TALA MAi SAMOA

O LE FINAGALO TOATASI LAVA O LE TAITAIFONO

 

Ua faaalia i se faaaliga aloaia mai le Fono o Ekalesia Soofaatasi a Samoa e faapea, o se finagalo na faaalia e le taitaifono, le afioga Tiakono Kasiano Leaupepe, e faatatau i le mataupu e faatatau i feusuaiga fai faamalosi po o le toso teine, faapea sauaga mataga ma faaoogalima mataga faasaga i tamaitai, o le finagalo toatasi lava lea o le taitaifono, ae le atagia ai pe tauaofai ai finagalo o sui o le Fono o Ekalesia Soofaatasi a Samoa.

 

Sa faasalalau faalauaitele le finagalo faaalia o le afioga i le taitaifono i le fofo o lea faafitauli e faapea, e tatau i tina ma tamaitai o lo o aafia i nei sauaga mataga, ona matua u se vaega o tino o alii o lo o faia lea solitulafono ina ia faamanualia tuga ai. Fai mai a ia, a le faia lea tulaga, e ono faauigaina o lo o latou taliaina le faia o ia sauaga ia i latou. Na saunoa foi le taitaifono, o le solomuli o le olaga faakerisiano ua mafua ai faatupulaia pea o ia ituaiga solitulafono.

 

TOALUA NA MALILIU I SE FAALAVELAVE TAU TAAVALE

 

E toalua ni alii talavou na maliliu i se faalavelave tau taavale na tulai mai i le afioaga o Vailoa, Faleata i le vaveao o le aso Tofi ina ua taavalevale le pikiapu sa tietie ai i laua i le keli.

 

O i laua ua maliliu o Leslie Risale o se alii e 21 tausaga le matua o Vaimoso, ma Thesaurus Heather, e 23 tausaga o Tufuiopa. Na faaalia e se tama na muamua oo atu i le nofoaga na tupu ai le faalavelave e faapea, e oo atu o taatitia mai ia alii i luga o le auala, ae na faasaoina le tamaitai talavou sa faafoeina le taavale. Na faaalia e lea tama, na maliu ai lava i lena taimi se tasi o alii, ao le isi sa manava lava. Ae peitai e oo atu i le falemai ua maliu o ia. Na faaalia foi e lea tama e faapea, sa ia mauaina se atigifagu o se fagu malosi o le ituaiga o le Jim Beam i le nofoaga na tupu ai le faalavelave.

 

O lo o masalomia e leoleo o le faasua’ava tele o le ave taavale na mafua ai lea faalavelave.

 

TATALA ALOAIA FALEMAI FOU NA FAATUPE AMERIKA

 

Ua tatalaina nei le falemai faaitumalo fou i Faleolo lea na faatupeina e le malo Amerika i se faiga faapaaga ma le malo Samoa. E sefulu masina sa faatinoina ai lenei galuega i le tau aofai e $3 miliona tala e pei ona saunoa faafetai ai le afioga i le alii palemia, le susuga Tuilaepa Lupesoliai Sailele Malielegaoi, i le sauniga faapitoa e tatala aloaia ai lenei galuega tele.

 

Na faafetaia foi e Tuilaepa, le vaega o le Navy a Amerika lea na tauala mai ai lenei fesoasoani i le latou polokalama fesoasoani i atunuu eseese o le Pasefika. Na saunoa le alii amepasa o Amerika, le susuga David Huebner, o lenei galuega ua faaalia ai le faatauaina e Amerika o avanoa e faaleleia atili ai le soifua maloloina lelei o tagata o le Pasefika.

 

LE FAASALAINA SEVE I LE FALEPUIPUI

 

Ua le faasalaina i se faasalaga faafalepuipui le alii sa avea ma komesina o le Ofisa Tinei Mu, le susuga Seve Tony Hill, ae ua faanofovaavaaia o ia mo le lua tausaga. O lea faaiuga a le Faamasinoga Faaitumalo na lauina i le aso Faraile na sei mavae atu nei, ma sa vaaia le faatumulia o le maota Faamasino i aiga ma uo o le susuga Seve sa tapuaia lona faamasinoga.

 

E pei ona lipotia muamua i a tatou tala, sa molia Seve i moliaga o le faia o sauaga faafeusuaiga i se tamaitai sa faigaluega i le Ofisa Tinei Mu. O le vaiaso nei na teena ai e le Faamasinoga se talosaga a le loia a Seve ina ia tatala o ia i tua e faatali ai le lauina o lona faasalaga.

 

FAALAUILOA TAITOA 7 MANU SAMOA

 

Ua faalauiloa mai e le Iuni Lakapi a Samoa ia suafa o le Manu Samoa Taitoafitu o le a malaga atu mo le Taamilosaga Taitoafitu a le Fono Faatonu o le Lakapi i le Lalolagi, le IRB i le vae i Dubai i le faaiuga o le vaiaso fou, sosoo atu ai ma le vae i Aferika i Saute i le vaiaso i ona tua atu.

 

I se sauniga faapitoa i le ofisa tutotonu o le iuni i Tuanaimato i le aso Faraile na sei mavae atu nei, na saunoa ai le taitaifono o le iuni, le susuga i le alii palemia, Tuilaepa Lupesoliai Sailele Malielegaoi, e le gata i upu faalaeiau ma faamalosi i le au ua filfilia, ae sa faapea ona faalauiloa aloaia ai foi suafa o i latou ua filifilia.

 

O le au ua filifilia; Laina i luma – Falemiga Selesele, Fale Sooiali, Misioka Timoteo, Oneone Faafou, Levi Asi-Faamatala, Lio Lolo. Laina i tua – Vavao Afemai, Sani Niue, Reupena Levasa (kapeteni), Alatasi Tupou, Richie Ah Chong, Tulolo Tulolo. O le faiaoga taiulu o Viliamu Punivalu, faiaoga lagolago/taitai malaga o Malo Nofoagatoto’a. Mai le au ua filifilia, e toalua sui o le a faatoa taaalo lea i lea taamilosaga faavaomalo, ma oi laua ia o Richie Ah Chong ma Oneone Faafou. Na toe faamanatu e le alii palemia i le faiaoga taiulu, e faalagolago lava le toe filifilia o ia i lea tofiga i le sologa lelei o le taaalo a le au. Fai mai a ia, e faaletonu le au, o le a sailia foi se faiaoga fou e tauaveina le aoina o le au.

 

Saunia: Lilomaiava Andrew Fa’asau, Naenae Productions

Comment Here