Ads by Google Ads by Google

Tala mai Samoa

FA’AMANUIAINA I LATOU NA LULU MA LE FA’AMAONI

E silia ma le tolu selau nisi ua fa’au’uina mai i le Iunivesite o le Pasefika i Samoa ma sa fa’atumulia le laumua o le aoga i Le Papa’igalala aua le molimauina o le i’u manuia o galuega fita ma le fa’amaoni a le vasega fa’au’u.

O se fa’au’uga iloga fo’i lenei fa’au’uga, ona ua mafai ona fa’au’uina ai, mo se taimi muamua, i totonu o le Iunivesite, i le fa’ailoga o le ‘Masters’ i A’oa’oga Samoa, ia ni isi se to’alua.

Na fa’alauiloa e le sui peresetene o le Iunivesite, ia Polofesa Fui Leapa’i Asofou So’o, ia lenei tulaga maoa’e, lea ua mafai ona ausia e Teleiai Christian Ausage ma Tamari Mulitalo Cheung.

I le saunoaga fa’apitoa a le sui palemia, le susuga Fonotoe Pierre Lauofo, sa ia toe fa’amanatuina ai i le vasega fa’au’u, ia le taua o le galue ma le naunauta’i fa’apea le lototele, e mafai ai ona aga’i i luma o latou olaga.

I le saunoaga a le Ao o le Malo, le afioga Tuiatua Tupua Tamasese Efi, sa ia ta’ua ai le taua o le galue malosi, e mafai ai ona i’u manuia le olaga.

O ni isi o fa’ailoga sa tufatufaina i lea aso, na aofia le fa’ailoga mai i le Sosaiete o Faiaoga sa Amoa, lea na maua e Ivona Aleki Taimalie mo le “Top Primary Teaching.  O Lemafo’e Leituala Tele’a sa na mauaina se fa’ailoga mai ia Fiasili Keil mo le “Top Student in Special Needs Education”.  O le fa’ailoga mai i le ofisa a le ECE, na maua lea e Sili Lemalu.

O isi fa’ailoga na aofia ai se fa’ailoga mai i le ali’i polofesa ia Ken Back mo le “Top Secondary Teaching Student”, lea na maua e Christina Autagavaia.  O Maria Cecilia Schwenke, sa na maua le fa’ailoga a Afualo Dr. Wood Salele mo le ‘“Top Management Economic Student”.

O Daniel Stanley, sa na maua le fa’ailoga a le ofisa a Isikuki Punivalu & Associate mo le “Top Management Student”.  O le fa’ailoga a Misa Telefoni Retzlaff na maua e Elena Tielu mo le “Top Overall Accounting Student”.

GALULUE FA’ATASI LEOLEO MA PULEAOGA E FA’AITIITIA FA’ALAVELAVE TULA’I MAI I FANAU AOGA

Ua faia nei se maliliega i le va o leoleo ma ni pulea’oga o ni kolisi a le malo se lua, ina ia aua ne’i toe tu’uina se avanoa i fanau a’oga e fa’atupu misa i va o a’oga, ona o se fa’alavelave na tula’i mai lea na loka ai se tamaititi Leififi e 17 tausaga, i lona tau’aia o se ta’avale na i ai ni tamaiti a’oga Avele.

Na ta’ua e le sui komesina o Leoleo, le susuga Leaupepe Fatu Pula, na mafua ona faia e lea ali’i lea tulaga, ona o se pisa na tula’i mai i va o a’oga i le fa’ai’uga o ni ta’aloga a a’oga.

O lenei fa’alavelave na tupu i Fugalei fa’apea ma maketi i Savalalo.

Na saunoa Leaupepe, ua mae’a ona fono ma puleaoga o kolisi nei e lua ma ua i ai se maliliega, o ai lava se tamaititi po o se teineititi a’oga e maua o fa’atupu fa’alavelave, e molia loa i le tulafono.  Ae le gata i lea, o le a tuli mai i a’oga.

O le aso 19 o le masina nei ua fuafua e tulai ai lenei ali’i a’oga mai Leififi i luma o le fa’amasinoga.

SU’ESU’E E LEOLEO IA NI TAGATA SAINA SE TO’ATOLU

O lo o ua su’esu’eina nei e leoleo ia ni pemita faigaluega a ni tagata Saina se to’atou o lo o galulue i se fale’oloa i Matautu.  E pei ona ta’ua e le sui komesina o Leoleo, le susuga Le’aupepe Fatu Pula, na logoina e se tasi ia le Ofisa o Femalaga’iga e fa’atatau i nei tagata, o lo o galulue i le KK Mart.

O lo o i ai se talitonuga, o lo o galulue nei tagata Saina e aunoa ma ni a latou pemita faigaluega.

 O nei tagata Saina, e aofia ai se fafine e 39 tausaga, o se ali’i e 21 tausaga ma leisi, e le o mautinoa pe fia ona tausaga.

Source: Samoa Observer

TALI MAI LE PALEMIA I LE FA’AI’UGA E TAPUNI NISI O A’OGA

Na fa’aalia e le ali’i palemia, le afioga Tuila’epa Sa’ilele Malielegaoi, e fa’apea, o fa’ai’uga mo le tapunia o a’oga, o fa’ai’uga ia e faia e lana kapeneta.

O se tasi o falea’oga lea ua tapunia e le komiti a le palemene, lea o lo o fa’afoea e le fofoga fetalai, ua mae’a ona talepe i lalo le falealuga o lea faleaoga, ma se fuafuaga e toe fa’afou faleaoga o lo o i le pito i lalo.

Ua ta’ua i ripoti e fa’apea, o le fa’atanaga lea na fa’ao’o atu i se komiti i le a’oga mo le toe fa’aleleia o faleaoga, na sau mai i le Minisita o Aoga.

Source: Radio New Zealand