TALA MAi SAMOA

UUNAI MALOSI SE FONO MO LE AU FAIPISINISI

 

Ua lipotia mai le uunaia malosi e le alii sui palemia, le tofa Fonotoe Nuafesili Pierre Lauofo, le faavaeina o se fono i tulaga tau pisinisi a Samoa ma Niu Sila ina ia faaleleia atili ai lea auaunaga mo le au faipisinisi mai Samoa nei. O lea tulaga o lo o uunaia e Fonotoe ‘ao auai atu i le Faaaliga o Oloa mai Samoa lea o lo o faagasolo i le vaiaso nei i Aukilani i Niu Sila. Na saunoa Fonotoe, o lea fono o le a fesoasoani tele i le faaleleia o le auaunaga a le malo i tulaga tau fefaatauaiga aua e le gata o le a tele ni avanoa o le a mafai ona maua ai e le au faipisinisi Samoa mo le auina atu o a latou oloa gaosi i fafo, ae o le a mafai ai foi ona fesoasoani i le atinaeina e le gata i le tamaoaiga o Samoa, ae faapea foi o pisinisi lava ia.

 

O le isi itu o lo o uunaia ele sui palemia lea fono, ina ia aveesea ai le tele o pa puipui o lo o taofia ma taotaomia ai taumafaiga a le toatele o le au faipisinisi o lo o taumafai e atinae tulaga tau fefaatauaiga. O lea fono na taua e Fonotoe o le a filifilia ai nao le au faipisinisi e aunoa ma se sui o le malo e aofia ai.

 

OFO LE MALO SAINA E FESOASOANI I AOGA

 

Ua ofo mai le fesoasoani a le malo Saina aua le a’otauina o alo ma fanau o Samoa ma e tauala mai lea fesoasoani i le Matagaluega o Aoga, Taaloga ma Aganuu. Ua malie le malo Saina pe a tusa ai ma fuafuaga, na te totogiina uma meaaoga ma manaomiaga tau api ma tusi e faaaoga i aoaoga a le fanau.

 

Na faaalia e le Faatonusili o Aoga, le afioga Matafeo Falanaipupu Tanielu Aiafi, e faitau miliona tupe a le malo e faaaluina i tausaga taitasi i meaaoga a le fanau, ma e talia ma le agaga faafetai lea ofo a le malo Saina. Na saunoa Matafeo, o seleni a le malo o le a faasaoina ona o lea fesoasoani a Saina, o le a faaaogaina nei e le matagaluega e totogi ai isi o faiaoga faaopopo.

 

O le faafitauli o lo o faafeagai ai ma le matagaluega i le taimi nei o le utiuti o faiaoga aemaise lava mo mataupu taua e pei o le matematika, saienisi ma mataupu faamatata eseese e pei o le faakamuta, palama ma le faimoli i totonu o kolisi. Na faaalia, o lo o mafai foi ona auina mai faiaoga mai Saina pe a moomia e galulue i totonu o kolisi i le aoaoina o ia mataupu. O le fesoasoani a le malo Saina ua ofo mai ai o le a amata faatupeina ai meaaoga a le fanau i le isi kuata aoga o lo o sosoo nei.

 

FAUSIA AOGA FAASEILA I MULINUU

 

O le a amatalia galuega mo le fausia o le nofoaga tutotonu mo aoaoga faaseila a le Iunivesete Aoao o Samoa i se vaega eleele ua maea ona faamautuina mo lea atinae i le peninsula i Mulinuu. O le masina fou o lo o fuafua e amatalia ai lea galuega mo le umi e oo atu i le tausaga ma le valu masina.

 

O lenei nofoaga o le a avea ma se tasi o lala o le Iunivesete Aoao o Samoa ma o le a aofia ai ma le vaega tau mataupu faasaienisi ma le gataifale faapea suesuega faalesiosiomaga. E silia i le to’a 40 tamaiti aoga e mafai ona aoaoina i lea nofoaga pe a maea fausia mo le sailia ai o faailoga tikeri ma luga atu tau mataupu faaseila ma suesuega faalesiosiomaga ma gataifale. O lenei atinae o se tasi o poloketi e tolu o lo o faatupeina e le malo Saina lea e aofia ai le fausia o le aoga o le Loto Taumafai faapea le aoga tulaga lua a le afioaga o Siumu lea e faitau miliona lona tau aofai.

 

O eleele i le taufaasiusiuga i Mulinuu lata ane o le Ofisa o le Vaai Tau o lo o i ai le nofoaga mo lea atinae tele a le Iunivesete Aoao o Samoa.

 

FAAMASINOGA O LEVAOPOLO MA CHRISTINE AINUU

 

Ua amatalia nei i le Faamasinoga Faaitumalo le faamasinoga o lo o suesueina ai tuuaiga faasaga i le alii faipule o le itumalo o Gaga’emauga Numera 2, le afioga Levaopolo Talatonu Vaai, ma le tamaitai faipisinisi o Christine Ainuu, ia o lo o molia i moliaga e sili atu ma le 10.

 

O nei moliaga e fesootai ma le faaseseina o pepa mo le faaulufaleina mai i le atunuu o oloa gaosi mai fafo i totonu o pusa oloa tetele po o container lea sa aumai ai ma fagu uisiki e le faatagaina. E le gata i lea, o le auina atu i tua o lea container i ni auala faasolitulafono e aunoa ma le totogiina atu o ni lafoga i le Ofisa o le Tiute. E lata i le to’a 20 i latou o le a valaauina e molimau e aofia ai nisi o le vaega a le Tiute ma nisi o le Matagaluega o Tupe Maua, atoa ai nisi o malu o le malo faapea nisi o le au faipisinisi.

 

O lo o tetee i laua ua molia i nei moliaga ma e tasi le vaiaso ua fuafua e iloilo ai lea mataupu i le faamasinoga.

 

MALIU INA UA PA’U LE UILA I SE TOFE

 

E 34 tausaga o se alii mai le afioaga o Tiavea na maliu i le vaiaso na tea nei ina ua pa’u lana uila vilivae i se tofe i Tiavea ma maliu ai lava.

 

O lea tulaga na faamautu mai e le sui sooupu o leoleo, le susuga i le komesina lagolago ia Fauono Talalelei Tapu, ma na ia taua ai, sa usu lea alii i lana uila vilivae mo galuega i le taeao o le aso Gafua ae tupu ai loa le faalavelave. O lo o masalomia o le saoasaoa tele o le uila na le mafai ai e lea alii - e galue fa’akamuta -  ona faatonutonu faalelei le alu a le uila, ma tofu ai loa i le tofe. O se taimi o le taeao o le aso Lulu o le vaiaso na tea nei na maua ai le tino maliu o lea alii ma na iloa ai le tele ma le ogaoga o manua i lona ulu.

 

O se tasi lenei o maliu e le o faatonuina ai e leoleo se suesuega e faia i le tino maliu aua o lea ua mautinoa le mafuaaga o lona maliu.

 

Saunia: Lilomaiava Andrew Fa’asau, Naenae Productions

Comment Here