TALA MAi SAMOA

FAASALA AVEPASI I LE 11 TAUSAGA I LE TOESE

 

E 11 tausaga ua faasalaina ai nei i le falepuipui le alii avepasi o Moe Iosua lea sa ia uliina le pasi na tafea i le malosi o tafega i le vaitafe i Lano, ma maliliu ai ni teineiti laiti e toalua ina ua malelemo ma manunua ai nisi o le pasese.

 

I le lauina o lona faasalaga i le aso Lulu, na saunoa ai le alii faamasino o Pierre Slicer e faapea, o le le fautuaina ma le faatamala o le alii avepasi na mafua ai ona tupu lea faalavelave ma maumau ai soifua o nei teineiti laiti, e 5 tausaga o le tasi ae 11 tausaga o le isi. Na faaalia foi le faanoanoa o le alii faamasino ona o le le amanaiaina e le alii o Iosua fautuaga a nisi o le pasese faapea nisi sa tutu a latou taavale ona o le malosi o tafega.

 

Ua maua foi e le Faamasinoga, e lei oo atu lava se ifoga a le aiga o le ua molia i aiga o teineiti e toalua ua maliliu. E lua moliaga o le fasioti tagata pa’ivalea ua faamaonia faasaga ia Iosua ma ua faasalaina ai nei o ia i le 11 tausaga i le toese ma e 12 tausaga ua se’i ai lona laisene ave taavale lau pasese.

 

FESOASOANI LE EKALESIA MAMONA I AOGA

 

Ua faamanuiaina nei nisi o aoga i totonu o le atunuu i ni meaalofa e faatotogaina ai faleaoga mo le aoaoina lelei o alo ma fanau, e tauala i se fesoasoani mai le Ekalesia a Iesu Keriso o le Au Paia o Aso e Gata Ai i Samoa nei.

 

O le amataga o le vaiaso na tauaaoina atu ai e sui o le ekalesia ia kesi e selau ma nofoa e selau mo aoga tulaga lua i afioaga o Maagiagi ma Vaivase-tai. O nei fesoasoani na talosagaina e komiti aoga faapea alii ma faipule o ia afioaga agai se tasi o vaega fesoasoani a le ekalesia ua loa tausaga o faagasolo mai. O le a faamatuu atu foi lenei fesoasoani e selau kesi, selau nofoa a le Ekalesia Mamona i le aoga tulaga lua a le afioaga o Salelesi lea o lo o aooga atu ai foi alo ma fanau o afioaga o Eva ma Fusi.

 

O lo o i ai foi le faamoemoe e agai atu le faamatuuina atu o ia fesoasoani i le itumalo Aleipata ma le itumalo A’ana, faasolo atu ai i le motu tele i Salafai seia oo atu lava i le faaiuga o le tausaga.

 

SAILIA LE MAFUAAGA O LE MALIU O SE TAMA

 

O lo o talia nei le taotoga faapitoa i le tino maliu o se tama na faaalia e leoleo na maua atu ua maliu i totonu o se taavale i Vaitele i le faaiuga o le vaiaso ua tuanai. Na saunoa le sui sooupu o le Matagaluega o Leoleo ma Falepuipui, le susuga Fauono Talalelei Tapu, o le tama ua maliu e 35 tausaga le matua mai le afioaga o Matautu i Lefaga, ua faaipoipo ma e toatasi lona alo, o se tamaititi e tasi le tausaga le matua.

 

O lo o taua i faamaumauga a leoleo i a latou suesuega i lenei mataupu, o le taeao o le aso Toonai o le vaiaso na tea nei na logoina ai le latou ofisa e nisi o le atunuu e uiga i lea faalavelave. Na faaalia, na maua atu le tino maliu o lea tama i totonu o lana taavale o paka i se vaega o Vaitele.

 

Na maua i suesuega a leoleo le faamanualia o nisi o vaega o le tino o lea tama ma o le taotoga faapitoa o lo o talia nei o le a manino ai le mafuaaga faafomai o lona maliu, lea o le a fesoasoani tele i suesuega a leoleo i le tau tuufaatasia o le mafuaaga o lea faalavelave. E maliu lea tama o lo o faigaluega i se tasi o kamupani i Vaitele.

 

Lilomaiava Andrew Fa’asau, Naenae Productions

Comment Here