa’atautaia nei se su’esu’ega mae’ae’a a le AAFB e tusa ai o le va’alele na pa’u i se vaipanoa e i tua atu o le ogasami o le latou malo. Ua fa’ailoa mai o lo’o ua aoina pea fa’amaumauga  e tusa o lea fa’alavelave, aua o lea e fa’atautaia ni a’oa’oga fa’apitoa i le Nofoaga o le Eafosi i Guam.

I lea nofoaga e fa’atautaia ai lava a’oa’oga fa’apea, ma e aufa’atasi mai i ai Eafosi a Ausetalia, Eafosi a Amerika ma le Eafosi a Iapani i lea nofoaga mo a latou fa’ata’ita’iga ma a’oa’oga fa’apitoa o a latou ave va’alele po’o pailate fou. O lea fo’i le feso’ota’iga e mafai ona autasia uma ai nei malo e tolu, i a latou feso’ota’iga fa’apa’aga.

E i ai mea ua le mafai ona fa’ailoa mai e le AAFB, ua le mafai ona latou fa’ailoa maia i le taimi nei po’o se va’alele a fea le malo lea e pa’u, pe o se va’alele fo’i o lo’o fa’aaogaina lea mo a’oa’oga fa’apitoa a sui o malo e tolu lea e tu’ufa’atasia a latou a’oa’oga fa’apa’aga i le ea e pei ona faia pea i Guam, ae maise ai, ua le mafai fo’i ona fa’ailoa mai po’o i ai se ua amia ai le soifua i nei fa’aa’oa’oga, pe ua na ona fa’amanu’alia ae le o maliu se tasi na fa’afoea lea va’alele.

O le a’oa’oga fa’apitoa a le Eafosi i le va o malo e tolu lea e faia e 23 va’alele o lo’o fa’aaogaina ai mai le Kadena Air Base ma e o’o lava nei a’oa’oga i le aso Gafua a sau nei. O le fa’aaogaina lava o va’alele latou e mae’a lelei i le aso Faraile, ae fa’ato’a ta’ape ma mae’a lelei isi a’oa’oga fa’apitoa tau tulafono i le  ea, ae maise le fa’atulagaina o galuega fa’aola a le Eafosi i le va o malo e tolu i le aso Gafua o le vaiaso a sau. Peita’i, e ui ina le fa’ailoa mai e le Eafosi nei fa’amaumauga, ae na talanoa mai le sui o le Coast Guard ma latou fa’aalia mai, “E leais e va’alele o pa’u i ogasami i tua atu o le sone a Guam, peita’i, e i ai le fa’alavelave na tupu i le a’oa’oga fa’apitoa o pailate a le eafosi a malo e tolu lea e faaaogaina ai pea le nofoaga o le Eafosi i Guam. O le va’alele ituaiga F16 a le Eafosi na sese’e e tusa o le 100 futu i tua atu o le malae va’alele po’o luga o le mutia lea, i le malae va’alele i Saipan. E leai se tasi o fa’ailoa mai o lavea ai, pe ua faaleagaina fo’i le va’alele. ua toe fa’aleleia uma lava nei meatotino. Peita’i ua fa’amautu mai e lea sui o le Coast Guard, e le o i ai se vaalele i le sami, ma e le o o fo’i i ai le Coast Guard i se mea fa’apena i le sami.

Pepelo Na ‘Ave Fa’amalosi - Se’i Maua Ai Se Tupe

Mai le teritori o Guam ua fa’ailoa mai ai se tama e 23 ona tausaga, le ali’i o Shawn Ray Lujan ua tu’ua’ia nei i lona faia o se tala fa’atupu ma pelogia ai le vaega o Leoleo Su’esu’e o lo’o latou sailia le tonu o lea mataupu. O lana tala o ia sa ‘avea fa’amalosi ma sa fa’afefeina o ia i le fana ina ia mafai ona avatua ai se vaega tupe mo le na ia avea fa’amalosia o ia.

O le tupe lea sa mana’omia e i latou na avea fa’amalosi lea tama e $5,000. mai tagata o lona aiga ma ni ana uo mamae. Peita’i, e tusa ai ma fa’amaumauga a le fa’amasinoga, ua tu’uaia nei Shawn Ray i lona pelogia o le fa’amasinoga, ae o ana mea sa fai, na te faia emeli i lona aiga ma ana uo mamae, o lo’o ia fa’atauina fuala’au fa’asaina mo le tagata e igoa ia Reaper, ma o lo’o i ai la se tinoitupe e $5,000. o lo’o aitalafu ai o ia. O lea ua ‘ave fa’amalosia ai o ia.

Peita’i, ina ua sailiili leoleo i lea mataupu, ua va’aia ai le ali’i o Shawn Ray o avea lana ta’avale i totonu o le a’ai o Dededo, na saisaitia mai ai lava o ia i na moliga o le taufa’avalea ma le gaoi. Na maua atu ai lava fo’i ma le ‘aisa ia te ia. Na fa’ailoa ane e Shawn Ray i leoleo, o lea tala sa ia fa’apea ai, ua avea fa’amalosia o ia ma ua fa’afefe fo’i o ia i le fana, o se pepelo lava.

saunia: Leua Aiono Frost