TALA MAi SAMOA

TATALA FAAALIGA O OLOA A SAMOA E LUA

 

O le vaiaso lenei na tatala aloaia ai le Faaaliga o Oloa a le au faipisinisi i Samoa ma Amerika Samoa e pei ona tuufaatasia e le Faalapotopotoga o le Au Faipisinisi mai Samoa e lua.

 

O lo o faagasolo lea faaaliga i luma o le maota o le malo i Matagialalua ma sa faalauiloa ai se tasi o oloa a le kamupani gaosi apa i’a o le StarKist lea o lo o faamoemoe e suia ai apa eleni o lo o faaulufale mai e le tele o kamupani oloa siiatoa i totonu o le atunuu mai atunuu i fafo aemaise lava atunuu Asia. E pei ona silafia, o pusa apa eleni e taua tele e le gata i faalavelave faaSamoa ae faapea foi le fofoga taumafa o le mamalu o le atunuu.

 

Na saunoa le sui o le StarKist, le susuga Tufuga Faafoi Palepua, ma ia faamalamalama ia pusa apa tuna o lo o gaosia nei i Amerika Samoa. Fai mai a ia, e lua ituaiga pusa apa o le “Faalavelave Pack” e 24 apa o lo o i ai i totonu, ma le “Gift Pack” e 12 apa o lo o i ai i totonu. Na saunoa Tufuga, e sili atu ona lelei le tulaga o le tuna o lo o latou tuuapaina nai lo o i’a o lo o tuuapa e kamupani mai atunuu i fafo lea o lo o faaulufale mai e kamupani siiatoa i Samoa. O le masina fou o lo o faamoemoe e taunuu mai ai lea oloa gaosi a le StarKist i Samoa ma iloilo ai loa sona tau e faatau atu ai i le atunuu lautele.

 

MOLIA LE INTER ISLAND I LE LE FAILAINA O LAFOGA

 

Ua toe tolopo i le aso lua o Aperila e atoa i ai le fa masina, le mataupu a le kamupani vaalele o le Inter Island Airways ma le Ofisa o Lafoga a Samoa.

 

Ua mafua lea tolopoga ona o le talosaga a le pule sili o le Inter Island lea na tulai i luma o le Faamasinoga Faaitumalo e tali i moliaga e tolu o lo o molia ai e le Ofisa o Lafoga le kamupani vaalele. Na faaalia i faamaumauga a le Faamasinoga, mai le tausaga e 2006 seia oo mai i le tausaga nei, o lo o tau tulituli pea e le Ofisa o Lafoga ia le kamupani vaalele ona o lafoga e le’i failaina. E tolu moliaga na ioeina e le pule sili o le Inter Island ina ua fesiligia e le Faamasino ma na ia talosagaina le tuuina atu o se taimi e toe galulue ai le latou aufaigaluega fou i le mataituina o ia lafoga, ona ua faamalolo le latou aufaigaluega tuai sa gafa ma ia lafoga.

 

E le o iloa i le taimi nei le aofaiga atoa o ia lafoga le failaina e pei ona tulituliloa ai e le Ofisa o Lafoga.

 

MOLIA LE AVE TAAVALE FAASUA’AVA

 

Ua molia nei i le tulafono se tamaitai talavou e 19 tausaga lea sa ia uliina le taavale pikiapu lea na taavalevale i Vailoa, Faleata i le vaiaso na tea nei, ma maliliu ai alii talavou e toalua o Jesse Risale ma Thesaurus Heather.

 

Sa taofia e leoleo lea tamaitai ma molia i le ave taavale faatamala ua mafua ai le maliu o se isi, ae ua faaalia mai e leoleo o le a faaleaoga lea moliaga ae molia o ia i nisi moliaga e tuga atu. O lea faalavelave na tulai mai i le vaveao o le aso Tofi o le vaiaso na tea nei ma na faamaonia mai e le sui sooupu a leoleo, le susuga Fauono Talalelei Tapu e faapea, e toafa le pasese sa malaga ai i le taavale – e toatolu alii ma le tamaitai e toatasi. Na maliliu tama e toalua ae manunua le tama ma le teine. Na faaalia e Fauono, sa tafafao i latou ia i se falekalapu i Matautu-tai, ona faaauau ai lea o le latou inuga pia i tua o se faleoloa i Savalalo ae lei agai atu ai loa le taavale i Vailoa, Faleata ma lavea ai.

 

O i laua ua maliliu sa aumau uma i Niu Sila. Ua molimoli atu nei le tino maliu o Risale i Niu Sila e lagomau ai, ao Heather o lo o lagomau i lona aiga i Tufuiopa.

 

TALI TUILAEPA I LE ITU AGAI

 

E manatu le alii palemia, le susuga Tuilaepa Lupesoliai Sailele Malielegaoi, ua leaga le ulu o le taitai o le Itu Agai, le afioga Palusalue Faapo II, ma lona manaoga ua faailoa ina ia vave fai faiga palota lautele a le atunuu ae toe tolu tausaga oo i le faiga palota. O le vaiaso nei na faaalia ai e Palusalue e faapea, ua le sagatonu le mafaufau o le alii palemia ma ua aafia le pulea ma taitaiina o le atunuu ona ua amata ona mavaevae le pulega o le vaega faaupufai o le HRPP. Peitai, i se pepa o faamatalaga mai le alii palemia, na lapisi ai e Tuilaepa ia manatu o Palusalue ma ia faaalia, e leai se mea o le a vave ai fua faiga palota lautele. Fai mai a ia, o lo o sauna le HRPP e patipatia le atoaga o le 35 tausaga talu ona faavaeina le latou faafaletui, ma o le atoaga foi lea o le 35 tausaga o le maopopo faafaletui faapea upufaiomalo.

 

“O le a matou patipatia ai foi ma le 35 tausaga o le alualu i luma o le atinae ma le tamaoaiga o le atunuu lea ua suia ai nei le faasinomaga faavaomalo mai atunuu aupito i tau atiae (Least Developed Country). Na saunoa Tuilaepa, a vave fai faiga palota, o lona uiga na o Palusalue lava lana vaega pe afai ae toe tu mai, aua na o le tatagi o lana telefoni i sui o le Itu Agai o lo o fia ulufale atu i le HRPP. Fai mai a ia, ana leai le tulafono o lo o faasa ai le fesuia’i o vaega faaupufai a sui faipule, semanu ua leva ona o ane uma sui o le Tautua Samoa i le HRPP.

 

Saunia: Lilomaiava Andrew Fa’asau, Naenae Productions

Comment Here