Ads by Google Ads by Google

TALA MAi SAMOA

FILIFILIA LE KAPETENI FOU O LE TOA SAMOA

 

Ua filifilia nei le kapeteni fou o le au o le Toa Samoa ua masii atu nei e tauva i le taamilosaga o le ipu o le lalolagi o le Lakapi Liki i Egelani. Ua faia lea tulaga ina ua faamavae faafuasei le alii kapeteni sa filifilia muamua, le susuga Roy Asotasi, ona e pei ona ia taua, o ni mafuaaga faaleaiga le maalofia, atoa ai ma ni manua laiti sa ia taumafai e fofo ma faaleleia ae lei oo mai le ipu o le lalolagi.

 

I se faaaliga aloaia mai ia Asotasi ananafi, na ia faaalia ai e faapea, ua ia lagona e sili ai pe a nofo, nai lo o le malaga ma le au e o lo o ia iloa e le atoa le 100 pasene o sona sao mo le au. O le le mafai ona auai o le alii o Asotasi o se tasi o faafitauli ua faaopopo nei i tapenaga a le Toa Samoa mo le ipu o le lalolagi, ma na faateteleina ia faaletonu i le latou faiaina i le latou taaloga faasamasamanoa ma le au a le England Knights i le aso ananafi i ai e 52 i le 16. E le gata i lea, e matua faigata le latou taaloga muamua o le ipu o le lalolagi, lea o le a fetaui ai ma le siamupini i le ipu o le lalolagi na sei mavae atu, le Kiwis mai Niu Sila, i le aso 27 o le masina nei.

 

O le alii kapeteni fou o le Toa Samoa, le susuga Harrison Hansen, e sau mai le afioaga o Salamumu, ma o ia o le tama taalo aupito i leva i le au talu mai le 2007, ma o lo o taalo nei o ia i le kalapu o le Wigan Warriors i Egelani. E ui i tulaga ua filifilia ai o ia i le tofi kapeteni, na faaalia e Hansen lona agaga mitamita e taalo mo lona atunuu ma lona aiga.

 

FAUSIA NOFOAGA E GAOSIA AI KASA MAI OTAOTA O MANU

 

O le aso ananafi na faagasolo ai le sauniga mo le amatalia aloaia o galuega i le fausiaina o se nofoaga faapitoa o suesuega faasaienisi i le nofoaga o le Pulega o Tagata Tafafao Maimoa Mai Fafo i Matagialalua. Na sainia ai i lea sauniga se feagaiga i le va o le malo Samoa ma le malo Peretania lea o lo o faatupeina lea galuega, ona asuina ai lea e le alii palemia, le susuga Tuilaepa Sailele Malielegaoi ma le komesina maualuga o Peretania, le susuga Vicki Treadell, le palapala e faailoga ai lea faamoemoe.

 

O le tau o lenei faamoemoe e $22,000 tala Niu Sila ma e faapea foi se nofoaga ua maea ona fausia ma faaaogaina i le afioaga o Piu i Falealili. Na saunoa le tamaitai komesina maualuga o Peretania, o le a aoga lenei nofoaga e faatino ai suesuega ma faataitaiga i le gaosia o ituaiga malosiaga e mafai ona faaauau e aunoa ma le faaleagaina o le siosiomaga.

 

O lea nofoaga ua tuuina ai se masini ua faaigoaina o le biodigester e faaaoga e gaosi ai le kasa e maua mai i otaota manu ma isi otaota e mafai pala, ma o lea kasa e mafai ona faaaoga i ogaumu mo gasesega i aiga. O lea poloketi o le a i lalo o le vaavaaiga a le Matagaluega o Punaoa Faalenatura ma le Siosiomaga.

 

FOAI LE IUNI A EUROPA MO AUAUNAGA LAUTELE 

 

E $888,905 tala le aofaiga o le seleni ua foaia e le Iuni a Europa tauala i le polokalama o le Civil Support Program i lalo o le Faamalu o Faalapotopotoga Tumaoti, i faalapotopotoga tumaoti e tolu e fesoasoani ai i le faatinoina o a latou auaunaga.

 

Mai lea aofaiga, e $300,000 ua faamatuuina atu i le faalapotopotoga o tautua mo e le atoatoa le malosi o le mafaufau, le Goshen Trust Mental Health Services, e faatupe ai le fausia o se maota faapitoa e faatino ai a latou auaunaga, faapea le latou polokalama mo i latou e silia ma le toa 50 o lo o aafia gasegase o le mafaufau ma o latou aiga. O le vaega o le Olemipeka mo i latou e i ai manaoga faapitoa le isi faalapotopotoga na faamanuiaina i le aofaiga e $300,000 e faatupe ai a latou polokalama mo tamaiti ma tagata matutua e i ai manaoga faapitoa ina ia mafai ai ona tauva i ia taaloga faavaomalo.

 

O le faalapotopotoga tumaoti lona tolu ua faamanuiaina o le vaega fesoasoani a le Ekalesia Aso Fitu o le Toe Afio Mai, le Adventist Development and Relief Agency po o le ADRA, lea ua maua le aofaiga e $288,905 e faatupe ai a latou galuega fesoasoani i nuu ma afioaga e aafia i faalavelave faalenatura e galulue vaavaalua ai ma le ofisa faatonutonu o gaioiga i taimi o faalavelave faafuasei ma le Koluse Mumu.

 

E valu afioaga o le a faagasolo ai polokalama a le ADRA e faatupeina i lea fesoasoani. O poloketi uma a nei faalapotopotoga e tolu o le a faagasolo i totonu o le 18 masina i lalo o tuutuuga ua sainia.

 

FAAILOA E LE L.T.A. TULAGA MOOMIA MO TAXI

 

Ua faailoa mai e le Pulega o Felauaiga i le Laueleele nisi o faatulagaga lautele e tatau ona ausia e taavale uma e fia avea ma taavale la’u pasese. O nisi o ia tulaga ua pasia e aofia ai le le faatulagaina o le malosi o afi o ia taavale ina ia amata atu i le 1.5 lita po o le 1,500cc ma luga atu.

 

O le a le toe talia taavale e i lalo ifo o le 1.5 lita le malosi o le afi ma ua faailoa mai foi ituaiga taavale e le toe talia ona avea ma taavale lau pasese po o taxi. O ia ituaiga taavale e aofia ai Getz wagon, Echo wagon, Terio Hatchback, RAV4 hatchback, Suzuki Swift hatchback ma van e 16 nofoa ma luga atu.

 

Peitai na faaalia, o taxi o lo o i ai nei e tu i le itu agavale le foeuli, e mafai lava ona faaauau le avea ma taavale lau pasese seia oo ina ua le toe talafeagai ona toe faaaogaina. Afai e faatau atu i se isi tagata nei taavale, o le a otometi ona faamuta le laisene lau pasese. O nei suiga o le a amata faamamaluina ia Ianuari 1, 2014.

 

Lilomaiava Andrew Fa’asau, Naenae Productions