TALA MAi SAMOA

FONO MINISITA O FEFAATAUAIGA O LE PASEFIKA I APIA

 

O ananafi na amatalia ai le fonotaga a minisita o Fefaatauaiga a le Pasefika lea o lo o talimalo ai le malo Samoa i le faletalimalo o le Tanoa Tusitala, ma sa tatalaina aloaia e le sui palemia, le tofa Fonotoe Nuafesili Pierre Lauofo.

 

O lea fonotaga e tauaaoina ai lipoti a sui usufono i fautuaga e faasino i mataupu eseese mo le soalaupulega a minisita. O lenei fono ua usuia i tausaga taitasi e soalaupule ai mataupu autu tau fefaatauaiga e aafia ai le Pasefika. O lo o mafai i nei feiloaiga ona talanoa faatasi minisita o Fefaatauaiga uma o le Pasefika ma faia faaiuga mautu agai i mataupu e ave ai le faamuamua mo le manuia lautele o le itulagi nei.

 

O se tasi o mataupu o le a talanoaina i le vaiaso nei e aofia ai le avea o atunuu o le Pasefika ma sui auai o le Faalapotopotoga o Fefaatauaiga o le Lalolagi (World Trade Organization), lea na talia lata mai nei Samoa e avea ma se tasi o ona sui auai.

 

O le a talanoaina foi le tulaga ua i ai feutagaiga i le maliega ua faaigoaina o le Pacer Plus, o le valalata lea o le tulaga o fefaatauaiga i le va o Ausetalia, Niu Sila ma atunuu o le Pasefika. O le a iloilo foi auala ma metotia i fesoasoani a le Pasefika i mataupu tau fefaatauaiga.

 

LE FIAFIA TUALEPA I FAITIOGA A PALUSALUE FAAPO II

 

Ua faaalia le faanoanoa tele o le alii palemia, le susuga Tuilaepa Sailele Malielegaoi, i le finagalo faaalia o le taitai o le itu Agai, le afioga Palusalue Faapo ii, e faatatau i le amata fausia o se tulafono e faatuina ai se fono faatonutonu a le au tusitala ma le au faasalalau, le media council. Na faaalia e le alii palemia, sa tatau lava ia Palusalue ona taofi le faaalia o lona finagalo e uiga i lea mataupu, ona o lea ua silafia ai e le lalolagi atoa le tulaga ma’a’a o lo o i ai lona finagalo faasino i lea mataupu.

 

Na faaalia e le afioga Palusalue i se feiloaiga ma le au tusitala i le amataga o le vaiaso nei lona agaga faanoanoa, i le aiaina e le malo o galuega faatino a le au tusitala ma le au faasalalau e ala i le faatuina o le tulafono ua amata tusia nei e le Loia Sili e lima taitaia ai le faatuina o le fono faatonutonu mo le au tusitala. Na tali manino le alii palemia, o le faatuina o le media council o se mataupu ua loa tausaga o faatalanoaina mai, ma o se mataupu e patino i le au tusitala lava ia sa latou lagaina ma faailo ane i le malo i le tele o tausaga ua tuanai. Fai mai a ia, sa aumai se alii tomai faapitoa mai Egelani ma foli sana lipoti i feutagaiga ma le malo mo le faatuina o lea fono faatonutonu.

 

O lona uiga o le fuafuaga lava a le au tusitala ma le au faasalalau ua leva ona afuafua mai. Na fautuaina e Tuilaepa le taitai o le itu Agai e sili ai le taofi o ona manatu faaalia pe a le malamalama i mataupu o lo o laga.

 

PALUSALUE: “E TIGA LE MEA MONI”

 

Ua ata faatauemu le taitai o le itu Agai, le afioga Palusalue Faapo ii i le fautuaga a le alii palemia ina ia taofi o ona manatu faaalia e faatatau i le fono faatonutonu mo le au tusitala ma le au faasallaua lea o lo o tau faatuina. Fai mai a ia, o le masani lava lea a le palemia ma nao le pau le tulaga e fai ia uiga o le tafi ese aua e le maimau lona taimi e tali ai i ai.

 

“Ou te le fia tali i ia lapisi, ae na ona ou fai atu i le alii palemia, ‘e tiga le mea moni,’” o le sauoaga lea a Palusalue. "Na o le pau lava le tulaga na atugalu ai le vaega faaupufai o le Tautua Samoa, o le tutoatasi o le au tusitala, aua o se tasi lea o poutu o faiga faatemokarasi ma o lana matafaioi o le faamautinoa o le fai mea manino ma le faatuatuaina i soo se faigamalo.” Na faatusaina foi e Palusalue le faatuina e le malo o lea fono faatonutonu i le faigamalo a Fiti lea o lo o taotaomiaina le saolotoga o le au tusitala i lea atunuu.

 

“Ou te le popole i ana upu faifai ia te au aua o lona natura lava lena,” o a Palu lea. “Ae e le maimaua lou taimi ou te tali atu ai i ana lapisi.”

 

FAATUPULAIA LE FUAINUMERA O LE FANAU ITI UA MAUA I LE KANESA

 

Ua maitauina le faatupulaia o le fuainumera o le fanau laiti ua maua i le faamai o le kanesa, ma o le mafuaaga lea o le polokalama faalauiloa a le Sosaiete o le Kanesa a Samoa lea sa faagasolo i le vaiaso nei, e faailoa ai auga o lea faamai ina ia nofo silafia ai le mamalu o matua ma ia vave sailia ai se fofo.

 

O lea polokalama faaluiloa o lo o taumafai ina ia aoao matua e mataitu ma le totoa alo ma fanau mo ni auga vaaia o le kanesa, ina ia tele ai se avanoa e faasaoina o latou soifua mi togafitiga o lea faamai. Ua faalia i faamaumauga a le Sosaiete o le Kanesa a Samoa le matautia o le tulaga ua i ai le faatupulaia o le fanau iti ua aafia i lenei faamai faigata. O ia faamaumauga e faavae i faamaumauga a le Matagaluega o le Soifua Maloloina ma e lata i le 50% le fuainumera o le fanau mai le 0 i le 19 tausaga le matutua ua aafia i le kanesa, i le lima tausaga mai le 2007 i le 2011.

 

O le polokalama faalauiloa o lo o faagasolo nei ua faia e manatua ai se tasi o le fanau na maliu i le aso Gafua o le vaiaso nei i lenei faamai, o Joeman Sefo.

 

TOATOLU UA MANUNUA I SE FAALAVELAVE TAU TAAVALE I VAITELE

 

E toalua tagata matutua ma se tamaititi na manunua tuga ina ua fetoai le latou van ma se taavale laititi lau pasese i se fetaulaiga o ala i Vaitele. Na faaalia e se alii sa molimauina lea faalavelave, sa alu atu lemu le taavale laititi lau pasese, ae so’a loa e le van sa malaga atu ai se ulugalii ma le la tama. Na ia faaalia, sa tatau ona tu le van.

 

Peitai, ua aveese e se tagata le saini po o le faailo o lo o tusia ai le faaupuga “Give Way” i le magaala sa malaga atu ai le van. Na manua mitimiti le ave taavale o le taxi na aafia, ae na tuga mnuaga o le ulugalii ma lo la alo ma sa faapea ona auina atu i latou i le falemai mo togafitiga. O lo o suesueina e leoleo lea faalavelave ma o lo o sailia foi po o ai ua ia aveesea le saini sa i ai i lea fetaulaiga o auala.

 

Saunia: Lilomaiava Andrew Fa’asau, Naenae Productions

Comment Here