TALA MAi SAMOA

FAALAUILOA FAALAUAITELE iGOA O TAGATA E FAIA SOLiTULAFONO TAU FEUSUAIGA

 

E le o toe mamao ona faalauiloa faalauaitele lea o igoa o tagata solitulafono uma ua faamaonia moliaga i luma o le Faamasinoga, i mataupu tau i faiga aiga faamalosi, o feusuaiga faasolitulafono ma faaoogalima mataga. O lo o galulue nei le Komisi o le Toe Fuataina o Tulafono a Samoa i le faatulagaina o ni faatalanoaga faalauaitele mo le masina o Setema, e tatala ai le avanoa mo so o se tasi o le atunuu, e folasia ai o latou finagalo e faasino i lea mataupu.

 

O le aso 5 o Fepuari o le tausaga nei na tauaao ai e le komisi se tusi mai le Loia Sili e iloilo pe talafeagai i totonu o le atunuu, le i ai o se tusi faamau e resitala ai igoa o e ua faamaonia moliaga i solitulafono tau feusuaiga, ma pe fesoasoani lea resitala i le faaititia ai o le toe tulai mai o ia ituaiga solitulafono a i latou ua faamauina igoa. O lenei mataupu na afua mai i luma o le Faamasinoga Maualuga ina ua molia se tane e 45 tausaga le matua, na faamaonia ma faasalaina i le umi e tolu tausaga mo le pule le uma i se teineititi e 7 tausaga le matua ia Tesema o le 2012. Na faaalia ai foi i luma o le Faamasinoga, sa faatinoina e lea lava alii ni soitulafono tau feusuaiga na faamaonia ma faafalepuipuiina ai o ia i le 2009.

 

O lea tulaga na faaalia ai e le afioga Faamasino Vui Clarence Nelson, e manino e lei aoaoina lava le mafaufau o lea alii ma sa faapea ona ia faatuina le faalauiloa faalauaitele o igoa o ituaiga tagata faapenei ina ia nofo silafia ai le atunuu lautele i ituaiga tagata e ono fetapai ma o latou alo ma fanau e pei ona faia i atunuu i fafo, ma ia taofia ai le faia o ia faiga mataga.

 

FAAMALOLO LE KOMESINA O LE TINEI MU

 

Ua faamalolo nei mai ona tofiga o le komesina o le Pulega o Tinei Mu ma Auaunaga Tau Faalavelave Faafuasei, le sa avea ma komesina, le susuga Seve Tony Hill. O le vaiaso na tea nei na tuuina mai ai se faaiuga a le Kapeneta ina ia faamalolo ai o ia mai lona tofiga, ina ua maea se suesuega a le Komesina o Sulufaiga e uiga i ni gaioiga le talafeagai ma tuuaiga i le faaaoga sese o lona malosiaga.

 

O le afioga Seve o le uluai komesina lea o le Pulega o le Tinei Mu na muai filifilia e le kapeneta talu ona tuueseeseina lea pulega ma le Matagaluega o Leoleo ma Falepuipui. Na faaalia i se lipoti le faailoa ane i le alii minisita o le le fiafia o nisi o le aufaigaluega i ni faiga faaalatua ma le feteenai ai o galuega faatino a le sa avea ma komesina. Ua faailoa mai e le taitaifono o le komiti faafoe o le Pulega o le Tinei Mu, le tofa Leta’a Dan Devoe, o le aso Lulu na logoina ai lelatou komiti e le kapeneta ina ia vave sue a faaalia foi e Leta’a le amata faagasolo o suesuega faasolitulafono a leoleo i tuuaiga faasaga i le sa avea muamua ma komesina.

 

TAUMAFAI LE ATINAE TURISI E FAAOPOPOINA LE AOFAI O MELI LA’U PASESE E ASIASI MAI

 

O lo o silasila nei le Pulega o Tagata Tafafao Maimoa Mai Fafo, o le Pulega o Uafu ma Taulaga, faapea matagaluega a le malo ma faalapotopotoga tumaoti, i ni auala e siitia ai le fuainumera o meli la’u pasese e afea Samoa i le uafu i Matautu. O le aso Lua na sei mavae atu nei na amatalia ai se mafutaga faaleaoaoga o lo o faatupeina e le iuni a Europa ma faatinoina e le Faalapotopotoga o Turisi a le Pasefika i Saute, na auai ai sui o ia faalapotopotoga mo le ausia o lea tulaga. Na saunoa le tamaitai pule o le Ofisa o Turisi, le afioga Papalii Matatamalii Sonja Hunter, e taua le sailiili pea i auala e faaleleia atili ai lea atinae ona e fai mamao ese o Samoa pe a faatusatusa i isi atunuu o le Pasefika o lo o tulaga lelei ai lea atinae.

 

Mo se faataitaiga na ia faaalia, a malaga mai le meli lau pasese mai Sini, Ausetalia i le Pasefika, e taunuu i ia atunuu i le 7 i le 10 aso, ae a malaga mai i Samoa, e i luga atu o le 14 aso. “O lona uiga, e tatau ona lava sauni tatou i Samoa nei i tulaga uma e faatosina ai i latou ina ia sili atu nai lo o sauniuniga a isi atunuu ole Pasefika sa afea muamua e lea meli,” o le faamalamalamaga lea a Papalii. Fai mai a ia, ua i ai se komiti faapitoa e gafa ma lea faamoemoe ma o lo o galulue faatasi nei ma ofisa Malaga uma faapea isi au faipisinisi i totonu o le atunuu. O tausaga ua tuanai, nao le pe a ma le 7 i le 8 meli lau pasese e afea le atunuu i le tausaga. Peitai, ua siitia nei lea fuainumera i le 21, ao fuafuaga a le malo o lo o i ai nei, ia oo atu i le 2016, ua oo lea fuainumera i le 30.

 

TALIMALO AMERIKA SAMOA I LE FONOTAGA MO LE FAASAOINA MA PUIPUIA O AMU MA AAU

 

Ua faamaonia e le kapeneta le auai atu o se usugafono a Samoa mo le fono faaleaoaoga a Samoa e lua, e talanoaina ai le faasaoina o amu ma aau o le gataifale. O lenei fonotaga o le a talimalo ai Amerika Samoa mai le aso 5 i le aso 10 o Aukuso. Na uluai faavaeina lea fonotaga i le tausaga 2012 ma e toa 10 sui o le atunuu o le a auai atu i ai mo le tausaga nei mai le Matagaluega o Punaoa ma le Siosiomaga faapea ai le Matagaluega o Faatoaga ma Faigafaiva.

 

Ua faailoa mai e le malo, o se avanoa taua lenei e galulue faatasi ai matagaluega ia e lua i le tulaga tau i le puleaina tatau o gataifale faapea foi le fefaasoaa’i o tomai o sui auai i le vaaiga lelei o amu ma aau.

 

Saunia: Lilomaiava Andrew Fa’asau, Naenae Productions

Comment Here