TALA MAi SAMOA

TAUTUA SAMOA: “UA SOLI TULAFONO TUMAU”

 

Ua faaalia e le taitai o le vaega faaupufai o le Tautua Samoa, le afioga Palusalue Faapo II e faapea, o le faatuai e le malo ona faalauaitele o le lipoti a le Su’etusi Sili, ua ono solia ai tulafono tumau a le maota. Na finau Palusalue, o le lipoti a le Su’etusi Sili sa soalaupuleina i taualumaga a le Palemene ina ua faaulu ia Iuni 2012, ma o lona uiga, ua avea ma faamatalaga faalauaitele e mafai ona lipotia e le au tusitala.

 

I lana feiloaiga ma le au tusitala i le vaiaso na sei mavae atu nei, na faitioina malosi e le alii palemia, le susuga Tuilaepa Lupesoliai Sailele Malielegaoi le au tusitala ma le au faasalalau i lo latou lipotia o le lipoti a le Suetusi Sili ae lei soalaupuleina muamua e komiti a le Palemene. “E sa’o le fofoga fetalai,” o a Tuilaepa lea.

 

“E i ai laasaga e tatau ona mulimulitaia faatoa mafai ai ona faalauaitele le lipoti a le Suetusi Sili. O le laasaga muamua e tuuina atu e le Ofisa o le Suetusi Sili le lipoti i le Palemene. Lua, e suesue e le komiti filifilia a le Palemene lea lipoti ma soalaupule ma le Suetusi Sili i itu e tatau ona toe faaleleiama pasia ia suiga faatoa faalauaitele ai lea lipoti.” Na saunoa le alii palemia, ua faia e le au tusitala le laasaga lona fa e lei faatinoina le laasaga lona tolu. Peitai na teena malosi e le taitai o le Tautua Samoa lea manatu faaalia o le palemia. Fai mai a ia, i lalo o le tulafono tumau, e tolu lava masina e tuu atu i komiti e soalaupule ai le lipoti ona toe lipoti atu lea i le Palemene.

 

Peitai ua leva tele ona tuuina lea mataupu i le laulauafono e lei talanoaina lava. Mo se faataitaiga, na faaalia e Palusalue e faapea, e amata talanoaina loa le tala o le tupe, avea loa ma faamatalaga faalauaitele aua foi o lo o faasalalauina taualumaga a le Palemene i le leitio. E faapena foi la le mataupu e faatatau i le lipoti a le Suetusi Sili.

 

FENUMIA’I LE PILI MO LE FAALELEIA O LE TAAVALE

 

E faitau afe tala le tau o le pili mo galuega toe faaleleia na faia i se taavale pikiapu fou a le Matagaluega o Faatoaga ma Faigafaiva na lavea i se sui sinia o le matagaluega, na fenumiai ma isi pili a le matagaluega.

 

O lea tulaga na faamaonia mai e le faauluuluga o le matagaluega, le afioga Fonoiava Sealiitu Sesega, ma na ia faaalia, e leai ni fuafuaga e faanunumi lea pili ma isi pili a le ofisa e pei ona faasea ai nisi o le atunuu. O lo o toatele pea le mamalu o le atunuu o lo o fesiligia po o le a le tulaga o faia i le sui sinia o le matagaluega na lavea ai le taavale pikiapu fou a le matagaluega e pe a ma le $100,000 lona tau aofai. O lea faalavelave na tulai mai i le tolu masina ua tuanai ma o le sa lavea ai lea taavale o le faauluuluga o le vaega o laau toto, le susuga Misa Konelio. Na faamalamalama e le pule sili o le matagaluega, o lo o totogi uma lava e Misa le toe faaleleia o mea uma o le taavale na faaleagaina i lea faalavelave, ma o lo o i ai foi lava taiala ma tulafono a le latou matagaluega i tulaga e faia i ituaiga faalavelave faapenei. “O lo o matou malamalama foi, e i ai lava le avanoa e mafai ai ona lavevea taavale,” o a Fonoiava lea.

 

“O le tulaga foi lena na tupu ma ua uma foi ona faia tulaga e pei ona aiaia i tulafono a le komisi e pulea le au faigaluega a le malo i le na lavea ai le taavale. E le faapea e lavea loa se taavale i se tagata tuli loa lena tagata.”

 

 

FALEPUIPUI ALII FASIOTI TAGATA E TOATOLU

 

E toatolu ni alii talavou ua faasalaina nei i le falepuipui e le Faamasinoga Maualuga ina ua faamaonia o latou moliaga taitasi o le fasioti tagata pa’ivalea, i se faalavelave na tulai mai i le lua tausaga talu ai lea na maliu ai se alii e 39 tausaga le matua o Nemate Nemate o Toamua, ina ua fasi e ia alii.

 

O le ua maliu sa fai lona toalua i le taimi na maliu ai ma e toalima o la alo. Na faaalia i faamaumauga a le Faamasinoga e faapea, na foi ane le ua maliu i lana taavale ina ua uma le lotu, ae lafo i ai e le toatolu ua molia ni upu masoa. Sa faatu e le ua maliu le taavale ma alu ane loa fai ma fusuaga ma ia alii e toatolu.

 

Sa fasi faamo’amo’a e ia alii ia Nemate ma maliu ai lava o ia ona o le tuga o ona manua. Ua faasalaina ia Viki Laga, 31 tausaga i le 12 masina I le toese, o lona uso o Mafoe Laga, 25 tausaga ua faasalaina i le fa tausaga I le toese, ma Feuu Leilua Manuvao, 22 ua faasalaina i le lua tausaga ma le ono masina i le toese. O ia alii e omai mai Vaitele.

 

 

E LEI FAATAGAINA SIUSIU PIPI

 

O lo o teena e sui o le Ofisa o le Tiute sa latou faatagaina le aveina i tua o ni pusa siusiu pipi se lua mai le malae vaalele i Fagalii e aunoa ma ni pemita o ia pusa.

 

O se tasi o ia pusa siusiu pipi o le pusa a se tasi o pasese sa faatali mai e le fofoga fetalai o le Palemene. O lea tetee a sui o le Ofisa o le Tiute o lo o feteenai ma faamatalaga a le fofoga fetalai ma se tasi o le pasese sa molimauina lea tulaga, ma sa la faaalia, sa faataga ia tagata ona ave i tua a la pusa siusiu pipi e aunoa ma ni pemita. Peitai ua faaalia e le pule o le Ofisa o le Tiute, le susuga Pitolau Lusia Sefo Leau, sa taofia uma pusa siusiu pipi a ia pasese ona e leai ni pemita.

 

E pei ona silafia, o pusa siusiu pipi mai Amerika Samoa e moomia le i ai o se pemita e faaulufale mai ai i Samoa, ma e totogi foi le $300 tala Samoa faatoa mafai ai ona ave i tua.

 

Saunia: Lilomaiava Andrew Fa’asau, Naenae Productions

Comment Here