Ads by Google Ads by Google

TALA MAi SAMOA

GAOSIA O LE ELETISE MAI LE SAVILI

 

Ua sainia e le malo Samoa se maliega ma le malo o le United Arab Emirates e faatupe ai e lea malo le fausia o se nofoaga e gaosia ai le malosiaga faaeletise e faaaogaina ai le malosi o le savili, i le tau e $5 miliona tala.

 

O lea faamoemoe o le a fausia ai ni masini faapitoa e i ai pe’ape’a tetele e taavale i le malosi o le savili ma gaosia ai le malosiaga faaeletise. O lea fuafuaga na talosagaina ai e le malo Samoa le fesoasoani a le malo United Arab Emirates i lalo o le polokalama fesoasoani a lea malo mo ana paaga i le Pasefika. Na saunoa le minisita o Tupe, le afioga Faumuina Tiatia Liuga e faapea, o le a tele se aoga o lea foi ituaiga tekonolosi i le faaitiitia o tupe alu a le malo o lo o faatauina mai ai le suauu e faaola ai afi tetele o lo o gaosia ai le eletise, o le a avea foi ma auala e ono faaitiitia ai le tau o le eletise e totogi e le gata i le malo ae faapea foi le atunuu lautele, aemaise o le a faasaoina o le siosiomaga ma le afuafu o le osone mai le faaleagaina i asu o afi tetele o lo o gaosia ai le eletise lea o lo o faaaogaina ai le suauu.

 

O lo o i ai le faamoemoe e amatalia galuega i le fausia o lea atinae i le amataga o le tausaga fou i le afioaga o Lalomanu, Aleipata ma o le a i lalo o le vaavaaiga a le Faalapotopotoga Malosi Faaeletise.

 

FA’AAUAU SUESUEGA O LEVAOPOLO

 

O le amataga o le vaiaso nei na toe fa’aauau ai le iloiloga o le mataupu faasaga i le alii faipule o Levaopolo Talatonu Vaai lea o lo o tuuaia i lona faaulufale mai o ni oloa mai fafo i ni pepa taufaasese.

 

O lo o tuuaia le alii faipule ma se tamaitai e faigaluega i lana kamupani o le Island Freight, o Christine Ainuu, i lo la faaulufaleina mai i le atunuu o se pusa oloa po o se container o fagu malosi e aunoa ma se faatagaga e faaaogaina ai ni pepa taufaasese. Na molimau se sui o le Ofisa o le Tiute i le aso Gafua e faapea, sa latou suesueina lenei mataupu ona o ni faasea a nisi o le atunuu i se faleoloa o lo o faatauina atu i tagata lautele ma le au faipisinisi ni fagu malosi e le faatagaina. Na ia faaalia, sa latou asiasi atu i le faleoloa sa taua i ia faasea i Lotopa ma latou maua ai ni fagu malosi e le faatagaina e 910 atoa ai ma nisi ituaiga fagu malosi e 14 .

 

Na fesiligia e sui o le Ofisa o le Tiute le alii e ona le faleoloa, le susuga John Lee po o fea na avatu ai ia fagu malosi, ma na tali o ia, o le alii faipule o Levaopolo sa faatauina atu ia te ia ia fagu malosi. Sa fesiligia foi e sui o le Ofisa o le Tiute le alii faipule i ia fagu mlosi ma sa ia faaalia, o lea uta o fagu malosi ua uma ona kilia e le Ofisa o le Tiute i le uafu. O lo o molia nei le alii faipule ma Ainuu i moliaga e valu o le faaulufale faasolitulafono o nei oloa i le atunuu, ma le tuuina atu o ni pepa taufaasese e faaulufale mai ai ia oloa. O lo o faaauau pea le iloiloina o lea mataupu.

 

18 TAUSAGA I LE TOESE

 

Na lauina i le aso Lua na sei mavae atu nei le faasalaga o se alii e 22 tausaga le matua ina ua faamaonia e le Faamasinoga lona moliaga i lona faiaiga faamalosi i se tamaititi e 12 tausaga le matua.

 

O lea solitulafono na tulai mai I le aso 12 o Setema o le tausaga nei ina ua agai atu lea tamaititi i le fale i le tuua ai o le aoga i le aoauli. Na faaalia i faamaumauga a le Faamasinoga e faapea, ao savali ane lea tamaititi i le auala e agai i lo latou fale, ae augani atu le ua molia pe mafai ona fesoasoani atu i le siiina atu o lana pusa pia. Ina ua oo atu lea tamaititi, sa ia maitauina ai e leai se pusa pia, ma sa faapea loa ona faiaiga faamalosi ai le ua molia i lea tamaititi. Sa lipotia e le aiga o lea tamaititi lea solitulafono i leoleo ma ina ua suesueina e leoleo lea alii i lea lava aso, sa latou maua ai se sikaleti mariuana i totonu o le taga o lona ofu.

 

Ua faasalaina nei e le Faamasinoga lea alii i le 18 tausaga i le falepuipui mo le moliaga o le faiaiga faamalosi i se tamaititi e 12 tausaga le matua, ma vaiaso e lua mo le umia o le sikaleti mariuana.

 

ILOILO E LE LOIA SILI LE LIPOTI A LEOLEO

 

Ua faamaonia e le Ofisa o le Loia Sili lo latou aofia ai i le suesuega e leoleo o faipule e toalua o le Palemene ma tuuaiga i le faasua’ava o se tasi o ia faipule e pei ona faamaonia e le masini e suesue ai le aofaiga o le ava malosi i le tino o le tagata.

 

Na faaalia e le Loia Sili, le susuga Aumua Ming Leung Wai e faapea, o le aso 6 o Novema na tuuina atu ai e leoleo le faila o lo o faamaumauina ai tulaga uma na tutupu i lea mataupu. Fai mai a ia, o lo o iloiloina ma le totoa e lona ofisa lea lipoti ma o lo o i ai le faamoemoe e maea ia iloiloga i ni nai vaiaso o i luma.

 

Ua silia nei ma le lua masina talu ona tulai mai lenei mataupu na faatu ai e leoleo sa tiute i luga o le auala, le taavale a le malo sa uliina e le alii faipule o Muagututagata Peter Ah Him, ina ua liliu faasolitulafono (U-turn) i se vaega o le taulaga I Apia.

 

Sa sosogi e alii leoleo sa tiute le manogi pia o le alii faipule ma sa la talosagaina o ia e feula le masini e faamaonia ai le aofai o le ava malosi o lo o i le tino o le tagata. Ao taumafai leoleo e faatino lea suesuega, sa faafuasei ona oo atu le alii sui palemia o Fonotoe Nuafesili Pierre Lauofo i se isi foi taavale a le malo ma faatonu ia Muagututagata e alu ese mai lea nofoaga. Sa ia fautuaina foi alii leoleo e o e suesue se tasi o taitai leoleo sa latou inu pia faatasi pe le o faasua’ava.

 

Saunia: Lilomaiava Andrew Fa’asau, Naenae Productions