Ads by Google Ads by Google

TALA MAi SAMOA

FALEPUIPUI LE FAIAOGA I LE FAAOOLIMA MATAGA

 

E fa tausaga ua falepuipui ai nei se alii sa avea ma faiaoga i le aoga maualuga a le itumalo Safata o Sei Tuiletufuga, ina ua faamaonia moliaga e fa faasaga ia te ia e aofia ai moliaga e lua o le faaoolima mataga, tasi le moliaga o le pule le uma ma le moliaga e tasi o le taumafai e faataunuu le faaoogalima mataga.

 

O se faalavelave e pei ona faaalia e le itu a leoleo, na tulai mai i le amataga o le tausaga nei ma na aafia ai ni tamaitai aoga se toatolu. O se tasi o ia teineiti aoga e pei  ona faaalia i faamaumauga a le Faamasinoga, na fai lava si mafana o le la mafutaga ma le ua molia.

 

Na faamalolo e le Matagaluega o Aoga, Taaloga ma Aganuu le ua molia ina ua faatoa alia’e lea mataupu ma oo atu ai i luma o le tulafono. Na faaalia, ua maea ona faaleleia tulaga uma i le lotoifale i totonu o le afioaga na tulai mai ai lea mataupu, faatasi ai ma le aiga o se tasi o teineiti na aafia.

 

Peitai na faaalia e le tamaitai loia o Maiava Visekota Peteru, e lei i ai ni faatoesega i aiga o isi teineiti e toalua na aafia ona ua faate’a le ua molia mai le afioaga. Na finau foi Maiava, ua lagona le salamo moni o le ua molia i le mea ua tupu. Peitai na saunoa Faamasino Pierre Slicer, o le faatuatuaga e le gata o le matagaluega ae faapea foi matua o i latou na aafia, ua le mafai ona toe maua mai lava. Fai mai a ia, o le faasalaina o le ua molia i le falepuipui, o le a avea lea ma feau taua i faiaoga ma le atunuu atoa, e matua le taliaina lava e le Faamasinoga ni soligatulafono matuia faapenei e faia i alo ma fanau aoga. O le ua molia ma ua faafalepuipuiina nei, e fai lona toalua ma e toalua lana fanau.

 

FAAMANATUINA TAUTUA A LE AUFAIGALUEGA A LE MALO

 

O le aso ananafi i Samoa sa atofaina e le malo e faamanatuina ai le sao a tagata faigaluega uma a le malo ma ua faaigoaina o le Public Service Day. Na amata polokalama o le aso i le solo tele a le aufaigaluega a le malo mai le nofoaga o le Ofisa o le Tinei Mu agai mai ai i luma o le maota o le malo i Matagialalua, e faia ai se sauniga faapitoa e amanaia aloaia ai le auaunaga a le aufaigaluega i so o se matagaluega, ofisa ma faalapotopotoga.

 

A maea lea sauniga ona alo atu ai lea o matagaluega ma ofisa eseese e faalauiloa a latou auaunaga i le fanau aoga ma le atunuu lautele, ina ia maua ai se malamalamaaga mo i latou o lo o saili ni galuega. O nei faalauiloa na faatinoina i le maota o Tui Atua Tupua Tamasese Efi i Sogi ma faaiuina ai i se tufatufaga faailoga e aloaia ai i latou ua loa tausaga o la latou tautua.

 

TUUAIA KOMESINA O LEOLEO FAIAIGA MA TAMAITAI PAGOTA

 

O ananafi na faaauau ai iloiloga a le komisi suesue faapitoa ua filifilia e suesueina tuuaiga faasaga i le komesina o leoleo, le afioga Lilomaiava Fou Taioalo ma le pule o le falepuipui, le afioga Sala Seaga Uili Lafaele, ia o lo o faamalolo le tumau mo le fa masina ae maua pea o la totogi.

 

O le tamaitai leoleo sinia o Rosalia Matamu lea o lo o faauluulu i ai le vaega o auaunaga lautele a le matagaluea o leoleo, sa faatalatalanoaina e le komisi suesue i le matafaioi a lana vaega i le taofia o tagata o lo o talia o latou faamasinoga, atoa ai ma le tuuina atu o tagata e taofia I le toese iTafaigata.

 

O isi molimau na faatalatalanoaina e aofia ai ni pagota se toavalu, lea sa latou faailoa ai tuuaiga faasaga i le pule o le falepuipui, faapea faigauo ma faigaaiga a le alii komesina o leoleo ma nisi o tamaitai pagota. O lea tulaga na alia’e foi i le taimi na suesue ai le taitaiulu o le vaega o suesuega faapitoa (Professional Standard Unit), le susuga Seiuli Lene.

 

E pei ona lipotia muamua i a tatou tala, o nei tuuaiga uma na muamua faalauiloa i se tusi sa tusia e se tamaitai leoleo ua faamalolo mai lana galuega i le toese i Tafaigata, i se faaiuga na faia e le komesina o leoleo. Peitai o lo o faaluafesasi pea le komisi suesue i le moni o nei tuuaiga ona o le tamaitai pagota o lo o aafia ai i lenei mataupu e le atoatoa i ai le faatuatuaga ma le talitonuina e le komisi, ona o nisi o faamasinoga sa molimau ai sa maitauina ai le sui so’o o lona mafaufau i ana faamatalaga o mea na tutupu. O lo o faaauau pea ia suesuega a le komisi suesue faapitoa.

 

TETEE LOIA A MAMONA SAMOA I BRISBANE

 

O lo o tetee malosi le tamaitai loia a tagata Samoa o le Ekalesia Mamona I Brisbane, le afioga Leuluaialii Olinda Woodroffe, i lafoga a le peresetene o le itulagi o le Pasefika a le ekalesia, le susuga Elder James Hamula e faapea, e le moni tuuaiga o le faailogalanu ma le solia o aia tatau o tagata Samoa e le uarota a le Ekalesia Mamona i Brisbane, Ausetalia.

 

Na asiasi atu Elder Hamula i Brisbane i le faaiuga o le vaiaso na tea nei ma na ia faaalia i le au tusitala ina ua foi mai i Samoa, e le o faasaina lava le faaaogaina o le gagana Samoa i tapuaiga a le ekalesia i lea itu o Ausetalia. Fai mai a ia, o se faaiuga a le ekalesia na faia i le 2007 ina ia faamaopopo ai tagata lotu o le ekalesia ua ave sese e ia tagata Samoa.

 

Peitai o lo o finau le susuga Leuluaialii, e le faatagaina e le Ekalesia Mamona  Brisbane, Ausetalia le faaaogaina o se isi lava gagana vagana ai le Faaperetania i le taimi o sauniga lotu. Na faaalia e Leuluaialii i le au tusitala i Niu Sila e faapea, o le faaiuga a le Faamasinoga i le 2007 e faamaonia ai lea tulaga ma ua feteenai ai ma lafoga a Elder Hamula i lana feiloaiga ma le au tusitala i Samoa nei i le vaiaso nei. Fai mai a ia, ua latou apiliina lea faaiuga a le Faamasinoga e pei ona faamatalaina i aiaiga o le tulafono o le saolotoga o aia tatau o tagata soifua i Ausetalia.

 

MAUA LE POLOFITI E $2.17 MILIONA TALA A LE UTOS

 

Ua viia e le minisita o Tupe, le afioga Faumuina Tiatia Liuga le Faaputugatupe Teu Faafaigaluega o Mavaega Tausi po o le unit Trust of Samoa (UTOS), ina ua faamauina se polofiti e $2.17 miliona tala mo le tausaga faaletupe lea na faaiuina i le aso 30 o Iuni, 2013.

 

O lea tupe mama faasili na maua mai i le aofai o ana aseta faavae e $20 miliona tala. Na faaalia e le alii minisita, o se tulaga maoa’e ua ausia e le UTOS pe a faatusatusa i lana tupe mama faasili i le tausaga muamua o lona faagaioiga i le 2010, e na o le $3,788. O lena vaitaimi, sa fesoasoani le malo I le tau tapu’eina o lea faaputugatupe e ala i le faaopopoina o ana aseta faavae.

 

Peitai, talu ai le aofaiga maoa’e ua ausia nei i le tupe mama faasili, ua faamutaina nei lea fesoasoani a le malo. O lea tulaga na faalauiloa e Faumuina i le Fono Faaletausaga Lona Tolu a le au fai iunite na usuia i le aso Lulu o le vaiaso nei.

 

O le aofaiga oi latou o lo o umia iunite i le UTOS, e to’a 1,030. Na saunoa le tamaitai ofisa sili o pulega o le UTOS, le susuga Sa’u Fiapa’ipa’i Justina, ua fai si maualuga o le tau o le iunite i le taimi nei e $1.42 pe a faatusatusa i le 97 sene i le taimi muamua na faatau ai iunite ia Setema o le 2010. O le UTOS o se taumafaiga a le malo e uunaia ai avanoa mo tagata lautele i avanoa tau teugatupe e ala I le faavaeina o se teugatupe tausi.

 

Saunia: Lilomaiava Andrew Fa’asau, Naenae Productions