TALA MAi SAMOA

MAUA MARIUANA I SAFA’ATO’A, LEFAGA

 

E 60 laau faasaina o le mariuana na maua e leoleo i se latou osofaiga na faatinoina I le fanua o se tasi o aiga i le afioaga o Safaato’a, Lefaga i le aso Faraile na sei mavae atu nei. Ua molia ai se ulugalii i lo la totoina ma le umia o le laau faasaina o le mariuana ma le faamoemoe e faatau atu.

 

Na faaalia, e 60 laau mariuana na maua ma o nisi o ia laau e oo atu i le ono ma le fitu futu le uumi. E le gata I lea, na maua le tele o laau faatoa ola ma o nisi sa totoina e pei o ni laau teu fale. Sa maua foi e leoleo ni sikaleti mariuana ua uma ona taai faapea mariuana e lei taaiina a ua uma ona afifi i fasi pepa mo le faatauina atu.

 

O lo o tau sailia nei e leoleo se alii e igoa ia Ioane Ifopo o Safaato’a ma Mulifanua na sola ese i le taimi na osofaia ai e leoleo le fanua na maua ai ia laau mariuana.

 

TUILAEPA: “AUA LE FAAMASINO”

 

Ua tali le alii palemia, le susuga Tuilaepa Lupesoliai Sailele Malielegaoi, i manatu faaalia a le vaega faaupufai o le Tautua Samoa e faapea, ua tatau i le alii sui palemia ona tulai ese mai lona tofi ao faagasolo taualumaga o lona faamasinoga.

 

E pei ona lipotia muamua i a tatou tala, o lo o molia le sui palemia, le tofa Fonotoe Nuafesili Pierre Lauofo ma le alii minisita lagolago ia Muagututagata Peter Ah Him i le faalavelave i galuega a leoleo, ona o se mataupu na tulai mai i le faaiuga o le tausaga na tea nei lea na suesueina ai e leoleo Muagututagata i masalosaloga o lo o faasua’ava ma uliina le taavale, ae oo atu Fonotoe ma faatonu le alii minisita lagolago e alu ia. I le feiloaiga a le Tautua Samoa ma le au tusitala i le vaiaso nei, na saunoa ai le taitai, le afioga Palusalue Faapo II, ua tatau lava i le alii sui palemia ona tulai ese mai lona tofiga seia maea ona iloiloina lea mataupu i le Faamasinoga.

 

TOFIA FEPULEAI AMEPEROSA ROMA E AVEA MA FAAMASINO

 

Ua filifilia le alii loia o Fepuleai Ameperosa Roma e avea ma se tasi o Faamasino o le Faamasinoga Faaitumalo ma ua maea ona saini aao ai le Ao Mamalu o le Malo, le afioga i le Tama Aiga Tui Atua Tupua Tamasese Efi. O le filifilia o Fepuleai o le iuga lea o iloiloga a le komiti faafoe o galuega faa-faamasino i se fautuaga a le afioga Faamasino Sili Patu Tiavaasu’e Falefatu Sapolu.

 

O le a galue nei le alii Faamasino fou i le Faamasinoga Faaitumalo faapea le Faamasinoga o Apili i mataupu tau fanua ma suafa. Ua atofaina nei le aso 25 o Fepuari, 2014 e faatauto ai le susuga Fepuleai e aloaia ai lona tofiga fou. O le taimi nei o lo o galue le susuga Fepuleai o se loia tutoatasi, o se galuega sa ia tauaveina talu mai le 2002.

 

TOATOLU ALII MOLIA I LE FASIOTI TAGATA

 

E toatolu alii ua molia nei i moliaga o le fasioti tagata faamoemoeina ona o le maliu o se alii na maua lona tino i totonu o lana taavale i Vaitele I le tausaga na tea nei. E umi se taimi na faatino ai suesuega a leoleo ma ua molia ai nei i latou nei e toatolu.

 

O le ua maliu o Uili Neil Seiuli, 35 tausaga le matua, na maua lona tino maliu i totonu o lana taavale i se nofoaga e faafesagai ma le falekalapu o le Tausala Bar i Vaitele-uta i le aso 16 o Novema, 2013. Na faaalia, sa fai se inuga pia a le ua maliu ma i latou e toatolu ua molia nei lea e aofia ai se alii e 19 tausaga mai Vaiusu-uta ma Saina, o se alii e 23 tausaga ma Saina ma Faiaai, ma se alii e 25 tausaga mai Vaitele-uta ma Samauga.

 

MALIU INA UA SIPAKA I LE ELETISE

 

E 23 tausaga o se alii mai le afioaga o Satoalepai ua faamaonia mai le maliu i le amataga o le vaiaso nei ina ua sipaka o ia i se uaea eletise ao faatino sana galuega i le latou pa povi i Satoalepai.

 

Na faaalia e le Komesina Le Tumau o le Matagaluega o Leoleo ma Falepuipui, le afioga Misa Nafoi Toa Talaimanu Keti, o le ua maliu o Anesone Peneueta, ma sa galue i le latou pa povi i le tatuuina o niu I totonu o lo latou fanua ma sa tulai mai ai loa lea faalavelave. Fai mai a ia, na maliu lava o ia ae lei oo i le falemai. Na taua e Misa, na mafua lea faalavelave ona o ni uaea eletise na pa’u’u i luga o le pa a lea aiga.

 

FAALAUILOA LE MANU SAMOA TAITOAFITU MO LAS VEGAS

 

O le aso Faraile na sei mavae atu nei na faalauiloa aloaia ai le Manu Samoa Taitoafitu o le a sauna atu mo vae e lua o le a sosoo ai nei o le taamilosaga taitoafitu a le IRB i Las Vegas, Amerika ma Ueligitone, Niu Sila.

 

O le laina i luma e aofia ai Lio Lolo, Fale Sooialo, Oneone Faafou, Levi Asi-Faamatala, Keli Meafua. O le laina i tua e aofia ai Vavao Afemai, Sani Niue, Alatasi Tupou, Reupena Levasa (kapeteni), Fomai Ah Ki, Tulolo Tulolo, Tom Iosefo. O faaleoleo e faatali atu i Samoa o Patrick Faapale ma Samoa Toloa. O le faiaoga ulu o le susuga Viliamu Punivalu ma le taitai malaga, le susuga Malo Nofoagatotoa.

 

Sa auai i lea faatasiga sui o le iuni, o sui o kamupani o lo o lagolagoina le au taitoafitu a le atunuu faapea aiga ma uo a tama ua filifilia. Na saunoa faalaeiau foi le alii palemia ma ia faamamafa ai le taua o le lava o le malosi, loto toa ma le faaaoga o le mafaufau i taimi o taaloga. O le aso Sa nei e tuuvaa atu ai le au mo Las Vegas i Amerika.

 

Saunia: Lilomaiava Andrew Fa’asau, Naenae Productions

Comment Here