TALA MAi SAMOA

FAAMAVAE TAGATA MUSIKA I SAMOA IA HARRY MILLER

 

Na faatumulia le maota maliu o Ligaliga i Leifiifi i le aoauli o le aso Gafua i tagata musika iloga o Samoa, faapea aiga ma uo o le alii ta kitara lauiloa o Harry Miller, e faamavae atu ia te ia i le auala ua faamanuiaina ai i latou e le Atua , e ala i le lagiina o pese ma le taina o a latou mea fai faili. E tele molimau i le sauniga faaleaiga o le alii o Haryy Miller ma sa molimau ai nisi o tagata musika iloga e le gata i lana augatupulaga, ae faapea foi tupulaga musika o lenei talutalu fou.

 

Sa faatusaina o ia e le toatele i le alii ta kitara lauiloa mai Amerika o Jimmi Hendrix. Sa lagiina foi e le susuga i le Faifeau Samoa, le susuga Falefatu Enari, o se tasi foi o alii iloga o le musika i tausaga ua tuanai ae lei galue i le galuega a le Atua, le pese na fatuina e se tasi o uo mamae a Harry, le afioga Faumuina Apulu Lance Polu ua faaigoaina “Pe A Goto Le La” sa ia fatuina ina ua maliu lona tama. O ananafi na molimoli atu ai le tino maliu o Harry Miller i Amerika Samoa mo ona toe sauniga ma lagomau i lona aiga i Tafuna.

 

FESOASOANI NIU SILA I LE ATINAEGA O LE TALAFATAI I APIA

 

O le faaiuga o le vaiaso na sei mavae atu nei na malaga atu ai i Niu Sila le taitai o le malo, le susuga Tuilaepa Lupesoliai Sailele Malielegaoi, ma feiloai ai ma le minisita o le Va i Fafo a Niu Sila, le susuga Murray McCully, faapea ai ma le pulenuu o le aai o Aukilani, le susuga Len Brown. O ia feiloaiga sa faataunuuina lava i le faaiuga o le vaiaso.

 

O le fono ma le minisita o le Va i Fafo, sa talanoaina ai mataupu e faatatau i le Pasefika, aemaise tapenaga mo le fono a atunuu laity o le lalolagi lea e talimalo ai Samoa i le tausaga fou. Sa faapea foi ona faia faatalanoaga i le va o malo e lua i le vaega tupe tele ua saunia e le malo Niu Sila, mo le atinaega o luma maota o le taulaga ma le talafatai o Apia mai i le tolotolo i Matautu seia oo i le peninsula i Mulinuu.

 

O le feiloaiga ma le pulenuu o le aai o Aukilani sa talanoaina ai lo latou fesoasoani mai i fautuaga ma metotia mo le faatinoga o le galuega tele o lo o fuafua nei i talafatai o Apia, lea o le a fausia ai ni nofoaga faamataaga, o faleaiga ma tulaga uma e faamatagofieina ai le taulaga mo le agai mai o tagata tafafao maimoa mai fafo. O lea galuega o le a faatinoina ina ia faatosina mai ai turisi e fiafia i nofoaga e faafesagai ma le sami e pei ona vaaia i foliga o le aai o Aukilani.

 

MANUMALO LE KAMUPANI MAI SAINA I LE FAUSIA O LE MAKETI I FUGALEI

 

Ua faamaonia e le kapeneta le tuuina atu o le konekarate mo le fausiaina o le maketi i Fugalei i se kamupani mai Saina. O le tauofoga mo lenei galuega na faasalalauina mo le silafia lautele e le mamalu o le atunuu ma e ono kamupani sa tuuina atu a latou tusi tauofo.

 

Na iloiloina uma ia tusi tauofo e se soakomiti e tusa ai ma aiaiga i totonu o le tusi o tauofoga. i le maea ai o le iloiloga ma faatalatalanoaga, na tuuina atu ai loa le fautuaga a le soakomiti mo le faaiuga a le kapeneta, lea ua faamautu mai ai le tuuina atu o le konekarate mo lea galuega tele i le kamupani o le Kin Dao Construction mai Saina. O lo o i ai le faamoemoe e le o toe mamao ona amatalia loa lea o galuega mo le toe fausiaina o lea maketi i Fugalei i le tau e $10 miliona tala.

 

GALULUE FAATASI LE JAWS MA LE MALO I LE FAATUINA O LE FONO FAATONUTONU MO TUSITALA

 

Ua malilie ma autasi nei le faalapotopotoga o le au tusitala a Samoa, le JAWS, le ofisa o le Loia Sili ma le komisi o le toe fuataina o tulafono a Samoa, e galulue faatasi mo le fausia o le tulafono e faatuina ai le fono e faatonutonuina galuega a le au tusitala ma le au faasalalau, le Media Council. O le faaiuga o le vaiaso na tea nei na feiloai ai le peresetene ma le laulauafono a le JAWS ma le Loia Sili, le afioga Aumua Ming Leung Wai, ma le faatonu o le komisi o le toe fuataina o tulafono a Samoa, le tamaitai loia o Leilani Tuala-Warren, ma soalaupule faatinoga o lea tulafono.

 

O lea feiloaiga sa faia i le maota o le Tui Atua Tupua Tamasese Efi ma le faamoemoe e tauaofa’i i lea tulafono le faatuina o lea fono faatonutonu, e mafai ai ona aloaia i se tulaga maualuga, sa’o, paleni ma le faaituau o tusitusiga a le au tusitala ma le au faasalalau, faapea ai ma le usitaia o taiala ma tulafono mo le faatinoga o galuega faatusitala. O lo o tetee pea nisi o tusitala i le faatuina o lea fono faatonutonu.

 

PINE AURO AU SIISII POWERLIFTiNG I LUSIA, FESOASOANI I AI LE MALO

 

Ua faamatuu e le malo le fesoasoani tupe e $35,000 mo le faalapotopotoga siisii uamea mamafa mo le malosi, po o le powerlifting. O lea tinoitupe na tuuina atu e le malo mo le lea faalapotopotoga i a latou sauniuniga mo taaloga o le ipu o le lalolagi sa faia i Lusia i le masina ua tuanai.

 

E toalua sui o Samoa sa auai atu mo lea faamoemoe, o le alii o Oliva Kirisome ma le tamaitai o Matile Sitagata ma sa faamanuiaina uma i laua i paga sa tauva ai i pine auro, ma faapea ona sisiina a’e ai le tagavai o Samoa ma lagiina ai le vii o le saolotoga i Moscow, Lusia. Na faaalia e le ofisa o le kapeneta le tuuina atu pea o le lagolago a le malo i alo o le atunuu i taaloga faavaomalo aua le atinaega o taaloga i le atunuu. O lo sauniuni nei lea faalapotopotoga i isi foi tauvaga faavaomalo i le faaiuga o le tausaga.

 

Saunia: Lilomaiava Andrew Fa’asau, Naenae Productions

Comment Here