MALIU INA UA TANUMIA I SE PASI SA GALUE AI I LALO

Na o le fa aso na faigaluega ai se alii e 19 tausaga mai Vaiusu i lana galuega fou i se fale inisinia, ae tanumia i se pasi sa ia galue ai i lalo ina ua see le siaki sa te’e ai i luga, ma solofa ane loa i luga o lea alii. Sa paka lea pasi i se nofoaga maupu’epu’e i talaane o le fale inisinia.

Sa auina atu loa lea alii o Folitau Te’o i le falemai mo togafitiga, peitai, sa le mafai e fomai ona faia se gaioiga e faasao ai lona soifua, ona ua tuga tele ona manua ma ua aafia ai ona totoga. O lea faalavelave na tupu i le aso Lulu na te’a nei, ae o le kuata e te’a ai le tolu i le vaveao o le aso Tofi na tape ai loa e fomai ia masini sa faamanava ai o ia ona ua leai se togafiti e mafai i ai.  

FAUTUAINA LEOLEO LE MATAALA MAI TAGATA AMIO LEAGA

O ni faaoogalima tau feusuaiga na aafia ai ni tamaiti laiti se toalua ua fautuaina malosi ai e leoleo ia matua ina ia mataala ma vaai lelei alo ma fanau laiti, ina ia puipuia ai mai tagata amio leaga latou te faia amioga mataga tau feusuaiga i tamaiti laiti. O le amataga o le masina nei na faia ai e se alii e 22 tausaga le matua sa faasua’ava, ni amioga mataga tau feusuaiga i se tamaititi e 7 tausaga.

O lea solitulafono na tulai mai i le po i le nuu e aumau umaai i laua. Na lipotia mai foi se isi foi faalavelave faapea i se isi nuu lea na maua ai se alii e 54 tausaga le matua o ia faia ni amioga mataga tau feusuaiga i se tamaiti e 14 tausaga. Na faaalia e le komesina le tumau o leoleo, le afioga Fauono Talalelei Tapu, ua taofia nei e leoleo i laua na faia ia amioga mataga e faatali ai le taimi e tulai ai i le Faamasinoga e tali i moliaga o le faia o amioga mataga tau feusuaiga ma le faia o faiga faasotoma.

AVEA MA KOLISI LE AOGA FAAITUMALO SAGAGA

Ua momoli le faamalo ma le faafetai a le malo i le pule mamalu a alii ma faipule, o le asosi a matua ma faiaoga, faapea le komiti o le aoga a Sagaga i Tuanai, i le faamanatuina aloaia o le atoaga o le 50 tausaga talu ona faavaeina lea aoga ma le faamoemoe o le a fausia ai se faleaoga fou, atoa ai ma le siitia o le tulaga o lea aoga e avea ma kolisi.

Na saunoa le alii palemia, le susuga iaTuilaepa Lupesoliai Sailele Malielegaoi, o le agaga o le malo, ina ia siitia le aofai o kolisi a le malo i le 25 ma ia laugatasia uma aoga i faiaoga lelei e le gata i tama fanau a le atunuu ua i’u mai ma faailoga, ae faapea foi i faiaoga mai fafo. O lea tulaga ua faia ina ia nofo ai lava le tama ma le teine i autafa o lona tama ma lona tina ma fai ana meaaoga, nai lo o le tau malaga i aiga i Apia e nofoaoga ai aua e le o iloa atu e matua a latou mea o fai. “Nei tuu atu e aooga ae leiloa o lo o tataa solo i le taulaga ae le o i le aoga,” o le saunoaga lea a Tuilaepa.

FALEPUIPUI MO LE LUA TAUSAGA

Na teena e le afioga i le tamaitai faamasino o le Faamasinoga Faaitumalo, le susuga Mata Tuatagaloa, le talosaga a le tamaitai loia o lo o tulai mo le alii o Charile Tavita lea ua faasalaina nei i le lua tausaga i le falepuipui, i le maea ai o le mataupu ua faamaonia ai le moliaga faasaga ia te ia e tusa ai ma se solitulafono tele sa latou faatinoina ma nisi ua molia.

O lea solitulafono e pei ona lipotia muamua i a tatou tala, o le gaoiga lea o taavale e lima, sui o latou vali atoa ai ma afi, ma le faamoemoe e toe faatau atu ina ia maua ai se tupe faasili. O le talosaga a le alii o Charlie Tavita e faapea, na ia auai i lea solitulafono ona o lona fesoasoani i lana uo ae e lei i ai se faamoemoe ia te ia na te faia lea solitulafono. Peitai na saunoa Faamasino Mata Tuatagaloa, e faatolu ona ia auai i lea gaioiga ma o le tasi o taavale sa latou gaoia na maua atu ua faaaoga e le aiga o lona toalua, ma e le o foliga o se tagata sa fesoasoani ae leai sona faamoemoe e auai i lea soligatulafono.

Saunia: Lilomaiava Andrew Fa’asau, Naenae Productions