TALA MAi SAMOA

FE’ESEESEAIGA I GAGANA A LE MAMONA

 

O le faatautaia o sauniga lotu I le gagana Samoa ae faaliliuina i le gagana Faaperetania mo i latou e le malamalama i le gagana Samoa, o se tasi lea o auala e iloiloina i le feeseeseaiga tau gagana ua tulai mai i le va o le Ekalesia a Iesu Keriso o le Au Paia o Aso e Gata Ai ma tagata Samoa o lea ekalesia o lo o tetee i Brisbane, Ausetalia.

 

Na faaalia e le peresetene o le itulagi o le Pasefika a le ekalesia, le susuga Elder James J. Hamula e faapea, ua faigata ona faia se fuafuaga a le ekalesia i lea mataupu ona o le aafia ai o le Faamasinoga.

 

“O le mataupu lenei o se mataupu tau le ekalesia ma e tatau foi ona fofoina i se auala tau le ekalesia, ae le o le ave i le Faamasinoga,” o le manatu lea o le susuga Elder Hamula, o se alii loia ae lei tauaveina lona tofiga o lo o i ai nei i le ekalesia.

 

Fai mai a ia, o tuuaiga o le faailoga lanu ma le solia o aia tatau ua faia e tagata Samoa i Brisbane, Ausetalia, ua mafatia ai le ekalesia. O le faaiuga o le vaiaso na te’a nei na malaga ai lea taitai o le ekalesia mamona i Ausetalia e mataitu le faatautaiga o sauniga i aulotu i Brisbane, ma na ia faaalia, e leai lava ni faiga le talafeagai e pei ona tuuaia e le vaega o lo o tetee sa ia vaaia.

 

LE ANO LE MALO I MANAOGA O FAIAOGA

 

Ua tuuaia e le vaega faaupufai o le Tautua Samoa le malo i le le ano i manaoga ma faafitauli o lo o feagai ai ma faiaoga, ona o le tele o suiga ua i ai nei i faatautaiga o aoga i totonu o le atunuu. Na faaalia e le Tautua i se feiloaiga ma le au tusitala e faapea, o le tele o suiga ua i ai nei, e lilifa agai i manaoga o le fanau aoga, ma ua faamalosi atu ai ma faiaoga e avea ma vaega o ia suiga e aunoa ma le iloiloina o aafiaga o ia suiga i faiaoga.

 

Na saunoa le taitai o le Tautua Samoa, le afioga Palusalue Faapo II, i le tulafono ua i ai nei e faasa ai le toe sasaina o le fanau aoga. “Matou te le lagolagoina foi le faaaoga o le sasa o le fanau e avea ma auala o le faasalaga,” o a Palusalue lea. “Peitai, o lea tulaga o le a le fia avea ai nisi ma faiaoga.”

 

Fai mai a ia, o le galuega faafaiaoga o se galuega fita tele, ma o le a ono avea ia pa puipui ma auala ma faasalaga e faasalaina ai faiaoga pe a maua o sasa le fanau ma tulaga e le fia galulue ai nisi i le galuega faafaiaoga.

 

“E tatau lava i le malo ona amanaia le tuga o faafitauli o lo o feagai ai ma faiaoga i le faatinoina o a latou galuega,” o le manatu lea o Palusalue. “E tatau foi i matua ona fesoasoani i le aoaoina o a latou fanau ina ia faamama ai le avega o lo o tauave e faiaoga. O le le maua o lea fesoasoani ua auina atu nei nisi o faiaoga lelei I le Faamasinoga.”

 

TOATOLU TAMAITAI FALEPUIPUI I LE GAOI

 

E toatolu ni tamaitai sa faigaluega i matagaluega a le malo ua faasalaina i le falepuipui i le gaoi ao avea ma tagata faigaluega. Na ioe le tamaitai o Fialogo Lologa, 24 tausaga mai Fasitoo-uta ma Salelologa i le moliaga e tasi o le gaoi ao avea ma tagata faigaluega, mo lona ave faagaoia o le tinoitupe e $3,250. O lea tamaitai sa avea ma kesia i le Matagaluega o Punaona faalenatura ma le Siosiomaga (MNRE), ma o lana galuega o le aoina o tupe mai tagata e oo atu i le matagaluega. Peitai na te lei teuina le tupe sa ia aoina ae sa ia faaaogaina. Sa maua o ia ina ua suesueina e le Matagaluega o Tupe a le malo.

 

O isi tamaitai toalua o Fugalaau Kuini ma Siufofoga Koleni o le Matagaluega o le Soifua Maloloina Lautele (NHS), na molia i moliaga o le gaoi ao avea ma tagata faigaluega. Na faaalia, o le tamaitai o Fugalaau Kuini, 43 tausaga o Vaoala ma Sa’asa’ai o le suetusi sinia (senior accountant) ma ua faasalaina o ia i le tolu ma le afa tausaga i le falepuipui. O le tamaitai o Siufofoga Koleni, 41 tausaga o Vaitele ma Puipaa o le pule lua o le vaega suetusi a le matagaluega, ma ua faasalaina o ia i le 12 masina i le falepuipui.

 

Na faaalia i faamaumauga a le Faamasinoga e faapea, o le galuega a Kuini e fai o le faalisiti o peimeni a tagata e fai atu i le matagaluega ma teu le tupe i le faaputugatupe a le matagaluega. Peitai, sa ia faaaogaina ia tupe ma e umi se taimi o ia faia lea solitulafono. E 290 moliaga o le gaoi na molia ai o ia.

 

O Koleni sa gafa ma le aoina o tupe a le matagaluega mai ona ofisa i Upolu ma Savaii ma teu i le faletupe. Na te lei faia foi lea tulaga ae sa ia faaaogaina tupe a le matagaluega. Sa ia talosagaina foi se tupe mai ia Kuini ma e $2,400 le tupe sa tuuina i ai e Kuini. E $59,680.50 le tinoitupe atoa a le matagaluega na gaoi e i laua.

 

MALAE MA SE FALE KOLENI EKALESIA METOTISI

 

O le fausia o se malae taalo e siomia i fale matamata tetele (stadium) ma se fale koleni (gym) o lo o aofia ai i fuafuaga o lo o soalaupuleina i se fono faaletausaga a taitai o autalavou a le Ekalesia Metotisi na amatalia i le aso Lulu na te’a nei i Faleula. Na faaalia e se tasi o le au usufono, o le autu o le fono i lenei tausaga e taulai i le atinaeina o se nofoaga tutotonu mo autalavou a le ekalesia, atoa ai ma le atinaeina o tupulaga o le ekalesia mo le lumanai.

 

E lei mafai ona maua mai se tau aofai o le malae taalo o lo o fuafua e fausia, ae afai e taunuu lea fuafuaga, e le taumate o le a oo i se fuainumera tele e pei o le Malumalu Uesile lea na faaulufaleina i le tausaga na tea nei. O lea galuega tele na fuafua e fa’aalu ai le tinoitupe e $4 miliona tala, peitai e uma ifo le galuega ua oo atu i le $7 miliona tala.

 

LEAI NI MOLIAGA FAASAGA I LE AVE LOLI

 

E leai ni moliaga o le a molia ai le ave loli o le loli lea na fetoai ma le van sa malaga ai le auso e toatolu ma le latou tuafafine lea na maliliu i le faalavelave i Lalomanu. Na faaalia e Komesina le tumau ia Fauono Talalelei Tapu e faapea, e leai ni molimau e lagolago ai le faaulu o ni moliaga faasaga i lea alii ave loli.

 

“O le faamatalaga a le ave loli e faapea, ina ua ia oo atu i luga o le auala, sa alu atu sa’o lava le van ma fetoai ma lana loli i le itu o le auala sa ia malaga ai,” o le saunoaga lea a Fauono. E lei maua foi e leoleo i a latou suesuega i le nofoaga na tupu ai le faalavelave, ni molimau vaaia e faaleaoga ai le faamatalaga a le ave loli.

 

O se faalavelave aupito i tuga lea ua tulai mai i totonu o le atunuu, e pei ona lipotia muamua i a tatou tala, ma o le a faia se iloiloga aloaia (inquest) e suesue ai le tulaga moni lava na tupu, i se aso o le a faailoa mai e pei ona faaalia e Fauono. O le iloiloga aloaia (inquest) o se iloiloga e tutusa lona malosiaga ma le Faamasinoga. O lo o faagasolo manuia pea le tamaitai lona lima na aafia i lea faalavelave ma na o ia foi na mafai ona faasaoina mai ai.

 

Saunia: Lilomaiava Andrew Fa’asau, Naenae Productions

Comment Here