TALA MAi SAMOA

10 KOLISI A LE MALO E AOAOINA LE FAASAIENISI

 

E 10 kolisi maualuluga a le malo ua atofaina e aoaoina ai mataupu faasaienisi o le Biology, Physics ma le Chemistry pe a amata le tausaga aoga o lo o loma nei, ma ua fautuaina le fanau aoga o lo o fuafua e ave uma ia mataupu ina ia aooga ai i ia kolisi.

 

Na saunoa le ofisa sili o pulega o le Matagaluega o Aoga, Taaloga ma Aganuu, le susuga Falanaipupu Matafeo Tanielu Aiafi e faapea, o lenei faiga fou e mo le vasega 12 ma le 13 ma ua faia ina ia faasoasoa lelei ai faiaoga o mataupu faasaienisi i ia kolisi. E le gata i lea, ia taulai ai le silasila a faiaoga i le aoao lelei o alo ma fanau ua filifili e ave uma mataupu faasaienisi. O lea faiga fou a le matagaluega o le a faatinoina I kolisi e fitu i Upolu ae tolu i Savaii.

 

O kolisi i Upolu e aofia ai Kolisi o A’ana No. 1, Kolisi o Faleata, Kolisi o Falealili, Kolisi o Lepa ma Lotofaga, Kolisi o Samoa, Kolisi o Avele ma le Kolisi o Leifiifi.

 

MASALOMIA LE FASIOTI TAGATA I VAILELE

 

Ua leva ona masalomia e le toatele o le afioaga o Vailele na fasioti e se tagata le tina lea na maua lona tino maliu i totonu o lona fale i Vailele i le pe a ma le tolu vaiaso talu ona maliu o ia.

 

E pei ona lipotia muamua i a tatou tala, o le fale o lea tina e tu i autafa o le aualatele i Vailele, faafesagai ma le malumalu Katoliko ma e siomia i se pa. Na oo lea mataupu i leoleo ina ua faasea nisi o aiga e lalata ane i le fale o lea tina i se manogi leaga o lo o alu atu i lea fale. Sa faapea ona talepe e leoleo le pa i le fanua ma latou maua ai i totonu o le fale le tino maliu o lea tina ua amata ona manogi ona ua leva ona maliu o ia.

 

Na faaalia e se tasi o le afioaga e faapea o le igoa o lea tina o Va, ma e alala o ia i Amerika ae fai ma asiasi mai i Samoa ma nofo mo le umi e oo atu i le ono masina. Na fesiligia lea alii Vailele pe aisea e le iloa tele ai lea tina e tagata o le nuu ma na tali o ia, e le o se Vailele lea tina ma o le fanua umia saoloto e kuata eka o lo o fausia  ai lona fale. Fai mai a ia, e le lotu lea tina i ekalesia o lo o i lo latou afioaga ma e le fainuu foi, o le mea lea e le iloa ai o ia e nisi o le afioaga.

 

FESOASOANI FOMAI MAI LE UTAH VALLEY UNIVERSITY

 

E ono faavaeina I le Matagaluega o le Soifua Maloloina se vaega e gafa ma le faapipiiina o itutino fai mo i latou ua mumutu o latou lima ma vae.

 

O lea mataupu ua alia’e ona o le asiasi mai o se vaega o fomai tomai faapitoa mai le setete o Utah i Amerika i le faaiuiuga o le tausaga na tea nei e faatinoina la latou misiona o le ofoina atu lea o lea ituaiga auaunaga mo i latou o lo o manaomia.

 

O lea vaega o fomai tomai faapitoa e mai se faalapotopotoga faavaomalo mai le Utah Valley University ma e faimalaga solo i isi atunuu o le lalolagi e ofoina lea ituaiga tautua mo i latou o lo o manaomia ae le o mafai ona maua ona o le le lava o le seleni e faatinoina ai, faapea i latou ua le maua lea auaunaga ona o le maua o lea ituaiga auaunaga i o latou atunuu.

 

E to’afa nisi sa maua lea fesoasoani ina ua malaga mai lea aumalaga mai le Utah Valley University. O i latou ia e aofia ai le alii talavou o Fareti Toni mai Fogapoa, o Esau Pa’u mai Taga ma le tina o Iokapeta Paisa mai Fatausi.

 

TIMA’I LE MINISITA O AOGA I FANAU SIKOLASIPI

 

Ua fautuaina malosi e le minisita o le Matagaluega o Aoga, Taaloga ma Aganuu, le afioga Magele Mauiiliu Magele, ia alo ma fanau aoga ua faamanuiaina i avanoa sikolasipi e aooga ai i fafo, ina ia faataua le avanoa ua latou maua e le gata mo le faaleleia o o latou tulaga, ae ia toe foi mai e tautua i le atinaeina o le atunuu.

 

E silia i le to’aselau alo ma fanau sa aooga i le Iunivesete Aoao o Samoa ua faamanuiaina i avanoa sikolasipi i lalo o le polokalama fesoasoani tuufaatasi a le malo Ausetalia, Niu Sila ma le malo Samoa. “O le maua o le sikolasipi o le faamanuiaga,” o le saunoaga lea a Magele.

 

“O le faatupeina foi o a outou aoaoga, e le o ni tupe e pa’u’u mai i le lagi. O tupe nei mai le afu o tagata Ausetalia ma Niu Sila e  usu i le vaveao i le malulu e faigaluega ma tipi a latou tax, lea ua maua ai le tupe e totogi ai a outou aoaoga.

 

Saunia: Lilomaiava Andrew Fa’asau, Naenae Productions

Comment Here