TALA MAi SAMOA

TAUVA LE APA STARKIST TUNA MA LE APA ELENI

 

Afai ae taunuu le fuafuaga a le kamupani gaosi apa i’a o le StarKist Samoa e faaulufale mai i Samoa lana pusa apa tuna i kamupani oloa siiatoa i Samoa e faamatuu atu i le au faipisinisi, e ono tulai mai se suiga i le faiga o falavelave i Samoa nei ma o le a le toe vaaia foi ni pusa apa eleni e pei ona faaaogaina i le tele o faalavelave. Ua i ai foi kamupani i le taulaga ua latou faatauina mai toe faatauina atu ia pusa apa eleni. Ua mafua lea tulaga ona o le le lelei o le tulaga (quality) o nei apa eleni ma o nisi o tagata ua faatau atu pusa apa eleni e maua  palapala-a-malo mo se seleni.

 

O le a le toe tulai mai lea tulaga pe afai ae taunuu ona faaulufaleina mai pusa apa tuna a le StarKist, aua e tele le eseesega i le tulaga lelei. Na faaalia e le susuga Letufuga Faafoi Palepua, o se tasi o sui sinia o le StarKist Samoa lea sa malaga mai e faalauiloa a latou oloa gaosi i le faaaliga o oloa i le vaiaso na tea nei e faapea, e lelei mamao le tulaga o le tuna mo le fofoga taumafa nai lo o le i’a o lo o faaaoga i apa eleni, ma o se tulaga foi e mitamita ai le agaga, ona o lo o gaosi lava e tagata Upolu o lo o galulue I le teritori ia oloa gaosi.

 

Fai mai a ia, pau le tulaga o lo o popole i ai ina nei taugata tele le tau o le tiute e faaulufale mai ai i Samoa lea oloa gaosi, ae o lo o faagasolo feutagaiga i lea tulaga ina ia faafaigofie ona maua e tagata lautele lea oloa gaosi.

 

TATALA LE VAIASO O TUPULAGA TALAVOU

 

O le aso Gafua na sei mavae atu nei na faailoga ai le amataga o polokalama mo le Vaiaso o Tupulaga lea e maea i le aso valu o le masina nei. O le anavatau o lenei vaiaso o le “O Talavou i le Fatu o Atinae Lelei,” ma o lenei autu e uunaia ai tupulaga talavou e auai i polokalama faalauiloa e tapu’e ai lo latou malamalama i mataupu mo le soifua manuia o tupulaga.

 

O nisi vaega e faatatau i lenei vaiaso o le talanoaina lea o se sao o tupulaga talavou o le atunuu mo le Fono a Atunuu Laiti Tau Atia’e o le Lalolagi lea e talimalo ai Samoa i le tausaga fou, o le uunaia o tupulaga talavou ina ia faia ni faataitaiga lelei ma taulamua i atinae lelei mo le manuia o aiga ma afioaga, faapea ai ma le malamalama i auala e foia ai faafitauli i totonu o nuu e tauala i taaloga.

 

E silia i le to’a 150 le aofaiga o tupulaga talavou i le va o le 13 i le 35 tausaga le matutua o le a auai i polokalama eseese o le a faatinoina mo le faailogaina o le Vaiaso o Tupulaga Talavou mo lenei tausaga.

 

FOAI SAMOA MO TAGATA AAFIA I LE AFA

 

Ua faamaonia e le Kapeneta le tuuina atu o se fesoasoani tau seleni i le aofaiga e $50,000 mo le atunuu o Filipaina e fesoasoani ai i tagata o lea atunuu o lo o mafatia ona o le afa malosi o Haiyan, lea sa afatia ai lea atunuu i le amataga o le masina ua tuanai.

 

O le faafitauli aupito i tuga i le taimi nei o lo o feagai ma tagata Filipaina o le leai o ni taumafa atoa ai ma ni fale e tau ina mapu i ai mo lenei taimi. O le fesoasoani ua maau i ai le malo Samoa e le taumate o le a tele se aoga i galuega fesoasoani o lo o faagasolo mo tagata o lea atunuu. O le faaiuga o le vaiaso na sei mavae atu na faagasolo ai foi se sailiga seleni a tagata Filipino o lo o alala i Samoa e ala i se latou siva na faia i le falekalapu o le Y-Not i Matautu-tai.

 

O lo saili seleni foi isi faalapotopotoga ma pisinisi i le atunuu aua lava se fesoasoani mo tagata Filipaina.

 

TATALA VAIASO MO I LATOU E I AI MANAOGA FAAPITOA

 

O le aso Lua na sei mavae atu nei na faailogaina ai le vaiaso faapitoa mo i latou e i ai manaoga faapitoa i le atunuu ma le lalolagi atoa, ma o polokalama faatulagaina ua saunia e le Matagaluega o Tina ma Tamaitai, Atinae o Nuu, Afioaga ma Aga Fesootai e galulue faatasi ma le faalapotopotoga o le N.O.L.A. po o le Nuanua o le Alofa, faapea isi faalapotopotoga tumaoti o lo o faatinoina le tautua mo i latou o i ai manaoga faapitoa.

 

O le autu o lenei tausaga o le foia o faafitauli o lo o saisaitia ai le taumafai ma tatala faitotoa mo atinae ma le auai faatasi o tagata uma. O le polokalama aloaia e tatala aloaia ai lenei vaiaso na faatautaia lea i Savai’i i le  maota o Tina i Salelologa. O le autu o le faatinoina o lea sauniga i Savaii ina ia mautinoa le auai uma o i latou e i ai manaoga faapitoa i le motu tele, ma faateleina ai lo latou silafia ma le malamalama i aia tatau o tagata ma manaoga faapitoa.

 

O isi polokalama o le vaiaso e aofia ai se aoaoga faapitoa e faatatau i le feagaiga faavaomalo lea o lo o uunaia e faalapotopotoga tumaoti le sainia e Samoa, e faasino i aia tatau a tagata ma manaoga faapitoa.

 

Saunia: Lilomaiava Andrew Fa’asau, Naenae Productions

Comment Here