TALA MAi SAMOA

FAAULUFALE ULUAI MALUMALU EFKS I MULINUU

 

O le aoauli o le aso Tofi na sei mavae atu nei na faaulufale ai le uluai malumalu o le Ekalesia Faapotopotoga Kerisiano i Samoa i Mulinuu, ma na taitaia e le susuga i le Toeaina Faatonu, le susuga Kerisiano Soti le sauniga lotu sa auai taitai o le ekalesia, o le alii palemia ma nisi o minisita o le kapeneta, o aiga, uo ma le mamalu o le au valaaulia.

 

O le masina o Aperila na amata fausia ai lenei galuega sa gafa ma le tofa i le Matua o Faiva o le Falefa o le Aiga Sa Lemalama, le afioga Salapo Faoa Fuimaono, mai le afioaga o Safune. O le tau aofai o lenei galuega e $245,000. Mai lea aofaiga, e $80,000 na nono mai i le Toomaga a le EFKS, $70,000 na nono mai i le faletupe, ae $95,000 na tagi lava i aao o le aulotu e ala i a latou sailiga seleni. Na foaina foi i lea sauniga le meaalofa a le ekalesia aoao o le EFKS e le afioga i le taitaifono o le ekalesia, le susuga i le Toeaina ia Tavita Roma, e $20,000. Sa fofogaina le tala faasolopito o lea aulotu, lea sa amata mai i matafale e iva o tua’a ua lagomau mai i Tia Sa ma e oo mai i le taimi nei ua 13 matafale.

 

Ua atoa i le susuga i le faafeagaiga ua i ai nei, le susuga Talalelei Taau Tuafafo ma le faletua ia Filita’a, le toavalu o faifeau o lea aulotu talu ona faavaeina, ma o le susuga ia Talalelei o le uluai faifeau ua osia se feagaiga ma le ekalesia lenei i Mulinuu, aua sa filifili mai lava e le ekalesia aoao le faafeagaiga mo lea aulotu i tausaga ua mavae. O sauniga lotu foi sa faatautaia lava i le maota o le galuega. O le malumalu fou lenei a le EFKS I Mulinuu e faafesagai tonu lava ma le Maota o Tupulaga Talavou a le EFKS i Mulinuu.

 

SOLO ATOA I LE TOESE I LE FASIOTI TAGATA

 

Ua faasalaina nei i le falepuipui mo le olaga atoa se alii e 27 tausaga le matua mai Nono’a, Saleimoa o Lafaele Taue’etia, ina ua faamaonia lona moliaga o le fasioti tagata faamoemoeina. O lea faasalaga e mafua mai i se faalavelave na tulai mai i le aso 14 o Iuni o le tausaga nei, lea na uma ai le ola o se tamaitai e 27 foi tausaga mai Nono’a, Saleimoa ma Toelau, o Daisy Taue’etia, o le toalua o le ua faasalaina.

 

O lenei mataupu na amata iloiloina i le amataga o le vaiaso nei ma sa tetee le ua faasalaina i lona moliaga. Peitai, ina ua maea ona iloiloina lea mataupu e faatonu e toafa sa filifilia atoa ai ma Faamasino Pierre Slicer, na autasi le latou faaiuga, ua faamalieina uma itu o le tulafono e faamaonia ai le moliaga faasaga ia Lafaele Taue’etia ma faapea ona faasalaina ai loa o ia i le solo atoa i le toese.

 

FAATAUA LE PUIPUIA LELEI O MATA

 

Na faataua i le aso Tofi na sei mavae atu nei i Samoa faapea le lalolagi atoa, le puipuia lelei ma le saogalemu o fofoga po o mata, ma i Samoa sa faagasolo ai se polokalama faapitoa na tuufaatasia e le auaunaga tau le soifua maloloina ma le faalapotopotoga o le Senese. Na faaalia i faamaumauga a le Faalapotopotoga o le Soifua Maloloina o le Lalolagi (W.H.O.), e oo atu i le 285 piliona le aofai o tagata o lo o aafia o latou fofoga, e le gata i le puaoa o le vaai, ae ua faapea ona amata ona po le vaai ma le silasila.

 

O le 80 pasene foi o i latou ua po le vaai o lo o maua i faamaumauga, e mafai ona foia ia faafitauli pe ana vave siaki fofoga. I le sauniga faapitoa na faatinoina e faataua ai lea aso taua, na saunoa ai le minisita o le Soifua Maloloina, le afioga Tuitama Dr. Talalelei Tuitama, i nisi o gasegase o lo o aafia ai fofoga o le atunuu lautele, e le gata i tagata matutua ae faapea foi le fanau. Na faamamafa e le alii minisita le tatau ona siaki o mata o le fanau ina ia mautinoa ai le tulaga o lo o i ai le latou vaai. Fai mai a ia, o se tasi lea o mafuaga ua le lelei ai taumafai a nisi o le fanau i a latou aoaoga, ona o le leiloa o mea o lo o aoaoina ai i latou e faiaoga i luga o laupapa aoga ma api aoga.

 

FAASALA I LE UUMIGA O MARIUANA

 

E 55 tausaga o se tama na faasalaina i le aso Faraile i le 18 masina i le falepuipui ina ua faamaonia e le Faamasinoga Maualuga lona moliaga o le umia o le laau faasaina o le mariuana. O lea alii o Laki Ilalio sa molia muamua foi i le tulafono I moliaga tau fualaau faasaina ma na ia faamaonia i le Faamasinoga e faapea, sa ia faatauina mariuana mo se tupe faasili e tausi ai lona aiga. Na faaalia i faamaumauga a le Faamasinoga e faapea, sa maua e leoleo lea alii ia Aukuso o le tausaga nei o ia ta’aiina ni sikaleti mariuana ma sa maua ia te ia ni sikaleti mariuana ua uma ona ta’ai e 52, sa ia faamoemoe e faatau atu.

 

Na augani atu lea tama i le Faamasinoga mo se isi avanoa e mafuta ai i lana fanau i le Lotu a Tamaiti ma tausi lona aiga. Sa ia faaalia i le Faamasinoga ua ia salamo moni. Peitai na saunoa Faamasino Lesatele Rapi Vaai, ua manino e lei aoaoina lava le mafaufau o lea alii i le lua tausaga lea sa faasala muamua ai o ia i le 2005 mo le moliaga lava lea e tasi. O lea alii sa faigaluega i le Esetete Tausi ma nao ia sa faigaluega i lona aiga. Ua toe faasalaina nei o ia i le 18 masina i le toese.

 

Saunia: Lilomaiava Andrew Fa’asau, Naenae Productions

Comment Here