E TATAU ONA OU TOE TULA’I - OBAMA

I se saunoaga a le afioga le Peresetene o Amerika, Barrack Obama, ua ia fa’aalia ai, “E tatau lava ona ou toe tula’i mai o le Peresetene i le isi fa’ai’uga o le Palota ua alofaiva nei i ai le Iunaite Setete o Amerika.”

O lana saunoaga lea sa faia i le NBC, ma sa ia manatu ina ia fa’alauiloa lona lea fanoga i le mamalu lautele o le atunu’u, aua e i ai ana galuega ua mae’a avea ma matati’a ma ua alagatatau ai ona toe tula’i mai e avea ma Peresetene o le Malo tele. Ina ua mae’a lana lea saunoaga, ae maua ane loa le fa’ai’uga a le  palota fa’ata’ita’i na faia, ua maua e ia le 51% o e na palota, ma o se mea muamua lea ua tupu fa’apea, talu mai le masina o Me 2011.

O le taimi nei, ua fa’ailoa mai e le ABC News fa’atasi ai ma le Washington Post6, e mafai ona manumalo le ali’i peresetene i le sui mai le Repapilikana o Mitt Romney. I le taimi nei, o lo’o fa’atautaia lava kemupeni a le sui mamalu o le Repapilikana i Colorado ma Minnesotta.

Na muamua fa’asalalauina mai lea mana’oga o le afioga le Peresetene ao le’i amatalia le ta’aloga faitaulia o le sailiga o le siamupini o lenei tausaga i le Futipolo, le ta’aloga o le Super Bowl. O le mea moni, ua faia lana saunoaga fa’apitoa lenei, ae ua mae’a ona silafia lelei, ua maua mai fa’amaumauga o i latou ua mafai e lenei faigamalo ona toe fa’afaigaluegaina                   

Ua mafai ona matou fa’afaigaluegaina le 3.7miliona galuega, i le 23 masina ua te’a nei. Ua mae’a fo’i ona fa’amautu e sili atu galuega ua matou saunia mo i latou e le’i toe faigaluega talu mai le 2005, ma ua tele atu fo’i nei galuega fa’ainisinia ma isi falegaosioloa nai lo le tausaga e 1990, ae o lea e le’i uma aso o lea nofoa’iga.

TAMA’ITA’I FUSU:  MO’OMIA MO AM. SAMOA

Ua fa’ailoa mai le tama’ita’i fusu o Thaddine Swift Eagle Johnson mai le a’ai o Niu Ioka i Amerika, ua alu lava i luma lona taumafai i le “Faipele”.  Ua molimauina fo’i, e le o se tama’ita’i e tutusa ona uiga ma isi tama’ita’i e to’atele, o ia lea, e matua fiafia lava e taumafai to’atasi, so’o se mea lava i lona olaga, e fiafia lava ia e taumafai ia na maua, ae le tau tu’u se’i i ai sona faia’oga fa’apitoa.

E foliga mai e maua e ia manatu o le itupa o ali’i, ma o le mafuaga fo’i lea ua fiafia ai o ia e tauva i le fusu ma ua tolu ana fusi o fusu’aga ua nofonofo ma ia, ae mautinoa lava e fia maua sona avanoa mo le Olimipeka.

O ia o se tusi ata, ae le’i avea ma se tasi e fusu. E ui la na ola a’e o ia i le a’ai o Queens, Niu Ioka, ae ua nofo nei o ia i Durango, Colorado ma fusu ai, ma toe tusi ai fo’i ma ana ata o le atumauga lauiloa o le Rockies.

I le taimi nei, ua lauiloa ana ata, ae toe atili ona lauiloa o ia i ana fusu’aga ua a’e mai ai o ia ma ana pine e tolu o le Golden Gloves, lea ua atili ona fa’aosofia agaga o tama’ita’i e tauva i fusu’aga.

PA LE FALE GAOSI VAILA’AU MO TOGAFITIGA

O se fale gaosi fuala’au ma vaila’au mo togafitiga i le a’ai o Lahorei Pakisitana, ua fa’ailoa mai ua fa’afuase’ia ona pa ma ua maliliu ai le to’a 10 o tina ma le to’atolu o tamaiti.

O se lipoti aloa’ia mai lea fa’alavelave ua maua ane ai, o le fale lea e le’i lesitalaina mai lona amataga mai, ma e toe fa’afaigaluega ai fo’i tamaiti e le’i uma pulega a matua i o latou soifuaga fa’alemalo fa’avaomalo.

O le afi lea na pa ma ua mu atoa ai le tele o le fale fogafaletolu, ma ua masalomia lava le afuaga o lea afi na pa ona o se kesi na liki. O le tala mai, o lo’o i ai le popolega a i latou na taumafai e fa’aola mai nisi mai lea fa’aletonu, ne’i te’i e to’atele atu nisi e le’i maua tino pe le’i o’o fo’i i ai se taumafaiga e fa’asaoina mai.

O le tala mai, o i latou uma o faigaluega i lea falegaosi Vaila’au, o lo’o latou faia le galuega i ala solitulafono, ma o vaila’au fo’i ua maua ai ma gaosia ai, o ni vaila’au mo togafitiga o manu po’o meaola ae le o tagata. O se mea faigata, ona e pa le fale maua ane ai, o le to’atele o le aufaigaluega, o tamaiti e le’i tatau ona fa’afaigaluegaina.

I le taimi o lenei tala tusia, e to’a 13 i latou ua maua atu ua maliliu, ae to’a 13 fo’i i latou ua fa’asaoina mai i fafo ma ua toe fa’aauau i ai togafitiga a ali’i ma tama’ita’i foma’i.  O lo’o taumafai pea ona sailia nisi, ae o le fa’amoemoe maualuga, ia o’o le fesoasoani ia i latou uma o pagatia, talosia, a’o soifua pea.

O lea pisinisi ua maea fa’afoea mai mo le 25 tausaga, ma e tula’i fo’i i le nofoaga e fa’atutu ai fale nofo o aiga, ae le’i lesitalaina lelei fo’i ma ua iloga ai, o lo’o fa’atautaia lea pisinisi fa’asolitulafono. Ua fa’ailoa mai e tusa ma le 60 tagata faigaluega e aofia ai fafine ma tamaiti laiti, ma o le aofaiga lava lea sa tatau ona maua i le taimi na pa ai le fale.

saunia; Leua Aiono Frost