TALA MAi SAMOA

FALEPUIPUI MO LE TOLU TAUSAGA I LE FAAOOLIMA I SE PEPE E 7 MASINA

 

Ua faasalaina nei e le Faamasinoga Maualuga le alii sa avea ma faatonu o le Sosaiete o Taulasea Samoa, o ietitaia Tapumanaia e nofosala i le toese i Tafaigata mo le tolu tausaga. O lea alii na molia i lona sauaina o se pepe e nao le fitu masina le matua, lea na ia faailoa i luma o le Faamasinoga, sa ia taumafai e aoai lea pepe.

 

Peitai na manino i faamaumauga a le Faamasinoga, na faaoolima le ua molia i le pepe e ala i lona poina o lona gutu, toe togi o ia i luga o le moega, na mafua ai ona fetoai le pepe ma le puipui o le fale. E tele ni manuaga i le tino o lea pepe na mafua mai i ia faiga le alofa, ma ua tuuina atu nei o ia i lalo o le vaavaaiga malu a le Toomaga mo e Puapuagatia. O i latou foi ia na oo ai lea mataupu i le Faamasinoga.

 

O lea faalavelave na tulai mai i le aso 18 o Me o le tausaga nei lava lea na molia ai lea tama e 47 tausaga mai Leone, Apia ma Auala, Savaii. Na fesiligia o ia pe aisea na ia faia ai lea tulaga ma sa ia tali ane e faapea, ua ia fiu e faana lona afafine. Na faaalia foi, e le o se afafine moni o le ua molia lea pepe, ae o se pepe na ia maua ao faatino ana galuega faataulasea.

 

SAUNOA SA’O TUILAEPA I TULAGA E AO ONA FAIA E FAALELEIA AI LE ATINAE TAU TURISI

 

E lei afeia saunoaga a le minisita o Turisi, o ia foi o le alii palemia, le susuga Tuilaepa Sailele Malielegaoi, i le feiloaiga a sui o le Matagaluega o Tagata Tafafao Maimoa Mai ma le mamalu o le atunuu o lo o alala ma papa aao i le Mata Aleipata i le amataga o le vaiaso nei. O lea feiloaiga o se taumafaiga a le matagaluega ina ia faamalamalama auiliili ia tulaga moomia ina ia faaleleia atili ai le atinae tau turisi, ma le matafaioi a vaega eseese o afioaga e tatau ona faatinoina ina ia ausia ai lea tulaga.

 

“O le tala ave, e le fai vae ae lealea,” o le saunoaga lea a Tuilaepa. “Tatou nei o matai o nuu, ia fuli e matua faamamafa faasalaga o taulelea e le amio pulea, o taulelea e togi maa, o taulelea e fiafia e tafafao i beach fale ma gaoi ofu laiti o turisi, ma faasala ma i latou ua tele le mataaitu.” Na saunoa foi le alii palemia i le itupa o tina ma ia faamamafa ai le tatau ona toaaga e faamama le aai o afioaga ma tafafale i afiafi o aso Toonai uma ao lumanai le aso Sapati. Fai mai a ia, o le matafaioi lenei a tina sa masani ai i aso ua tuanai a ua seasea ona toe faia. Na ia saunoa foi ina ia faaalia le amio pulea i taimi uma ae le o le nofonofo ma faatalitali tagata e afe atu e matamata ma tapa le tai lua tala, ae o lo o tu le taavale i tafatafa o le auala a le malo.

 

TUUAIA E LE ITU AGAI LE MALO I LE AIA I GALUEGA A LE AU TUSITALA

 

Ua faitioina e le taitai o le itu Agai, le afioga Palusalue Faapo ii ma le vaega faaupufai o le Tautua Samoa le malo, i le aiaina o galuega a le au tusitala ma le au faasalalau, e ala i le faavaeina o se tulafono e faatu ai se fono e faatonutonu lelei ai le faatinoina o le galuega faatusitala. Ua faitioina ai foi le sooupu a le malo, le susuga Uale Taimalelagi Papalii, o ia foi o le peresetene o le asosi o le au tusitala ma le au faasalalau, i lona le finauina o lea mataupu mo le lelei o le asosi.

 

Na saunoa Palusalue, o lo o i ai le feteenaiga o finagalo po o le “conflict of interest” i le avea o Papalii ma peresetene o le asosi o le au tusitala, ae o ia foi o le sooupu o le malo. Na finau Palusalue, e le tutoatasi lea ituaiga faiga ma afai ae filifilia e le malo sui o le fono faatonutonu o lo o tau faatuina, o lona uiga o le a le tutoatasi lava a latou faaiuga. Na tapa se finagalo o Papalii i lea mataupu ma na ia faaalia, ua lima nei tausaga o ia tauaveina ia tofi e lua ma e leai lava se itu o feteenai ai. Fai mai a ia, na te le o faasaina le au tusitala mai le faitioina o le malo, ma a fai foi ona tiute faasooupu a le malo, e leai lava se tulaga o lo o aafia ai fua lona tofi peresetene i le aosi o le au tusitala.

 

TO’A PEA TOEOLESULUSULU E UI UA FAAMAONIA ONA MOLIAGA

 

O lo o to’a pea le alii faipule o le itumalo Aana Alofi Numera 3, le afioga Toeolesulusulu Cedric Pose Schuster, e ui ua faamaonia e le Faamasinoga Faaitumalo moliaga e fa faasaga ia te ia, ma e ono faasalaina ai o ia i le toese atoa ai ma le aveesea o lona tofi faipule. Peitai na vaaia le to’a o le alii faipule i le feiloaiga a le vaega faaupufai o le Tautua Samoa ma le au tusitala i le aso Lua na sei mavae atu nei, ma na aofia ai o ia i faipule e toatolu sa saunoa e faamalamalama nisi o mataupu sa fesiligia e le au tusitala.

 

Na fesiligia foi o ia i ni ona lagona o i ai ao loma le lauina o lona faasalaga i le aso 5 o Aukuso. Na tali o ia, so o se mea e tupu i totonu o le Faamasinoga, e le oo i ai lona malosi. Peitai mo le taimi nei, e faaauau pea le faatinoina o ona tiute faafaipule. i le faaiuga a le afioga Faamasino Vaepule Vaemoa Vaai, o lo o faamaonia ai moliaga e fa faasaga ia Toeolesulusulu ma isi tagata e toa 13 mai Satapuala, e aofia ai le faapotopoto faasolitulafono.

 

O lo o taua i le vaega lona 10 o le tulafono o faiga palota e faapea, e aveesea le tofi o se sui faipule pe afai e faamaonia sana solitulafono i se faasalaga faafalepuipui e lua tausaga pe sili atu.

 

O lo o taua foi i le vaega 30 o le tulafono o soligatulafono e faapea, o le faasalaga o le moliaga o le faapotopoto faasolitulafono o le falepuipui mo le tausaga e tasi. O le tetee i leoleo e faasalaina i le falepuipui mo le tausaga e tasi, ao le lafo o upu masoa e faasalaina i le tolu masina i le falepuipui.

 

Saunia: Lilomaiava Andrew Fa’asau, Naenae Productions

Comment Here