TALA MAi SAMOA

LEAI NI FAALAVELAVE OGAOGA O LE KERISIMASI

 

O le suiga i mafaufauga ma amioga a tagata ua patipatia e faapea o le mafuaaga lea o le leai o ni faalavelave ogaoga ma le toafimalie o aso fiafia o le Kerisimasi o lenei tausaga. O le finagalo faaalia lea o le sui sooupu o le Matagaluega o Leoleo, le susuga Fauono Talalelei Tapu.

 

“O ni aso fiafia filemu ma le toafimalie,” o le saunoaga lea a Fauono. “Ua amata ona malamalama tagata e le tuuavanoa le tulafono i so o se tasi, ma e tutusa uma tagata i lalo o le tulafono.” Na ia faaalia, o le aofaiga o tagata na faamaonia le ave taavale faasua’ava i le masini e iloa ai le aofaiga o le ava malosi i le tino o le tagata (breathalyzer) i le vaitaimi o le Kerisimasi i le tausaga na te’a nei, e to’a 101. Peitai o le tausaga nei na o le to’a 20 ua faamauina.

 

Na saunoa Fauono, o le isi mafuaaga ua faaititia ai solitulafono ma faalavelave i lenei tausaga, ona o le lelei o le faatinoina o galuega a leoleo i le puipuia o le saogalemu lautele, lea o lo o faagasolo mo le 24 itula seia oo atu i le aso 6 o Ianuari, 2014. 

 

FINAU MATAI MO FANUA

 

Ua tutu faatasi ni matai o le atunuu o lo o naunau e puipuia le lumanai o fanua faaleaganuu mai le pulea e tagata ma kamupani mai fafo, e lu’i le malosiaga o le Faletupe o le Atinae o Asia (ADB) e ala I ana faiga faapaaga ma le malo Samoa.

 

O lo o taitaia lea vaega o matai e le afioga Lilomaiava Ken Lameta, o se matai mai Vaimoso ma Safotu ma ua maea ona tuuina atu sa latou tusi faasea aloaia i le pulega o le ADB ona o se poloketi o lo o galulue vaavaalua ai le ADB ma le malo, “e ono aveesea ai le oo atu i le 80 pasene o fanua faaleaganuu uma i Samoa.”

 

O le polokalama o lo o faasea ai, o se fuafuaga a le ADB ma le malo Samoa e mafai ai ona faaaoga fanua faaleaganuu e lagolago ai se nonogatupe. Na taua i le latou tusi e faapea, o le pe a ma le 30 pasene o nonogatupe faapea e iu ina le mafai ona totogi ma e ono aveesea ai fanua faaleaganuu. Ina ua faatoa faailoa lea fuafuaga, na faaalia e le alii palemia, le susuga Tuilaepa Lupesoliai Sailele Malielegaoi, e leai se mea o le a lamatia ai fua fanua faaleaganuu aua a le mafai ona totogi e le faaaogaina le lisi o le fanua e lagolago ai lana nonogatupe, e toe faasalalau le lisi o le fanua mo se isi e faaauauina, ae tumau lava le pulea o ia fanua e aiga.

 

Peitai o lo o tumau pea popolega ona e ui e tumau pea le pule o ia fanua i aiga, ae ono afaina ai le faaaogaina e aiga oa ia fanua ona o le le totogiina o lisi e i latou o lo o faaaogaina ia fanua e lagolago ai a latou nonogatupe.

 

FAAMALOLO PEA LE KOMESINA O LEOLEO

 

O lo o faaauau pea ona faamalolo mo se vaitaimi le alii komesina o leoleo, le afioga Lilomaiava Fou Taioalo ma le komesina lagolago sa pulea le toese i Tafaigata, le susuga Sala Uili Lafaele, ae maua lava o la totogi.

 

Ua mafua lea tulaga ina ia faaopopo ai le taimi mo le Komisi Suesue sa suesueina tuuaiga o faiga amioletonu faasaga ia i laua, e faamaea ai le tuufaatasia o le  lipoti e uiga i lea mataupu. E le o iloa po o le a le umi o le taimi o lo o moomia e faamaea ai lea faamoemoe. Na faaalia e le loia o lo o fesoasoani i le komisi, le susuga Sine Lafaialii-Koria, ua mafua le toe faaopopo o le taimi e tuufaatasia ai le lipoti a le komisi, ona o le tele naua o molimau ma faamatalaga na aoina i le taimi na faagasolo ai a latou iloiloga.

 

Peitai na taua e le tamaitai loia, e tatau ona oo atu i le faaiuga o Ianuari, 2014 ua tuuina atu le lipoti a le komisi i le Kapeneta.  

 

FAUTUAINA LE MINISITA O TUPE E FAAMAVAE

 

Ua fautuaina e le taitai o le vaega faaupufai o le Tautua Samoa, le afioga Palusalue Faapo II, ia le minisita o Tupe, le afioga Faumuina Tiatia Liuga, ina ia faamavae loa mai lona tofiga.

 

Na saunoa Palusalue, o le tulaga e pei ona faailoa i le lipoti a le Komiti o Ofisa o le Palemene e faapea, e $339,105.90 le aofaiga atoa o le tinoitupe na faaalu i le faatauina o le taavale o le ituaiga o le Lexus e faaaoga e Faumuina ao avea ma minisita o le Ofisa o Fanua a Samoa, Samoa Land Corporation (SLC), e matua le taliaina i lona mafaufau. O lea mataupu na alia’e ina ua lipotia e le au tusitala le lipoti a le Suetusi Sili lea sa faamauina ai. Na suesueina e le komiti filifilia a le Palemene ma iloa ai, o le vaegatupe e $400,000 a le SLC na faaaoga e faatau ai lea taavale.

 

O lea tinoitupe sa tatau ona faatauina ai taavale e lua e tai $200,000 i le taavale. Peitai na faaalu uma e faatau ai le taavale e tasi mo le alii minisita. Na faamatalaina e Palusalue lea tulaga o se faatauga matua le talafeagai lava, ma sa tatau ona aofia ai le faatauina o se taavale mo le alii minisita i le tala o le tupe a le Matagaluega o Punaoa Faalenatura ma le Siosiomaga lea sa i lalo o lana vaavaaiga.

 

Saunia: Lilomaiava Andrew Fa’asau, Naenae Productions

Comment Here