Ads by Google Ads by Google

TALA MAi SAMOA

LULUINA SAMOA MAFUI’E 5.8 LE MALOSI

 

E 5.8 le malosi o le mafui’e na luluina ai le Atu Samoa i le pe a ma le ta o le iva i le taeao ananafi.

 

Na faateia le atunuu lautele ina ua lulu lea mafui’e, ma na lipotia mai e le ofisa vaai tau faavaomalo a Amerika i Hawaii e faapea, o le ogatotonugalemu o lea mafui’e e 257 kilomita i sauté i sisifo o Apia i le loloto e 39 kilomita.

 

Na faamatuu mai se lapataiga o se sunami ina ua maea lea mafui’e ma sa faapea ona vave tuua uma ai aoga.

 

Na lipotia mai foi le faalogoina o lea mafui’e i Amerika Samoa.

 

FIAFIA AIGA SOGI I O LATOU FANUA FOU I FALELAUNIU

 

Ua faaalia le fiafia o aiga sa aumau i Sogi a ua alala ni i fanua ua saunia e le malo i Falelauniu e faafesuiai ai ma o latou fanua i Sogi, ina ua mafai nei ona toto a latou mea toto ma atinae ai o latou aiga i fanua fou i Falelauniu. Na faaalia e se tasi o tina, e moni o o latou fanua i Sogi o fanua na tuu atu e o latou matua ma tua’a ua lagomau mai Tia Sa, ae e pumoomoo ma o lana vaai i ai, e leai se lumanai o lona aiga e maua ai aua e le mafai ona toto ai ni mea toto toe le lava le fanua e atinae ai o latou aiga.

 

“Ou te faafetai lava i le malo ma le tofa ua a’e ua faafesuiai ai o matou fanua i Sogi ma fanua ua matou i ai ne ii Falelauniu, ona ua mafai ai ona atinae o matou aiga,” o le saunoaga lea a lea tina. Fai mai a ia, ua fai foi le faleoloa a lana fanau i le nofoaga ua latou i ai nei. O lenei fuafuaga a le malo ua faafesuiai ai fanua i Falelauniu ma aiga o lo o alala i Sogi atoa ai ma le tinoitupe e tai $3,000 e fesoasoani i le fausia o o latou maota ma laoa.

 

 

FAATOA FAAFOI LEOLEO LAAU MALOSI A SE ALII FAIPULE INA UA TUANA’I LE TELE O MASINA

 

Ua faatoa toe faafoi e leoleo le laau malosi a se alii faipule sa tuuina atu e laisene, i le mavae ai o masina e tele. Na lipotia mai e faapea, na tuina atu e le alii faipule o le itumalo Vaisigano Numera 2, le afioga Motuopuaa Aisoli Vaai, lana laau malosi i le Ofisa o Leoleo ina ia laiseneina ae lei tulai mai le afa o Eveni ia Tesema o le tausaga na tea nei. Peitai na faaalia e le afioga Motupuaa, o se tasi o taimi sa ia fesiligia ai le ofisa i lana laau malosi, sa logoina o ia e faapea ua leiloa.

 

O le amataga o le masina na tea nei, na faaalia ai e Motuopuaa sa logoina o ia e leoleo, e tatau ona faataitai muamua lea laau malosi faatoa mafai ai ona toe faafoi atu. Peitai o le aso Lulu na sei mavae atu nei na logoina ai e Komesina Lilomaiava Fou Taioalo le au tusitala e faapea, ua toe faafoi atu nei lea laau malosi i le afioga i le alii faipule.

 

FUAFUA LE SU A LE AIGA O SE ALII NA MALIU I LE TOESE

 

O lo o fuafua le su a le aiga o se ali e le atoatoa le malosi o le mafaufau, o Perry Gam Tuilaepa, lea na maliu ao taofia i le toese i le pe a ma le lua tausaga talu ai. Na faaalia e le tamaitai loia o Leulua’ialii Olinda Woodroffe e faapea, ua faatonuina o ia e le aiga o lea alii e toe Iloilo totoa le faaiuga o lea mataupu o lo o taua ai e faapea na maliu o ia ina ua pule i lona ola e ala i le sisiina o lona ua, ma mataitu nisi auala i le tulafono e ono faaulu ai sa latou su.

 

Na saunoa Leulua’ialii, e tele maga o le tulafono e mafai ona faaaogaina e faaulu ai lea su e aofia ai le toe apili o le faaiuga na faia, ma le faulu o se tagi i faiga le talafeagai sa faia i lea alii e le atoatoa le malosi o le mafaufau i le taimi sa taofia ai o ia i le toese ae lei maliu o ia. E lei mafai ona ia saunoa auiliili ii a tulaga ona o lo o ia talia faamaumauga na ia talosagaina mai le aiga.

 

IOE TOALUA O PAGOTA NA SOSOLA AE MANAO LE TOATASI I SANA LOIA

 

Ua ioe le toalua o pagota e toatolu na sosola mai le toese i Tafaigata i le masina na tea nei i moliaga faaopopo faasaga ia i laua, ae ua talosaga le isi pagota e toatasi o lo o molia foi i le sola ese mai le toese, i sana loia. Ua faatulagaina nei e le Faamasinoga le aso 16 o Aukuso e lauina ai le faasalaga o Nazario Chong Nee, ao le aso 19 o Aukuso o le a lauina ai le faasalaga o le tamaitai pagota o Punaotala Sakai.

 

Peitai o le mataupu e faatatau i le pagota lona tolu na sola ese mai le toese o Samaoso Luamanu lea na talosaga i sana loia, ua tolopo nei i le aso 13 o Aukuso, 2013. O ia pagota na toe faafoi atu i le Ofisa o Leoleo e o latou aiga ina ua tapa e leoleo le fesoasoani a le au faasalalau i le tau sailia o i latou ia, e ala i le faaalia o o latou ata i luga o TV ma nusipepa, toe faasalalauina i leitio eseese i totonu o le atunuu.

 

Lilomaiava Andrew Fa’asau, Naenae Productions