TO’A 20 FANAU A’OGA TULI MAI I LE KOLISI O AVELE

E pe a ma le to’a 20 fanau a’oga ua tuli ‘ese mai i le a’oga a le Kolisi o Avele, ona o se fusuaga na tula’i mai i le maketi i Fugalei.  Na mafai ona fa’amaonia e le pulea’oga a Avele, le susuga Luafalealo Mikaele ia lenei tulaga, ona o se fusuaga na tula’i mai i le va o Avele ma Leififi.

Na ta’ua e Luafalealo, o le a le toe talia e le a’oga ia ituaiga amioga ma ua fuafuaina se fonotaga ma le Asosi o Matua ma Faiaoga e talanoaina ai lenei mataupu, ma fa’amautu ai lenei fuafuaga fou a le a’oga, e tuli’ese le tamaititi po o se teineititi a’oga, pe a maua o fusu.

E le’i molia se tamaititi a’oga Avele i le tulafono, ae ua mae’a ona faila moliaga e fa’asaga i tamaiti Leififi, lea na tau’aia le pasi  na i ai totonu tamaiti Avele.

Source: Radio New Zealand

TU’UA’IA TAMA’ITA’I TO’ALUA NA GALULUE I LE OFISA TUPE A LE OCL I LE GAOI

Ua amataina iloiloga o ni tama’ita’i se to’alua na galulue i le Ofisa o Tupe a le ‘Oceania Communications Ltd”, i lalo o le ta’ita’iga a le ali’i fa’amasino, le susuga Lesatele Rapi Va’ai.

O Alice Tapusoa ma Seletute Tauauvea, ua molia i le gaoi a’o galulue i se ofisa e tautuaina le mamalu lautele.

O Tapusoa ua silia ma le tolu tausaga o galue mo le OCL, ma o lo o molia o ia i le faitauga e tasi, o le gaoia o se tinoitupe e $5,000.  O lo o ta’ua e fa’apea, o lo o masalomia le fa’aaogaina e Tapusoa o se tupe na tu’uina atu e se tagata ia te ia, mo se peimeni mo le OCL.  Ua mae’a ona te’ena e Tapusoa le tu’ua’iga fa’asaga ia te ia, ma o le susuga ia Leota Ray Schuster, o lo o tula’i mo ia.

O Tauauvea o lo o molia i tu’ua’iga e iva, e aofia ai le gaoi, o le fa’aaogaina o tupe gaoi, nonoina atu o ni tupe i tagata faigaluega a le OCL, atoa ai ma lona faia o ni fa’amaumauga pepelo.

O lo o te’ena fo’i e Tauauvea nei moliaga ma o Maiava Visekota Peteru o lo o avea ma ana faufautua fa’aletulafono.

O Tauauvea ua ova ma le tausaga o galue mo le OCL.  Na ta’ua e le pule o le OCL, o Phillip Yam, lea na avea ma ulua’i molimau i le iloiloga i le amataga o le vaiaso, o Tauauvea na sui tulaga i se tasi o tagata faigaluega a le OCL, o Maranata Tupu Slade.

Na fesiligia Yam i le mafua’aga na sui tulaga ai Tauauvea ia Slade, na ta’ua e Yam na a’afia Slade i se su’esu’ega i se tinoitupe e lata i le $70,000, a le OCL lea na mu i le 2011.

O lo o fa’aauau pea iloiloga o lenei mataupu.

SUSUNU E SE TAMALOA LE TAGAVAI A SAMOA

O le amataga o le vaiaso nei na tula’i mai ai se fa’alavelave i le Ele’ele Fou i Apia, ina ua to i lalo e se tamaloa e igoa ia “Shalom” ia le tagavai o le malo o Samoa lea e agiagia i luma o se tasi o fale tele a le malo, ma susunuina.

Sa fa’amatala e se tasi o molimau, o le sikulaki o le fale a le malo, le susuga Viliamu Fa’afo’i, na alu atu ‘Shalom’ e fia talanoa i le palemia, le afioga Tuilaepa Sailele Malielegaoi.  Na la’ei ‘Shalom’ i la’ei papae.

Na ta’ua e Fa’afo’i le fa’atolu ona te’ena e le failautusi ia ‘Shalom’ mai i lona o’o atu i le palemia.  Na fa’aalia foi e Fa’afo’i, a fesiligia lenei ali’i i lana mataupu e fia va’ai ai le palemia, na tali o ia, o ia e alofa tele i lona atunu’u ma o le mafua’aga lea e fia talanoa ai i le palemia.

Ona o le to’atama’i o lenei al’i na aga’i sa’o atu ai lava i fafo i le fu’a ma to mai i lalo ma susunu.  Na tamo’e mai le ali’i o Adolf Moana, lea e galue i le ofisa nusipepa a le malo, o le Savali, ma taumafai e taofi le gaioiga a ‘Shalom’.

Na ta’ua e le sui Komesina o leoleo, le susuga Le’aupepe Fatu Pula, ua fiu leoleo e fa’atautala lenei ali’i ma ua molia nei o ia i le tulafono i lona fa’aleagaina po o le susunuina o le fu’a a le malo.

Na ta’ua e Le’aupepe, e latou te le malamalama i lenei ali’i ona e musu e tali i fesili a leoleo.  Ua faia nei su’esu’ega a leoleo.

Source: Samoa Observer