TALA MAi SAMOA

TUU’U ANASI’I: “…E LE O SE PUSI ATOA O LE AFA PUSI…”

 

E lei logo malie i le faafofoga a le tamaitai faipule, le afioga Fiame Naomi Mataafa, le lafoga a le alii faipule o le itumalo Siumu, le tofa Tuu’u Anasii Leota, e faatatau i le ofi atu o sui tamaitai i le Palemene i lalo o le pili na pasia mo le faaopopoina o sui tamaitai o le maota.

 

I lalo o lea pili, a leai ni sui tamaitai e manuia i le faiga palota, ona filifilia lea o sui tamaitai e toalima sa tauva ae lei manuia, e aupito i tele a latou palota, ona suia ai lea o le fuainumera o sui o le Palemene mai le 49 i le 54.

 

Na saunoa Tuu’u, o le a vaai maualalo nei nisi o sui alii i ia sui tamaitai ona o le manatu latou te lei ulufale atu i le maota i le auala sa’o po o le manumalo lea i le faiga palota. Na faaaoga e Tuu’u se tasi o faleaitu a aitu lauiloa o Petelo ma Sumeo e faatusa ai sui tamaitai o le a ulufale atu i le maota i lea auala. Fai mai a ia, ua sa’o ai le faleaitu a Petelo ma Sumeo, “e le o se pusi atoa o le fasi pusi.”

 

MOLIA SE ALII MAI NONO’A, SALEIMOA I LE FASIOTI TAGATA

 

O se alii e 27 tausaga mai Nono’a, Saleimoa ua molia nei i le fasioti tagata faamoemoeina ina ua ia faaaogaina se tamai agaese e faaoo ai le oti i lana paaga tamaitai i le po o le Aso Faraile na tea nei.

 

Na faamaonia e le sui sooupu o leoleo, le susuga Fauono Talalelei Tupu, lea faalavelave ma na ia faailoa mai e faapea, o le ua maliu o se tamaitai Toelau e 27 tausaga le matua. Na ia faaalia, o lea faalavelave na mafua i se feeseeseaiga a lea alii ma le ua maliu, ma sa faapea ona ia tuia ai le fatafata o le ua maliu i se tamai agaese.

 

Na tili lea tamaitai i le falemai i Motootua ae peitai e oo atu ua maliu o ia. O le ua molia nei i le fasioti tagata o Lafaele ma na taua e lona uso, o le ua maliu o Daisy ma e lei leva ona taunuu mai o ia mai Toelau. Na ia faaalia foi, e lei leva ona nonofo faatasi i laua. Na faaalia e aiga tuaoi e faapea, e fou ia tagata ma e lei leva ona alala ai i lo latou nuu.

 

PASIA PALEMENE PILI FAAOPOPO AI LE FUAiNUMERA O SUI TAMAITAI O LE MAOTA

 

Ua pasia nei e le Palemene le pili tau faaofi e faaopopoina ai le fuainumera o sui tamaitai o le maota ina ia ausia le 10% o le aofai o sui alii. O le taimi nei e 49 sui faipule o le Palemene ma o lona uiga, o le aofaiga aupito i itiiti o sui tamaitai e tatau ona ausia e toalima, po o le 10% o le 49.

 

Na faaalia le agaga fiafia o le tamaitai faipule o lo o avea nei ma minisita o Faamasinoga, le afioga Fiame Naomi Mataafa, i le pasia o lenei pili e sui e toa 44 o le Palemene sa auai i le fonotaga i le aso Gafua na sei mavae atu nei.

 

E pei ona silafia, o le afioga Fiame o se tasi lea o sui ua loa tausaga i le Palemene. Na ia viia le taitaiga a le alii palemia i lona laga o lenei pili taua ma na ia faaalia, o se suiga ua alagatatau ma ana le gaioi le palemia e faaulu, semanu e le faatinoina lava lenei gaioiga ua tatau ona faia. Fai mai a ia, o lo o tulaga lelei le auai o tamaitai i isi vaega o le olaga ma galuega e pei o faiganuu ma galuega, ma ua maitauina foi le toatele o tamaitai ua pale mai i tulaga faataitai, seia vagana ai vaega o upufaiomalo.

 

Na saunoa Fiame, atonu o le a toatele ni tamaitai e tauva i faiga palota lautele a le atunuu i le lumanai. O le taimi nei, na o le toalua sui tamaitai o le Palemene o lo o i ai.

 

FAANOANOA TAGATA LOTU KATOLIKO FUAFUAGA FAATAU LE TOFAMAMAO

 

Ua faaalia le faanoanoa o sui o le Ekalesia Katoliko i Samoa ona o fuafuaga a le ekalesia e faatau ese lona laumua i Leauvaa, le Tofamamao. Na faaalia e se tasi o matai o le afioaga, o se faanoanoaga tele lea i tagata lotu o lo o latou afioaga, ona o lea fuafuaga a le afioga Epikopo Alapati Lui Mataeliga.

 

Fai mai a ia, o se fuafuaga matuitui ma le oona i o latou loto ona e le o le manao lea o tagata lotu, aua o se nofoaga latou te manumanu ma faatauaina ona sa latou pologa ai i le fausiaina.

 

“O se laumua e fai ma pine faamau o le faamanatuina o le 150 o le Ekalesia Katoliko i Samoa ma e le talafeagai lea faaiuga ua faia, lea ua fuafua e faatau atu i se faipisinisi,” o le saunoaga lea a se tasi o matai e lei fia faalauiloaina lona suafa.

 

MANAO TAUTUA SAMOA E FAAPAFALA KOMITI FAUFAUTUA

 

Ua tatau i le malo ona aveesea ia le tele o komiti faufautua i ana matagaluega ma ofisa tumaoti, ae faaaoga le tupe o lo o totogi ai alauni o sui o ia komiti faufautua e faatutumu ai le aofaiga o siitaga o le a faamalosia i le tau o ana auaunaga.

 

O le manatu faaalia lea o le vaega faaupufai o le Tautua Samoa. Na saunoa le taitai, le afioga Palusalue Faapo ii, ua tele naua tupe a le malo o lo o alu i le totogiina o alauni a sui o ia komiti, ia e filifilia e le malo. O sui o ia komiti o matai mai afioaga eseese o lo o lagolagoina le malo, ma e ese ia komiti faufautua, ese foi ia komiti o faatonu ua filifilia mo ia lava matagaluega ma ofisa a le malo.

 

Lilomaiava Andrew Fa’asau, Naenae Productions

Comment Here