TALA MAi SAMOA

TOALUA ALII MALILIU PULE I O LA OLA

 

E toalua ni alii na pule i o la soifua i le vaiaso nei. O le aso Lua o le vaiaso nei na pule ai se tama e 40 tausaga mai se afioaga i Savaii i lona ola ina ua ta’u e lona afafine i le fono a tamalii ma failauga o lo latou afioaga, lona faiaiga faamalosi ia te ia. E le o faailoaina mai le auala na pule ai lea alii i lona soifua. Ae na ia faia lea tulaga ina ua maea le fono a le nuu i le aso Lua.

 

Na lipotia mai e faapea, na aami e le fono le teineititi na aafia ma suesue pe faamaonia le mea na tupu ma sa faamatala uma e lea teineititi le faiaiga faamalosi o lona tama ia te ia. Sa faapea ona faate’a e le fono lea tama mai le nuu. Peitai, na maua lona tino maliu i se nofoaga e le mamao mai lona fale. O le aoauli ananafi na tulai mai ai se isi foi faalavelave na pule ai se alii faipisinisi e 40 ma ona tupu tausaga mai Apia i lona soifua.

 

E le o iloa le mafuaaga na ia faia ai lea tulaga, ae sa faaaoga e lea alii se laau malosi e pule ai i lona soifua.

 

TUSI VALAAULIA MAI IA ELISAPETA II O PERETANIA

 

Ua taulimaina e le peresetene o le Faalapotopotoga o le Au Faipisinisi a Samoa, le Samoa Chamber of Commerce, le susuga Namulauulu Sami Leota, se tusi valaaulia mai lana maiesitete le tupu tamaitai o Peretania Tele, Elisapeta le Lua, e auai i se fiafia ma se taumafataga e faia i le maota o le aiga tupu o Peretania i Buckingham Palace i Lonetona, mo le faalauiloaina aloaia o le faaputugatupe faaagaaga e faamanatu ai le 60 tausaga o le nofoaiga a le tupu tamaitai, poo lana Iupeli Taimane.

 

O lea tusi valaaulia ua amanaia aloaia ai le sao a Samoa e ala i ana saoga i lea faaputugatupe, lea na maua i se taumafataga saili seleni na talimalo ai le alii palemia, le susuga Tuilaepa Lupesoliai Sailele Malielegaoi i le masina o Iulai. Na tofia e le afioga i le palemia ia Namulauulu e avea ma sui o Samoa i lea faatasiga taualoa, faapea ai le faatoai i ai o mataupu uma i lea faaputugatupe. Na faaalia le agaga fiafia o Namulauulu i lea faaaloalo maualuga ma na ia faaalia, o se avanoa le aumaua aua e le maua i aso uma se tusi valaalia e asiasi ai i le maota o Buckingham Palace. O le a auai i lea faatasiga taualoa sui mai atunuu e 53 o le Taupulega.

 

MAEA LE FAAALIGA O FAATOAGA MA FAIGAFAIVA

 

O le taeao ananafi na maea aloaia ai le faaaliga o faatoaga ma faigafaiva i Upolu mo lenei tausaga i le laugatogi mo tauvaga eseese sa faagasolo. Na amata lenei faaaliga i le polokalama o totoga niu mo le fanau aoga i le amataga o le vaiaso, sosoo ai ma le tatalaina o lala o le ofisa o faatoaga i nuu ma afioaga i tua i Upolu ma Savaii.

 

O le sauniga e tapunia aloaia ai lenei vaiaso i le taeao ananafi na amata i le sauniga lotu puupuu na taitaia e le Faafeagaiga o le EFKS i Mulinuu, le susuga Talalelei Tuafafo, a o le saunoaga autu na fofogina lea e le minisita o Faatoaga ma Faigafaiva, le afioga Le Mamea Ropati Mualia. Na faamanatu e le afioga i le alii minisita le faanaunautaiga o le malo e toe lalaga le atinae o faatoaga ma faigafaiva, ae e faalagolago ia polokalama uma i le lagolago ma le galulue punouai o le atunuu.

 

AOAOGA O GAIOIGA MO FAALAVELAVE FAAFUASEI

 

O le logologo puialiiina ma le aoaoina o i latou e galulue i le atinae tau tagata tafafao maimoa mai fafo i auala e tali atu ai i ituaiga lapataiga eseese e faatatau i suiga ogaoga o le tau e oo lava i faalavelave faalenatura, o le auga lea o se polokalama faalauiloa na faagasolo i le aso ananafi i le potufono o le faletalimalo o le Millenia Hotel i Sogi.

 

O lea polokalama na tuufaatasia ma faatautaia e le Pulega o Tagata Tafafao Maimoa mai Fafo ma le Ofisa o le Vaai Tau, ma sa faatinoina e le aufaigaluega a le Vaai Tau ni folasaga e faamalamalama ai tulaga uma e ao ona faia pe a faamatuu mai lapataiga eseese mo fesuiaiga ogaoga o le tau ma faasolosolo atu ai lava seia oo i faalavelave matuia faalenatura, e pei o le logoina o le atunuu i se afa. E muamua le fautuaga (advisory), sosoo ai le nofo sauniuni (watch) ona sosoo ai loa lea ma le lapataiga po o le warning.

 

Saunia: Lilomaiava Andrew Fa’asau, Naenae Productions

Comment Here