TALA MAi SAMOA

TETEE SUI O LE MALO

 

O le aso 3 o Mati, 2014 lea ua toe tolopo atu I ai le mataupu a le afioga i le Sui Palemia ia Fonotoe Nuafesili Pierre Lauofo Meredith, faatasi ai ma le afioga i le Minisita Lagolago ia Muagututagata Pita Ah Him, mo le iloiloina o mau.

 

A ua faamauina foi e le Faamasinoga lo laua tetee ai i moliaga ua tuuaia ai e leoleo, lea e tasi le moliaga o le faalavelave i galuega a leoleo faasaga i le afioga i le sui palemia, ae lua moliaga o le faalavelave i galuega a leoleo ma le moliaga o le liliu sese o le taavale (U-turn), faasaga ia Muagututagata. O lenei mataupu na tulai mai i le masina na tea nei, na taofia ai e le poloka a leoleo ia Muagututagata ona o le masalomia i le avetaavale faasua’ava, ae faalavelave atu  ai le afioga i le sui palemia.

 

O lo o tetee i laua nei i moliaga, ae ua saunoa le afioga i le sui palemia, e faafetaia le matagaleuga o leoleo faapea le malo, ona o le le faaituau o le latou galuega, e tusa ma a latou suesuega lea ua molia ai i laua. Na faaalia e Fonotoe lona faatauaina o le tulafono, ma e talitonu foi o ia o se tulaga lea ua aliae mai i le galuega a leoleo, e le faailogalanu po o ai lava e solitulafono.

 

FALEPUIPUI LE TINA I LE GAOI

 

 E lua tausaga lea ua falepuipui ai nei le tamaitai o Nora Neemia mai le afioaga o Sili, Savaii ina ua faamaonia e le Faamasinoga Maualuga moliaga e 29 faasaga ia te ia o le gaoi ao avea ma tagata faigaluega.

 

O le 2 tausaga e tatau ona amata mai le aso 13 o le masina nei. Peitai o se tulaga faigata mo lenei tina, o le amata tuli ai o lana faasalaga, ao lea faatoa lima masina le matua o lana pepe, ma ua talia foi e le Faamasinoga le talosaga a lea tina mo le faatagaina o lana pepe la te nonofo faatasi i le falepuipui.

 

Mo le silafia, e 50 moliaga na molia mai ai lea tina, e aofia ai se tinoitupe e sili atu ma le $40,000, e faapea na toesea mai e lenei tamaitai ao faigaluega ai o ia i le ofisa o le Sports Lotto i Savaii. I taualumaga o le Faamasinoga, na faaleaogaina ai i si moliaga ma totoe mai ai na o moliaga e 29, lea ua faamaonia e le Faamasinoga e aofia ai se tinoitupe e sili atu ma le $26,000.

 

TOLOPO LE FAAMASINOGA O BRIAN LIMA

 

Ua toe tolopo nei i le aso 27 o Ianuari le faamasinoga o le alii lakapi lauiloa o Muliagatele Brian Lima, ona o se talosaga a loia a le malo ina ia tuuina atu se taimi e faamautu ai moliaga e faaulu faasaga ia Muliagatele.

 

O le aso Gafua o le amataga o le vaiaso nei na tulai ai Muliagatele i le Faamasinoga ma sa vaaia le toatele o tina ma tamaitai o se vaega o lo o tetee atu i sauaga i totonu o aiga sa faatalitali i fafo o le Fale Faamasino ma sa latou laeiina ni mitiafu o lo o lolomia ai ni faaupuga e tetee atu ai i sauaga. Peitai e lei vaai Muliagatele i ia mitiafu ma faailo ona sa faaulufale o ia e leoleo i se faitotoa e ui atu mai le fogafalealalo o le maota Faamasino agai atu i le fogafalelua i ni fasitepu e faaaoga e pagota e tulai i Faamasinoga.

 

O le auala foi lea na toe tuua ai e Muliagatele le Fale Faamasino ma e lei manuia taumafaiga a le au tusitala e faatalanoa o ia.

 

FALEPUIPUI 18 MASINA

 

Ua faasalaina nei le alii faipisinisi o Scot Barlow, 39 tausaga o Tulaele, i le 18 masina i le toese  Tafaigata ina ua faamaonia moliaga faasaga ia te ia i lona taumafai lea e aumai faanana i totonu o le atunuu le fualaau faasaina o le aisa, ma le umia o lea fuaalaau faasaina.

 

E pei ona lipotia muamua i a tatou tala, o se container o oloa a lea alii mai Amerika na suesue e sui o le Ofisa o le Tiute ma maua ai le 14.38 kalama o le fualaau faasaina o le aisa o nana mai i totonu o apa chips o le ituaiga o le “Pringles.” E le gata i lea, na maua i totonu o se isi apa Pringles ni paipa tioata se lua e faaaoga e ula ai le aisa.

 

O le aso Gafua o le amataga o le vaiaso nei na amata tuli ai le faasalaga o Barlow ma o lo o aofia ai i le poloaiga a le Faamasinoga, le faatinoina o ni togafitiga e foia ai le faafitauli o le faaaoga o fualaau faasaina i lea alii.

 

Lilomaiava Andrew Fa’asau, Naenae Productions

Comment Here