FA’AMALOSIA I LE NAIFI:  FA’AMASINO O LE FA’AMASINOGA A AMERIKA

O se tasi o ali’i Fa’amasino o le Fa’amasinoga Maualuga a le Iunaite Setete o Amerika ua fa’ailoa mai na fa’amata’u e se tasi ae ave fa’amalosi ni ana meatotino a’o i ai o ia i le ogasami o le Atu Karipiana i lana malologa mai ona tiute i le aso 9 Fepuari, 2012.

E tusa ai ma se fa’amatalaga mai se tasi o tama’ita’i o le Vaega o Fa’amasinoga a le malo tele, sa ia fa’aalia ai, “E ui lava ina e le ua na’o ia se Fa’amasino ua fa’amata’uina fa’apea, ae le o se mea faigofie lava ua o’o i le susuga Judge Breyer.” I le tausaga e 2004 na gaoia fa’amalosi a fo’i le ali’i fa’amasino o David Souter a’o tamo’e i le taeao , 1966 na se’ia ai le ato a le tama’ita’i fa’amasino o Ruth Bader.

O se tala mai, e tatau lava ona i ai leoleo nana fa’apitoa e latou te leoleoina fa’amasino uma lava a le Malo tele, ma e fa’amalosia lava lea tulaga pe afai o le a o ese mai fo’i i latou mai le Iunaite Setete o Amerika. E malaga nei leoleo ma i latou pe a o ese mai Amerika, le mea o lo’o matua sili ona leoina ai i latou mai ni mea fa’aletonu e ono tutupu i o latou soifua.

FA’AMAONIA MALIU - FITAFITA RAF PERETANIA

Ua toe fa’aalia mai le maliu o se tasi o fitafita o  le Ea Fosi a le Malo Peretania ona o ni osofa’iga i le itumalo o Nad-e Ali i Helmand. O lea ali’i fitafita lea ua mae’a fa’ailoa i lona aiga ua lisia i ona pepa, ua fa’ailoa mai na fana oti lava e le tagata a’o ta’amilo o ia i lana pou tiute i le itu i sisifo o Dashte, o se fa’amaumauga lea ua i ai a le Minisita o le Puipuiga o le Saogalemu.

O se tala mai le ali’i Ofisa o fa’asalalau a le malo o Peretania ua ia fa’aalia ai, “O matou lagona le fa’anoanoa, ma o fa’amaisega fo’i a le malo e o’o i le pulega o vaega au, ua mae’a fa’ao’o i le aiga o lea fitafita.

O le aofa’i ua i ai nei faitauga o i latou ua maliliu i le taua i Afakanisitana ua tula’i mai le 398 e tau ai le maliu lea, ae afua mai le tausaga e 2001. O le tala mai, e tatau lava ona ta’ito’alua sifi a nei fitafita, peita’i, ua masalomia sa talanoa o ia i se tasi o le atunu’u, ua na leiloa ai se osofa’iga o tulata mai ia te ia.

O ia lenei ua mulimuli mai lona maliu i se asi fo’i o fitafita a Peretania sa fasiotia fo’i i Afakanisitana lava i le aso 27 Ianuari, 2012 ae o le nofoaga i Helmand’s Khar Nikah. Ua fa’ailoa mai e tusa ma le 500 o fitafita e 9,500 lea ua fa’apea o le a malaga ese atu mo le latou malo i le tausaga nei, ae ua fa’aalia e le ali’i Palemia, e to’atele i latou o le a tu’ua Afakanisitana i le tausaga e 2013.

Ua tutusa lava mana’oga o nei ta’ita’i ma le Peresetene o Amerika, e matua mama ese uma mai fitafita o le latou malo i le tausaga e 2014.

FA’AMAVAE QUINATA MAI LE TOFIGA ADMINISTRATOR O LE EPA GUAM

Ua fa’ailoa mai e le Fa’atonu o le Matagaluega o le EPA i le malo o Guam, ua mae’a taua’aoina atu le tusi fa’amavae mai le latou matagaluega a le susuga Ivan Quinata, ma e amatalia i le aso lea fa’amavaega, Fepuari 15, 2012.

Peita’i ina ua fa’afeso’ota’i atu e le PNC News a lea malo le ali’i lea mo sana saunoaga i se mafuaga o lona tula’i ese mai lea tofiga, ae na ia fa’ailoa mai, “E leai sa’u fa’amatalaga e fia fa’ailoa atu e tusa o lea mataupu, ae talanoa i le Ofisa o le Kovana.”

O le tama’ita’i na talanoa mai o le Ofisa o le Kovana o Natalie Quinata, o le afafine o le uso o Quinata lea ua fa’amavae, peita’i, na ona ia fa’amautinoa mai le tulaga ua mae’a taua’aoina le tusi fa’amavae aloaia mai o Ivan Quinata mai lona tofiga i le EPA, ae le mafai fo’i ona ia fa’amaonia mai se mafuaga pe o se mea na fa’amalosia e fa’amavae, pe leai.

Peita’i, ua i ai nisi ua liki mai ai se fa’amatalaga, o le afuaga o le fa’amavae o Ivan mai lona tofiga, ona ua fa’amalosia e fa’amavae mai lona lea tofiga ona o lo’o i ai lava le su’esu’ega o lo’o fa’agasolo i totonu o matagaluega o le Malo, ae maise lava i totonu o le Kapeneta a Kovana Calvo.

Peita’i, ua fa’ailoa mai e se tasi o sui fa’asalalau a le Ofisa o le Kovana, e tauau lava e toe fo’i ane lava Ivan Quinata i lona tofiga sa i ai, aua e le o faia lava se tofiga fou a le Kovana i lona tofiga.

saunia: Leua Aiono Frost