TUSI LE PALEMIA  I LE PULEGA O LE EKALESIA MAMONA

O le amataga o le vaiaso nei na asiasi atu ai sui e to’avalu o le Ekalesia a Iesu Keriso o le Au Paia o Aso e Gata Ai mai Brisbane  i Ausetalia  i le alii palemia, le susuga Tuilaepa Lupesoliai Sailele Malielegaoi, e tapa lana fesoasoani  i le feeseeseaiga ua vaeluaina ai le latou aulotu  i Brisbane ona o le faasaina ona faaaogaina o le gagana Samoa  i a latou tapuaiga.

Na taitaia le savali a sui o lea ekalesia e le latou loia, le tamaitai loia o Leuluaialii Olinda Woodroffe ma na ia faaalia  i le au tusitala e faapea, ua talia e le alii palemia le latou talosaga ma o le tusi o ia  i le pulega o le ekalesia  i Brisbane ma Utah. Na faaalia e nisi o sui o lea ekalesia  i le au tusitala e faapea, o tagata Samoa ma tagata Toga  i Brisbane o lo o fitoitonu  i ai lea tapu a taitai o le ekalesia  i Brisbane ona o le mananao e latou e auai  i aulotu po o uarota a tagata palagi e tau faatumu ai ia uarota. Fai mai lea tamaitai, ua faaalia e le pulega o lea uarota, e lelei foi lea e a’oa’o ai le latou nanu.

Peitai na ia faaalia, o latou e ala ona o  i le lotu o le fia tapuai  i le Atua ae le o le fia aoaoina o le latou fenanui. Na saunoa le taitai o le malo, le susuga Tuilaepa nofoaga tutotonu o le ekalesia  i Utah e faatatau  i lea mataupu ma faamamafa  i ai le taua o le gagana Samoa  i tagata Samoa. O lo o talia pea se tali o ia tusi a le alii palemia.

SELESELEINA LE ANIANI  I SAMOA

Ua faamanuiaina taumafaiga a se alii Samoa ua leva tausaga o ia suesueina ituaiga aniani eseese ina ia maua ai le ituaiga e talafeagai ma le eleele faapea le tau o Samoa. Na faaalia e le susuga Arona Palamo  i le au tusitala e faapea, mai le 34 ituaiga eseese o aniani sa ia suesueina mo lea faamoemoe, e laititi lava le fuainumera o aniani e mafai ona ola lelei  i Samoa ma o le vaiaso nei na ia seleseleina ai ia aniani sa ia totoina.

Fai mai a ia, e le faigata ona toto le aniani ma e le tatau ona tau faailoaina lea taumafa e manaomia e so o se tagata  i gasesega  i aso uma lava. O lea tulaga e atagia  i le tele o tone o le aniani e faaulufaleina mai  i le atunuu e le au faipisinisi. “E faitau miliona tala le tupe o le a mafai ona faasao e Samoa pe a toto lava e tatou ia a tatou aniani,” o le saunoaga lea a Arona Palamo. Na ia faaalia, ua toatele nisi o fai pisinisi  i Samoa ua faatoai atu a latou oka ia te ia, ae e le manao o ia e faatau ana aniani ua maua  i lana seleselega muamua ona o lea faatoa tino mai ana galuega ma suesuega ua leva tausaga o ia feagai ai.

O aniani ua seleseleina nei na totoina  i le amataga o le masina o Iuni o le tausaga nei ma na taua e lea alii faifaatoaga, e le o toe mamao se taimi ona selesele foi lea o isi ana aniani sa totoina  i le isi ona fanua  i le afioaga o Savaia. Na ia faaalia, e tatau ona toatele tagata e fiafia e faatinoina lea atinae aua e silia ma le 200,000 aniani e mafai ona ola lelei  i totonu o le fanua e afa eka lona tele, faatusatusa  i le aofai o talo e mafai ona toto ma ola lelei  i totonu o le fanua e faapea foi le tele.

FALEPUIPUI  I LE GAOI O TEUGATUPE MAI FAFO AO FAIGALUEGA  I LE WESTPAC

Ua faamaonia moliaga e tolu o le gaoi ao avea ma tagata faigaluega faasaga  i se alii sa faigaluega  i le faletupe o le Westpac, ma ua faasalaina nei o ia  i le 13 masina  i le falepuipui.

Na faamatalaina e le afioga Faamasino Sili Patu Tiavaasue Falefatu Sapolu le solitulafono a le ua molia o le gaoia lea o tupe  i teugatupe a tagata o lo o alala  i fafo, o se lona le amanaiaina o le faatuatuaga ua tuuina atu ia te ia e le pulega o le faletupe. Na faaalia  i faamaumauga a le Faamasinoga e faapea, na fauu mai le ua molia, o Ulavale Vai Tupuola mai le USP  i Alafua ma le tipiloma o mataupu tau su’etusi, ma sa faigaluega ai loa o ia  i lana galuega muamua  i le faletupe o le Westpac.

Sa faigaluega o ia  i le faia o teugatupe fou mo tagata faatoa teu a latou tupe  i lea faletupe. Na faaalia, e faatolu ona tala e Tupuola tupe mai teugatupe a tagata o lo o alala  i fafo e ala  i lona faia o ni saini taufaasese  i pepa tala tupe. O le aso 31 o Iuni, 2012 sa ia talaina ai le $4,000, ae o le faalua ma le faatolu na tutupu  i le aso 20 ma le 28 o Mati, 2013 ma e $4,578.71 le aofaiga o le tinoitupe na ia talaina. Na faaalia foi  i faamaumauga a le Faamasinoga, o le masina o Aperila e oo  i le masina o Me o le tausaga nei, na asiasi mai ai tagata e ona ia teugatupe  i Samoa ma faaulu ai ni tagi ona o le toesea o tupe mai a latou teugatupe e aunoa ma se faatagaga. Sa faatautaia loa se suesuega a le faletupe ma maua ai le ua molia.

AINA ATU  I LE PALEMIA SE TUSI O TUUAIGA FAASAGA  I LE KOMESINA O FAIGA PALOTA

O se tusi na tusia e se tasi e lei faailoaina lona suafa o lo o taua ai tuuaiga  i faiga pi’opi’o faasaga  i le Komesina o le Ofisa o Faiga Palota, le afioga Papalii Malietau Malietoa o lo o faatuatusi ma auina atu  i le alii palemia, le susuga Tuilaepa Lupesoliai Sailele Malielegaoi.

Sa faapea ona tuuina atu loa e le alii palemia lea tusi  i le Komisi e pulea tagata faigaluega a le malo, le PSC. O lea tulaga na faamaonia e le taitaifono o le PSC, le susuga Tuu’u Dr. Ieti Taulealo ma na ia faaalia, ua suesueina nei ia tuuaiga. Fai mai a ia, o lo o faagasolo foi gaioiga e pei ona masani ai le komisi  i mataupu faapenei. “E faapea foi le tulaga na tulai mai  i ni masina ua tuanai lea na tusi mai ai foi se tagata e lei faailoaina mai lona suafa ma ia faailoaina mai ai ni tuuaiga o faiga le talafeagai faasaga  i le ofisa sili o pulega o le Matagaluega o Faamasinoga,” o le saunoaga lea a Tuu’u. “O le tusi aupito  i lata mai la lenei ua matou taulimaina nei, o lo o tuuaia ai e se tasi e le o faailoaina mai lona suafa ia le komesina o faiga palota  i ni faiga le talafeagai  i le lotoifale lava o le ofisa.”

Na fesiligia le alii taitaifono pe o  i ai ni atugaluga o le komisi  i le faatupulaia o tusi e tusia e tagata e le faailoaina o latou suafa o lo o taua ai tuuaiga  i faiga le talafeagai faasaga  i sui sinia o matagaluega ma ofisa a le malo. Na tali Tuu’u, o lo o tele atugaluga a le latou komisi  i lenei mataupu, ae o le itu lelei, ua toatele  i latou ua tusi atu ma faailoa atu ia faiga le amioga le amiotonu.

Saunia: Lilomaiava Andrew Fa’asau, Naenae Productions