Ads by Google Ads by Google

Tala moni ‘ae Ka’ilo

FASIOTIA LONA TO’ALUA A’O HONEYMOON I AUSETALIA

O se tamaloa mai Alabama, Amerika, ua molia nei i le fasioti tagata i le fa’amasinoga i Alabama, ona ua i ai fa’amaumauga, na ia fasiotia lona to’alua, a’o la’ua hanimuni [Honeymoon] i Ausetalia. O le tala mai, sa tatau lava ona ia tatalaina ia tau le tane okesene o le sikupa [scuba] a lona to’alua, peita’i, peita’i, ua fa’ailoa mai, sa ia fa’amauina ua matua tau lava, ua leai ai se okesene e manava ai si fafine, lona to’alua sa la’ua fa’aipoipo.

I le taimi o iloiloga amata o le fa’amasinoga o le ali’i o Gabe Watson, 34 tausaga le matua, na finau ai loia, ma ua latou fa’ailoa mai, o le mea ua tupu ua fa’atele eleoleo su’esu’e a le Malo o Ausetalia, se esikegi na tupu e le’i amana’ia e se tasi o le ulugali’i, i se solitulafono matuia e pei ona i ai nei.

Na lokaina le ali’i o Gabe i Ausetalia i le 18 masina i le falepuipui ina ua mae’a taliaina e ia moliga o le faisoti tagata matuia. Na malilie le malo o Ausetalia e si’itia le ali’i lenei i Alabama e fa’aauau ai le iloiloga o lona moliga.

I le taimi nei, ua molia o ia i lona fa’amalemoina o lona to’alua ae le’i umi ona uma atu le la’ua fa’aipoipoga i le tausaga e 2003.

O le sala ua iloga ona fa’amaonia nei, o le fasiotia o se tagata ina ia mafai ona maua ai se manuia tau tupe. Ua fa’amaonia nei e le vasega o loia a le setete o Alabama sa i ai le fa’amoemoega o le ali’i o Gabe e maua e ia le inisiua o lona to’alua, e silia ma le $200,000. pe a maliu o ia.

“O le ata tifaga lea sa matamata ai le ulugali’i ua una’ia ai mafaufauga o le ali’i o Watson ina ia fa’amau le okesene o le scuba a si ona to’alua, ma na ia taofia lava se’ia va’aia ua malemo o ia.”

“O le fa’amasinoga lenei, e le’i fa’ataunu’uina mo se isi lava mea, ae o le mea e maua pe a o’o ina maliu le to’alua. Pau lava le mea sa ia ‘ave’esea mai lona to’alua ina ua maliu, o le mama fa’aipoipo.”

O se tasi o fa’amaoniga sa mafai ona tamau ai le mea na faia sa’o lava e Gabe Watson i lona to’alua, o le va’aia lea ise ata na pu’ea e se tasi o tagata maulu sa latalata ane, ua a’au ese aga’i i luga le ali’i o Gabe, ae tu’u ai lona to’alua i lalo o le sami o lo’o tau apata solo ona lima, e fa’ailoa mai o lo’o saili se fesoasoani mo ia.

O se finauga maua’a a le vasega o loia mo le ali’i o Gabe ua latou finau mai ai, o le maliu fa’afuase’io Tina, ua avea e leoleo su’esu’e a Ausetalia o se fasioti tagata, ma ua latou fa’aaogaina se sasi sa fa’ailo a le komipiuta o le sikupa a Watson o se ma sa ia faia ma le iloa.

E ese le ata sa fa’aalia mai ele ali’i loia a Watson, Brett Bloomston, ua ia fa’aalia ai, o le mea tonu na tupu i le mauluga a lea ulugali’i, e le iloa e Tina ona maulu, o se taimi muamua lea, sa tatau ona faia le faiva o le ali’i Ausetalia sa tatau ona fa’aa’oa’o muamua ia Tina ona maulu. Peita’i, ua avea lava le ali’i o Gabe ma se tasi e va’ava’aia toto’a lona to’alua, a’o maulu i la’ua.

O le mea ua tupu, ua so’ona tafiti le tama’ita’i o Tina i lalo o le sami, ma ua mamulu ai le mea manava a Gabe, lea na mafua ai ona toe fo’i o ia e su’e mai luga, ae toe fo’i mai e sefe atu lona to’alua. O le tulaga i le inisiua, e na’o le $33,000. le inisiua o Tina o lo’o i ai, ae o le $165,000. o se inisiua mo le malaga, e mafai fo’i ona totogia ai ma le la’ua hanimuni.

O le mea moni lava o se esikegi matuia ua tupu, ae sili ona matuia se fa’aletonu o le a ola ai pea Gabe Watson ona o le fa’ai’uga o lenei fa’amasinoga , ua ia fasiotia lona to’alua i le la’ua hanimuni. I se ata sa lomia fa’atasi ma lenei tala i le nusipepa, ua fa’aalia ai le ali’i o Gabe Watson ua nonofo fa’atasi mai ma le isi ona to’alua fou, i totonu o le iloiloga a le Siuri i le fa’amasinoga o le ali’i o Gabe.

O le sasi o lenei ali’i o Gabe, ona o ia lava sa ia talosaga ua lava lona iloa o i ai, e fa’atautaia ai le la’ua mauluga ma lona to’alua i le sami loloto i Ausetalia. O lo’o fa’aauau pea le fa’amasinoga, ma o le a maua lava se i’uga mai le Siuri.

saunia: Leua Aiono Frost