TALA MAi SAMOA

FAUTUAINA LE EKALESIA LMS TOE FUATAINA INA IA TOE SUIA LE IGOA

 

Ua faailoa mai e le Fono a Ekalesia Soofaatasi a le atunuu le fautuaina o le Ekalesia LMS Toe Fuataina ina ia toe suia le igoa o le latou ekalesia, ona o le faasea a le Ekalesia Faapotopotoga Kerisiano i Samoa (EFKS) i lo latou faaaogaina o le igoa LMS lea sa muai faaigoaina ai le EFKS ina ua faatoa taunuu mai le Tala Lelei i Samoa.

 

O le aso Tofi na sei mavae atu nei sa faia ai se feiloaiga a le Fono a Ekalesia Soofaatasi a Samoa ma feiloai ai ma sui o lea ekalesia, o le LMS Toe Fuataina.

 

TULAI NI ALI’I AOGA I LUMA O LE FA’AMASINOGA

 

E to’a 12 ni tama aoga mai Kolisi o Avele ma Maluafou na molia i le tulafono ona o se feeseeseaiga i lo latou va lea na tulai mai i le nofoaga faatali pasi i le fili maketi i Savalalo, na tutulai i luma o le Faamsinoga Faaitumalo ma ua ioe i latou e toafa i moliaga faasaga ia i latou e aofia ia le tau’ai maa,  faaaupegaina ma le faamisa i nofoaga faitele.

 

O le aso 3 o Oketopa ua toe tolopo i ai le latou mataupu mo se faaiuga a le Faamasinoga. O le isi toavalu o i latou o lo teena ia moliaga faasaga ia i latou.

 

TOE APILI E AGAFILI TUITOLOVAA FAAIUGA FA’AMASINOGA

 

Ua amatalia i luma o le Faamasinoga Maualuga le fofogaina o molimau ma le iloiloina o le mataupu o lo o faaulu ai le tagi a le susuga Agafili Laau Tuitolovaa, ina ia toe iloilo le faaiuga a le Faamasinoga o Apili a le Faamasinoga o Fanua ma Suafa, faasaga i le mataupu o fanua lea ua suia ai le pule o le fanua o Vaipaepae i Salailua o lo o faaaogaina e le Ekalesia Metotisi mo le fausia ma le faateleina o la latou malumalu atoa ai ma le maota o le galuega.

 

Na faailoa i luma o le Faamasinoga e le alii loia o Toleafoa Solomona Toailoa lea o lo o tulai mo le o lo o tagi e faapea, o lo o tetee le Agafili Laau Tuitolovaa i le faaiuga a le Faamasinoga i le 2011 ona o le sese o le tulaga o lo o faavae ai lea faaiuga i le fanua lava lea o Vaipaepae i Salailua.

 

TO’ALIMA PULE AOGA UA FAATE’A

 

E to’alima pule aoga na tuuaia i le faaaoga sese o tupe a le Ofisa o Aoga ua faate’a aloaia mai le vaega o auaunaga lautele a le malo.

 

O lea tulaga na faamaonia e le ofisa sili o pulega o le Matagaluega o Aoga, Taaloga ma Aganuu, le susuga Matafeo Falanaipupu Tanielu Aiafi, ma na ia taua, ua faia le faaiuga a le matagaluega o le a le tuliloaina lea mataupu i le tulafono. “Ua uma ona toe totogi mai e i latou ia le aofaiga atoa o tupe sa latou faaaogaina, ma ua faate’a mai a latou galuega,” o le faamalamalamaga lea a Matafeo.

 

“O le a le maua foi e i latou ia faamanuiaga semanu latou te maua ona o le umi o le latou tautua i le malo ma ia te a’u lava ia, ua lava lena faasalaga mo latou i lo o le toe ave i leoleo ma le Faamasinoga.”

 

SALA TUPE LE AVEPASI O LE PASI A SIUMU

 

O le alii avepasi o le pasi a Siumu lea sa faafoeina le pasi ina ua leai ni taofi ma maliu ai se alii sa i totonu o le pasi ina ua oso ese o ia mai le pasi, sa tulai i luma o le Faamasinoga Faaitumalo i le aso Faraile na sei mavae atu nei, ma na laki o ia ina ua le mamafa sona faasalaga. Na molia lea alii o Lolesio Fiamatai, 37 tausaga, i le ave taavale faatamala ua mafua ai le maliu o se isi.

 

E pei ona lipotia muamua i a tatou tala, o lea faalavelave na tulai mai i le aso 29 o iulai, 2013 ina ua leaga taofi o le pasi o le Queen Patsy ao malaga atu mai Siumu i Tiavi. Sa faapea loa ona vili mai le avepasi i le e ona le pasi ma sa faatonuina o ia e toe foi atu. Sa nonofo uma loa le pasese i lea nofoaga seia vagana ai le alii na maliu, sa toe fo’i o ia ma le avepasi.

 

Lilomaiava Andrew Fa’asau, Naenae Productions

Comment Here