6.6 MAFUI’E I SOLOMONA

Mai le motu ua fa’aigoaina o le Santa Cruz Island - Atu Solomona i le Pasefika, ua fa’ailoa mai ai le lutia o lea motu i se mafui’e tele e 6.6 i le fua o mafui’a lona malosi, peita’i, e le’i i ai se lipoti lava e tasi e tusa oni mea ua fa’aleagaina, pe o ni tagata fo’i ua maliliu talu ai lea mafui’e malosi.

O le tala mai o le motu na fa’ate’ia i le mafui’e i le vaveao o le aso Gafua o le vaiaso nei, peita’i, e le’i fa’asalalauina fo’i se fa’ailo mo se galulolo i lea lava malo talu ai lea mafui’e malosi.

O le nofoaga tonu sa afaina i le malosi o le mafui’e o le itu lea o le atumotu e tele i motu e le o aina pe nonofo ai ni tagata o le atunu’u ma e fa’aigoaina lea itu atoa o Solomona o le Santa Cruz Islands.

Ua fa’ailoa mai i ni ripoti i le aso Gafua e tusa ma le 219 maila i le itu i sasa’e o Kira Kira i le atu Solomona, lea na i ai tonu le mata o lea mafui’e peita’i, o mea ia o lo’o i ai le atumotu le ‘aina o le atunu’u, ma ua matele ina le fa’ailoa mai ai ni a’afiaga tele o le soifua o nisi o i ai, po’o se afaina fo’i o ni meatotino se tele, ae maise o ni sologa.

SAINA SAISAITIA TAUMAFAI E FA’APA AMEPASA IAPANI

Mai le a’ai o Seoul i Korea ua fa’ailoa mai ai le ali’i mai Saina ua saisaitia ai e leoleo ina ua ia taumafai e fa’apa le Ofisa Autu o le Emepasa o Iapani i Seoul. O lea Saina sa ia fa’aalia le mafuaga o lona taumafai e faia lea tulaga, ona o le tina o lona tina o se tasi o tama’ita’i Saina sa fa’amalosia e le Army a Iapani ona avea ma tama’ita’i taliva’a i le taimi o le Taua lona Lua o le Lalolagi.

O le o’otia o le loto o lenei ali’i Saina, ua afua ai ona ia manatu e fa’apa lea nofoaga o Iapani i totonu o Korea i Saute. O le matua o lea ali’i e na’o le 37 tausaga o lona soifuaga, ma ua fa’aalia fo’i lona suafa o le auaiga o Liu. O ituaiga o pomu fa’apapa sa ia fetogia i le Ofisa o le Emepasa o Iapani o ni pomu penisini, ma sa ia faia lea tulaga i le taeao o le aso Sa na te’a nei.

Ua fa’aalia mai e leoleo, e pau le vaega o le Ofisa lea na fa’aleagaina o le vaega pito mai i fafo o le fale atoa, peita’i, ua vave fo’i gaoioiga a le vasega o tinei afi, ua afua ai ona le afaina atoa le fale o lo’o i ai le ofisa autu o le Emepasa o Iapani.

E sili ona fa’afetaia, ona e leai fo’i se isi na maumau le soifua i lea fa’alavelave, ae ua fesiligia nei e leoleo le ali’i o Liu, se mafuaga ua ia faia ai lea osofa’iga i le Ofisa o Iapani i Korea, ae ua le taumafai ina ia ulufale i Iapani e fa’ataunu’u ai lona to’asa.

Ua fa’ailoa mai, na ulufale mai Liu i sona visa e tafao ane ai i Korea, ae na uia mai lava e ia le malo o Iapani i lana faigamalaga lea.

Ua fa’aalia e le Yonhap News, o le tama lava lea na ia fa’ailoa i tagata su’esu’e, o le tina o lona tina, sa tautua i le vaega au a Iapani, o se tasi o tama’ita’i e fa’afiafiaina le vaega o fitafita ae maise lava i ta’ita’i o le Vaega Au a Iapani i le vaitaimi o le taua lona lua o le lalolagi. Ua fai si leva o taumafai lava lenei ali’i o Liu e fa’ataunu’u sana osofa’iga i le vaega au a Iapani, ona o latou amioga sa faia i tagata i vaitaimi o le taua. Peita’i, ua fa’aalia fo’i, ua tusa ma le faitau afe ma afe o tama’ita’i Saina ma isi atunu’u o Asia sa fa’apea ona fa’aaoga e le Army a Iapani i lena vaitaimi. I lea vaitaimi tonu lava sa auai ai Korea i lalo o le pule’aga a Iapani i le vaitausaga o le 1910-1945. Ma o lea fo’i laueleele sa nofo ai le tina matua o Liu ma fa’apologa fa’apea e le army a Iapani.

Ua mae’a fa’amaulalo pe fa’ato’ese fo’i Tokyo i a latou aga sa faia i tama’ita’i o Saina ma isi atunu’u o Asia i lea vaitaimi, peita’i, e le o fia nonofo lava i lalo ta’ita’i o Iapani e fai se talanoaga ma atunu’u ae maise aiga o nai tina nei sa afaina fa’apea, ae o lo’o soifua mai pea, ina ia maua fo’i se latou tinoitupe e fa’anofo lelei ai lagona o’otia o aiga!

Aumai: AP; saunia: Leua Aiono Frost