FAITIOINA E TUILAEPA LE OBSERVER

Na faitioina malosi e le alii palemia, le susuga Tuilaepa Lupesoliai Sailele Malielegaoi, le au tusitala a le nusipepa o le Samoa Observer i lana saunoaga e tapunia aloaia ai le tauaofiaga muamua a le Palemene mo lenei tausaga i le aso Faraile na sei mavae atu nei.

“Aua nei taitaiseseina outou i mafaufauga o tamaiti o lo o tusitusi mo le Observer,” o Tuilaepa lea. “Ua nao ni tamaiti. A tou vaai i ai e matua laiti lava. Ao lena lava o le a taitaiseseina ai outou.” E le o mautinoa po o le a le mafuaaga na faia ai ia lafoga a le alii palemia, ae na ia faia ina ua momoli lana faamalo i le Komiti o Ofisa o le Palemene (Officers of Parliament Committee), lea sa gafa ma le suesueina o faiga faaalatua ma le amioletonu na taua i le lipoti a le Suetusi Sili. Na faamaonia e le komiti ia faiga faaalatua ma sa latou fautuaina le tuuina atu i le tulafono.

LUA VAIASO UA TUU ATU IA SAGAGA LE USOGA

O le aso faaiu o le tauaofiaga muamua a le Palemene i le aso Faraile na sei mavae atu nei na logoina ai le si faipule o le itumalo Sagaga Le Usoga, le afioga Muagututagata Peter Ah Him e faapea, e lua vaiaso o le a tuu atu e le malo e fofo ai feeseeseaiga o lo o tulai mai i nisi o afioaga ua faatuai ai ona fausia le aoga fou mo le itumalo.

O le aoga a le itumalo sa i le afioaga o Tuana’i i se nofoaga e lalata i le sami, ma ua fautuaina le toe sii i se nofoaga e mamao mai le sami ona o popolega i le ono tulai mai o se galu lolo. O se tasi lea o tuutuuga o le faatupeina e le malo. O le fausia o faleaoga fou. E le gata i lea, ua fuafua foi le malo o le a siitia le tulaga o le aoga mai le aoga tulaga lua i le kolisi.  Na faaalia, sa tasi le itumalo i fanua i Afega e fausia ai le aoga fou. Peitai ua tetee se tasi o aiga i lea fuafuaga, ma o lo o finau o i latou e ona le pule i lea fanua. Ua tuuina atu lea mataupu i le tulafono.

FAASALA LE TUFUGA TA TATAU

Ua faasalaina e le Faamasinoga Maualuga se tufuga ta tatau iloga i le atunuu i le sala tupe e $1,300 ona o lona ave faamalosia o se tamaitai talavou ao faasua’ava o ia. O le poloaiga mai le Faamasinoga o lo o faasa ai ona faalauiloaina le igoa o lea tufuga ta tatau faapea le suafa o le tamaitai na aafia.

Ae na faaalia i faamaumauga a le Faamasinoga e faapea, o le aso 9 o Iuni i le tausaga na te’a nei sa faatalitali ai le tamaitai na aafia i le alia a le latou aiga e malaga ai i lo latou aiga. Peitai ua tuai atu le alia, o lea sa ia talosaga ai i le ua faasalaina pe mafai ona momoli o ia i lo latou aiga i lana alia. Sa faasua’ava le ua faasalaina i lena taimi ae sa ia malie e momoli le na aafia i lana alia ma sa la o loa. Peitai, sa pasi le nofoaga e i ai le nuu o le ua molia, a eave e le na faasala lea tamaitai i se nofoaga tuufua o le motu.

Na faaalia e le na aafia i leoleo e faapea, sa faaali atu e le ua faasalaina se selau tala ia te ia ma ia talosaga atu i se talosaga le talafeagai. E le i faailoa e lea tamaitai le talosaga a le ua faasalaina sa fai atu.

FAAMALAMALAMA E LE L.T.A. TAU O PASESE

Ua faamalamalama e le pulega o le Matagaluega o Felauaiga i Luga o le Laueleele (L.T.A.) ia le tau o pasese a taavale la’u pasese ona o le tele o faasea a nisi o le mamalu o le atunuu i tau o lo o tuuina atu e nisi o ave taavale.

Na faamanino e le L.T. A., na o le pau le tau faaopopo o lo o faataga ona fai e ave taavale la’u pasese mai tau o pasese ua faatulagaina, o le tau pe a faatali le ave taavale ao alu le pasese i se nofoaga e pei o le faia o se faatau i se faleoloa. Na faaalia e le sui ofisa sili o le matagaluega, le susuga Seimaleuta Sinapati Ulberg, o lea tulaga na amata faamamaluina ia Setema o le tausaga na tea nei.

O lea faamalamalamaga a le matagaluega na tapa e le toatele o le mamalu o le atunuu sa tuuina atu faasea i nisi o manatu faaalia o nisi o ave taavale la’u pasese.

Lilomaiava Andrew Fa’asau, Naenae Productions