TALA MAi SAMOA

FUAFUA GALUEGA TOE FAALELEIA I LE MAOTA O LE IOANE VILIAMU

 

Ua a’e nei se tofa i le pulega o le Ekalesia Faapotopotoga Kerisiano i Samoa ina ia faatinoina ni galuega toe faaleleia i le maota fogafaleono a le ekalesia, po o le maota o le Ioane Viliamu i Tamaligi. O le tau aofai o lea galuega e tusa ma le $3 miliona tala ma ua maea faamaonia le konekarate mo le faatupega o lea faamoemoe e le komiti o tupe a le ekalesia.

 

Ua faaalia e le taitaifono o le komiti o tupe a le EFKS, o ia foi o le minsita o Faatoaga ma Faigafaiva, le afioga Le Mamea Ropati Mualia, le maea filifilia ai foi o le konekarate o le a gafa ma le faatinoina o ia galuega toe faaleleia i le maota o le Ioane Viliamu ma le faamoemoe e tatau ona amatalia galuega i nai vaiaso o muamua. Na faaalia foi e le afioga i le taitaifono le naunautaiga ia maua nisi tagata ma ni pisinisi fou e faaopopo i le lisiina o potu o lea maota.

 

O le fuafuaga o lo o i ai, o le a le tapunia le Ioane Viliamu i le taimi o galuega toe faaleleia ma o lo o faamoemoe e tatau ona maea le vaega muamua o ia galuega ae lei toe usuia le Fonotele a le ekalesia i le tausaga fou.

 

MALAGA LE ALII PALEMIA I LE FONOTELE A MALO AUFAATASI

 

Ua malaga atu le alii palemia, le susuga Tuilaepa Lupesoliai Sailele Malielegaoi mo le fonotele lona 68 a Malo Aufaatasi e faia i lona nofoaga tutotonu i Niu Ioka mai le amataga o le vaiaso fou seia maea i le aso 29 o le masina nei.

 

O lea fonotele o le a usuia ai se fonotaga faapitoa e taloina e le failautusi aoao o Malo Aufaatasi e faia i le aso 23 o Setema, e faamalosia ai le ausia o fuafuaga mo atinae o le meleniuma, atoa ai ma le fono i le aso 25 e faamautu ai nisi o tapenaga mo le a Malo Aufaatasi mo atumotu laiti o le lalolagi lea e usuia mai i Samoa i le taimi faapenei o le tausaga fou. O le fono i le aso 23 o le masina nei, o le a auai ai le afioga i le alii palemia o se tasi e faatautaia lea fonotaga, ae o le a ia saunoa i le fonotele a Malo Aufaatasi i le aso 27 o le masina nei po o le aso Faraile o le vaiaso fou.

 

O le a auai foi le alii palemia i le fono a minisita o le Va i Fafo a malo o le Taupulega e faia i Niu Ioka i lea lava taimi. O lo o malaga faatasi le alii palemia ma nisi o sui o le malo e aofia ai le minisita lagolago o le Matagaluega o le Palemia ma le Kapeneta, le afioga ia Tafua Maluelue Tafua faapea le ofisa sili o le Matagaluega o le Va i Fafo, le afioga Aiono Mose Sua.

 

TUMAU PEA FAALETONU I LE SUAVAI MO LE KOLISI O A’ANA

 

E tasi le vaiaso na tapunia ai le Kolisi a A’ana Numera 2 i le itumalo Aiga i le Tai i le faatonuga a le Matagaluega o Aoga, Taaloga ma Aganuu ona o le tulaga faaletonu o le suavai. Na faatonuina e le ofisa sili o pulega o le Matagaluega o Aoga, Taaloga ma Aganuu, le afioga Matafeo Falanaipupu Tanielu Aiafi, le tapunia o lea kolisi ina ua maua i se asiasiga a sui o le matagaluega i le vaiaso talu ai le tulaga faaletonu e le gata i le suavai ae faapea foi fale le taua, e le talafeagai mo le soifua maloloina o alo ma fanau aoga.

 

Ua atoa nei la le vaiaso talu ona toe amata aoaoga a le fanau ina ua maea ona toe faaleleia ia faaletonu. Peitai na faitio le alii pule aoga, le susuga Masuisui Vave, ona o le tulaga faaletonu pea o lo o i ai le latou suavai. O le aso Lulu na sei mavae atu nei na oo atu ai sui o le Pulega o le Suavai ma faamautu ai le tulaga faaletonu pea o le suavai i totonu o le kolisi. Na saunoa le pule aoga, ua maea ona tuuina atu le latou lipoti ma o lo o faamoemoe e toe faaleleia lea faafitauli i se taimi lata mai.

 

O lea mataupu na fetusia’i ai le pule aoga ma le Pulega o le Suavai i luga o nisi o nusipepa i totonu o le atunuu ma na faailoa e le alii pule aoga, e le o ni faitioga na fatu e le latou kolisi ae o le tulaga lea na mafua ai ona tapunia le latou kolisi mo le vaiaso atoa ona o se faafitauli ua leva ona feagai ai ma le aoga. Fai mai a ia, ua loa tausaga o fesoasoani atu le Ofisa Tinei Mu i le saunia o le suavai mama mo le latou aoga ma na maua foi se fesoasoani mo i latou ona o le tetele o timuga lea na maua ai a latou suavai i a latou tanevai.

 

POPOLE LE MATAGALUEGA SOIFUA MALOLOINA I MEAAI LE TALAFEAGAI

 

Ua faaalia atugaluga o le Matagaluega o le Soifua Maloloina ona o le tele o faleoloa ma supamaketi i totonu o le atunuu e le o usitaia tulafono tau le soifua manuia e faasino lea i oloa o lo o latou faatauina atu i le atunuu lautele. Na faaalia i se pepa o faamatalaga mai le matagaluega e faapea, na maitauina i se latou asiasiga na faatautaia i le masina nei, o le 31% o faleoloa tetele ma supamaketi i totonu o le atunuu o lo o faatauina atu i tua meaai pepe e le saogalemu e aofia ai apa susu, fagu ma apa meaai, meainu ma fagu susu.

 

O le tele o oloa o lo o faatauina e le saogalemu ona ua uma le aoga pe ua pasia le aso faatulagaina e tatau ai ona faaaoga. Na faaalia foi, o le tele o ia faleoloa ma supamaketi o lo o latou faatauina atu pea i le atunuu lautele apa susu atoa ai ma apa meaai pepe e omoomo ma eleelea, ao isi ua faatauina atu ua le talafeagai mo le fofoga taumafa mo se tau taugofie ina ia faatosina ai tagata faatau.

 

Ua fautuaina e le Matagaluega o le Soifua Maloloina ia matua ina ia siaki faalelei muamua ia meaai ma apa susu mo le fafagaina o pepe po o talafeagai ma lelei mo le soifua maloloina ma e lei pasi foi le aso e tatau ona faaaogaina ai.

 

Saunia: Lilomaiava Andrew Fa’asau, Naenae Productions

Comment Here