TALA MAi SAMOA

LALAU E LE FAIFEAU LE GAOI O LE TIAKONO

 

Ua tolopo nei le faamasinoga o se alii faifeau o lo o molia i le lafo o ni upu taufaamatau i se tasi o sui o lana ekalesia. Na talia e le alii Faamasino Fesoasoani ia Fonoivasa Lolesio Ah Ching le talosaga a le alii loia o lo o tulai mo le alii faifeau e toe tolopo le mataupu ona o lo o gasegase le ua molia. O moliaga faasaga i le alii faifeau e mafua mai i se feeseeseaiga i lo la va ma se tasi o tiakono o lana ekalesia lea sa ia lalauina ai le gaoi o lea alii tiakono. O le alii tiakono o lo o aafia i lenei mataupu sa avea muamua ma komesina lagolago o le Matagaluega o Leoleo ma Falepuipui ma na malolo litaea o ia i le amataga o le tausaga nei. Ua faamavae nei o ia mai lea ekalesia.

 

O le tupe o lo o fesiligia na maua mai se sailiga seleni a le ekalesia i Niu Sila lea e masalomia e i ai se vaega tele o lea tupe ua toesea. E lei mafai ona faamautu mai e leoleo le aofaiga o le tupe o lo o fesiligia ma mafua ai ona oo mai lea mataupu i luma o le Faamasinoga. Ua tolopoina nei lea mataupu i le aso 26 o Fepuari o le tausaga fou.

 

MAEA ILOILOGA A LE KOMISI SUESUE

 

Ua faamaeaina nei ia iloiloga a le komisi suesue filifilia o le mataupu e faatatau i tuuaiga faasaga i le komesina o Leoleo ma Falepuipui ia Lilomaiava Fou Taioalo, faapea le komesina lagolago o lo o pulea le toese i Tafaigata, Sala Uili Seaga Lafaele, ia o lo o faamalolo mo se taimi le tumau.

 

Na faailoa e le tamaitai loia o lo o fesoasoani i le suesueina o lenei mataupu, le susuga ia Sine Lafaialii Koria, ua tapunia aloaia nei suesuega i le maea ai o le fesiligia o molimau ma i latou uma sa tuuina mai a latou talosaga mo ni avanoa e faia ai a latou folasaga e uiga i lenei mataupu. Na ia faaalia, o le aso Faraile o le vaiaso na tea nei sa faatalatalanoa ai le komesina o leoleo ma o ia foi le tagata mulimuli sa suesueina e le komisi. Talu ona amata mai suesuega i le aso 20 o Setema seia oo i le aso 29 o Novema, e to’a 122 molimau sa suesueina e aofia ai i laua o lo o tuuaia.

 

O le to’a 40 sa molimau o pagota, o le toafitu o pagota ua magalo, 56 malu o le malo ma nisi o le atunuu lautele sa faia a latou folasaga. Ua alo atu nei le komisi suesue e tuufaatasia se lipoti e tuuina atu I luma o le kapeneta ma ona o le toatele o I latou sa molimau ma suesueina, ua tuuina mai ai le fa masina e tapena ai lea lipoti.

 

TATALA LE OFISA O LE A.C.O.P.A

 

Ua tatala aloaia nei le ofisa tutotonu o le Faalapotopotoga o Tama ma Teine Tuai o le Kolisi o Avele po o le Avele College Old Pupils Association (ACOPA) i Malifa, i maota lisi a le afioga ia Teo Taito Faitele Afamasaga.

 

Ua faatuina lea ofisa i se taumafaiga ua amatalia a le faalapotopotoga aua tapenapenaga mo le faailogaina o le atoaga o le 90 tausaga o le Kolisi o Avele talu ona faatuina i le tausaga e 1924. I se sauniga faapitoa i le afiafi o le aso Lulu na sei mavae atu nei, na saunoa ai le afioga i le peresetene o le faalapotopotoga ia Su’a Mulitalo Henry Fruean i le taumafaiga o lenei faamoemoe ma ia faafetaia sui o le asosi o lo o gapatia i le faamaopopoina o le faalapotopotoga aua le faamoemoe o le kolisi i le tausaga fou.

 

O le aso 12 o Iuni, 2014 e atoa i ai le 90 tausaga talu ona faavaeina le Kolisi o Avele i Vailima. O lo o i ai le faamoemoe e auai mai nisi o tama tuai o le kolisi mai isi atunuu e pei o le faaao o le malo o le Atu Kuki faapea le fofoga fetalai o le malo Niue. O tausaga ua mavae sa sikolasipi mai ai tama aoga mai ia atunuu faapea Tuvalu ma Toelau e aotauina i le Kolisi o Avele.

 

FAAULUFALE FALEAOGA FOU

 

O le aso Lulu na faaulufale ai le galuega tele a le Kolisi o Avele i le fausia lea o ni faleaoga fogalelua se tolu faapea se maota faapitoa mo le aoaoina o le tusia o ata o fale e faaaoga ai mea faigaluega o tekonolosi faaonaponei, faapea le aoaoina o mataupu tau saienisi tau faatoaga. E le gata i ia faleaoga fou ua fausia, a ua toe faaleleia foi faleaoga o lo o i ai nei i le kolisi.

 

O nei galuega na faatupeina i le fesoasoani mai le Faletupe o le Atinae o Asia, le ADB, o malo Ausetalia, Niu Sila, Iapani faapea le malo Samoa e ala i se polokalama faapitoa o lo o galulue faatasi ai mo le fausia ma le toe faaleleia o faleaoga a aoga maualuluga i totonu o le atunuu. O le tau aofai o le galuega e silia ma le $5 miliona tala.

 

Saunia: Lilomaiava Andrew Fa’asau, Naenae Productions

Comment Here