MALIU LE MATAI SALELAVALU, TOATOLU UA MOLIA

Ua lipotia mai le maliu o se matai Salelavalu I se feeseeseaiga ma taulelea mai le afioaga o Sapapalii, ma e toatolu ni alii talavou mai Sapapalii ua molia ai. Na faaalia, o le ua maliu o Suafua 2AP sa fai se latou inuga pia ma nisi alii se toalua mai Salelavalu, I se nofoaga e lalata I le vai taele a le afioaga o Sapapalii I le afiafi o le aso Lua o le vaiaso na tea nei.

Sa lapataia I latou a ni taulelea Sapapalii ina ia tuua lea nofoaga ona e sa le inupia ma pisa I le vai, ae sa le talia e ia alii Salelavalu le lapataiga. Na faaalia e se tasi o tina mai Sapapalii e faapea, sa lafo e se tasi o alii mai Salelavalu se upu masoa I taulelea Sapapalii ma fai atu I ai e leai se latou feau. Sa faapea loa ona vevesi ia alii talavou e toatolu ma alii mai Salelavalu ma faapea ona aafia ai le ua maliu I ni manua tuga. Na faaalia e se alii e faigaluega I le falemai I Tuasivi e faapea, e taunuu atu lea alii o soifua lava.

FAAMANAVA E LE ATUA GALUEGA A LE SUSUGA I LE TOEAINA IA SI’UEVA GOGO

Ua ufitia le Ekalesia Faapotopotoga Kerisiano I Samoa I le ao pogisa ona o le maliu o le susuga I le Toeaina ia Si’ueva Gogo I le maota gasegase o Tupua Tamasese Meaole I Motootua I le aso Toonai na sei mavae atu nei. E silia ma le 42 tausaga na tautua ai lea auauna a le Atua I le EFKS. O le vaitausaga mai le 2001 I le 2005 na filifilia ai o ia e avea ma Taitaifono o le ekalesia, ao galulue o ia ma le faletua ia Faailoga Tunufa’i I le afioaga o Manase I Savaii.

Na avea foi o ia ma Faifeau Toeaina o le Matagaluega/Pulega a le Itu-o-Tane. Na faaalia e le faletua loto faavauvau o Faailoga, o le a matua misia le tama o le aiga ona o ona uiga tausaafia ma le loto maualalo. Fai mai a ia, sa usufono le susuga I le Toeaina I le Fonotele I Malua I le masina na tea nei.

O le po o le aso Faraile na sei mavae atu nei na auina atu ai o ia I le maota gasegase I Motootua ona o se gasegase oso faafuasei ma uma ai lava lona soifua I le aso Toonai na sosoo ai. E maliu le susuga I le Toeaina ia Si’ueva Gogo ua 68 tausaga o lona soifua. O ia o se lupe faalele o le afioaga o Levi, Saleimoa. O lo o soifua lona faletua o Faailoga ma o la alo e toaiva.

ONO TUUTUU I TUA LE TAIMI E TUUA AI AOGA I LE 4PM

E ono tuutuu I tua I le Itula e fa I le afiafi le taimi tuua o aoga pe afai e pasia e le kapeneta le mau faatu a le Matagaluega o Aoga, Taaloga ma Aganuu ua tuuina atu ina ia faaopopo le isi lua Itula I aoaoga a alo ma fanau.

Na saunoa le faatonusili o aoga, le afioga Matafeo Falanaipupu Tanielu Aiafi e faapea, ua manatu le pulega ina ia tuutuu atu I tua I le Itula e fa I le afiafi le taimi e tuua ai aoga I aso taitasi ina ia mafai ai ona aoaoina le fanau I mataupu faaopopo e pei o le musika, tusi ata ma le gaosiga o mea taulima, faakamuta, o taaloga e pei o le lakapi ma le netipolo.

Fai mai a ia, e le atamamai uma tamaiti I mataupu o lo o aoao e pei o le matematika ma le faaperetania, ma o le avanoa lelei lea e aoaoina ai I isi mataupu faaopopo e pei ona taua e ono maua ai so latou manuia ma avanoa faigaluega pe a uma le aoga.

MOLIA I LE TIPITIPI O LE FU’A O LE ATUNUU

Na toe tulai I luma o le Faamasinoga Faaitumalo I le taeao ananafi le alii o Timoti Leota Mamoe e tali I moliaga e fa faasaga ia te ia, e mafua mai I lona faaleagaina o le tagavai po o le fu’a o Samoa I le aso Gafua o le vaiaso na tea nei, ao faasauniuni atu le atunuu lautele e faamanatu le 51 tausaga o lona malo tutoatasi. Na faaalia e leoleo, sa taumafai atu lea alii e fia vaai le afioga I le alii palemia, ae lei maua se avanoa.

O le le fiafia tele o lea alii na mafua ai ona ia tuu I lalo le fu’a sa sisi I luma o le maota o le malo I Matagialalua, ma faapea ona ia tipitipiina I se agaese. Sa iloa atu o ia e nisi sa lalata ane, ma sa latou taumafai e taofiofi lea alii e faatali ai le oo atu o leoleo. Sa taunuu atu leoleo ma ave ai loa o ia I le ofisa o leoleo ma taofia ai. Mai moliaga e fa ua molia ai o ia, e lua moliaga ua faaleaogaina I le Faamasinoga Faaitumalo, a ua totoe ai nei nao moliaga e lua o le tali I ai le ua molia I le Faamasinoga Maualuga.

TOE GAOIA FOI LE APITAGA A LE TOOMAGA MO E PUAPUGATIA

O lo o I ai nei le faamoemoe I le faalapotopotoga o le Toomaga Mo e Puapuagatia e amata faatuina ni auala fou mo le puipuiga o ona apitaga, ia o lo o tausi ma faamalumalu ai le fanau ua tuulafoai e o latou aiga ma aafia I sauaga ma amioga mataga.

O le vaveao ananafi na toe talepe ma ulufale ai nisi I le Maota o le Faamoemoe po o le House of Hope a le Toomaga I Tuanaimato e ala I le ootiina o le pa, ma aveesea ai nisi o mea totino mai totonu o le fale, I le pe a ma le ta o le lua I le vaveao. O le faalua ai lea ona talepe ma gaoia lea maota a le Toomaga. O le uluai taimi o le vaiaso na sei mavae atu.

Saunia: Lilomaiava Andrew Fa’asau, Naenae Productions