SOLA ESE LUCKY NAUER MAI LE TOESE I TAFAIGATA

O le alii fai pisinisi o Lucky Nauer lea sa faasalaina I le solo atoa I le falepuipui I le aso Faraile o le vaiaso na sei mavae atu nei, ua sola ese mai o ia mai le toese I Tafaigata ma o lo o tau sailia nei o ia e leoleo.

E pei ona lipotia I a tatou Tala Mai Samoa I le aso Lua na tea nei, o le aso Faraile o le vaiaso na tea nei na lauina ai le faasalaga o lea alii o le solo atoa I le falepuipui ina ua faamaonia e Faatonu o le Faamasinoga lona moliaga o le fasioti tagata faamoemoeina ona o le maliu o Fareni Viavia I Vaitele I le 2006. Na faaalia e le loia a lea alii, le susuga Fepuleai Ameperosa Roma, na ia faamaonia ai e faapea sa logoina o ia e leoleo e uiga I le sola ese o Nauer mai le toese. Fai mai a ia, sa valaau atu leoleo ia te ia ma fesili atu po o ia iloa se mea o I ai ia Nauer, ma sa ia tali I ai na te le iloa se mea o I ai o ia.

Na lipotia mai foi le toatele o leoleo sa I ai I le malae vaalele I Faleolo ina nei taumafai Nauer e sola I atunuu I fafo. E oo mai I le taimi o lenei lomiga, e lei toe maua mai se faamatalaga mai leoleo pe ua maua o ia pe leai.

TOE AUAI SAMOA I LE TAUVAGA O LE LALELEI O LE LALOLAGI I LE MAEA AI O LE 25 TAUSAGA

O le tausaga nei o le a toe tauva ai Samoa I le tauvaga mo le sailia o le tausala lalelei o le lalolagi po o le Miss World, I le maea ai o le 25 tausaga talu mai le 1988. O se taimi umi lea ma o le taimi mulimuli na tauva ai le atunuu I lea tauvaga I le 1988, sa faaigoaina le atunuu ia Samoa I Sisifo I lena vaitaimi. E toafa ni tamaitai o le a tauva e saili ai se isi e fai ma sui o Samoa I lea tauvaga lea o lo o fuafua e faia I le atunuu o Indonesia I le masina o Setema. Na faaalia, e toaono tamaitai sa tuu e tauva, ae ua toe faamaamulu le isi toalua. O le toatasi e mai Samoa ao le isi e alala I Peretania.

O Samoa o le atunuu lona 126 o lo o tauva I le tauvaga I lenei tausaga. O tamaitai lalelei e toafa o le a tauva e saili ai se tausala lalelei o Samoa mo lea tauvaga o Rosa Taateo o Nofoalii, Barbara Auvaa mai Falealupo ma Salelologa, Penina Maree Paeu o Asaga ma Vaigaga, ma Crystal Tikeri o Lufilufi ma Safune.

LUA TAUSAGA FAATOA TOTOGI LE AITALAFU A LE FOFOGA FETALAI

O se alii fai pisinisi na amata le vaiaso lenei e lei totogia atu e le Fofoga Fetalai o le Palemene lana tinoitupe e $52,000, ua maua nei lana tupe ina ua oo mai I le faaiuga o le vaiaso. Peitai na faaalia e lea alii, le susuga Peter Datt e faapea, ua atoa le lua tausaga e lei totogiina atu lea aitalafu.

O lea alii e pule I le kamupani la’u oloa o le Global Imports and Exports lea sa lauina mai oloa I le faleoloa a le Fofoga fetalai I Vaitele o le Maota o Samoa. Na saunoa Datt, ua tele taimi sa ia tuuina ai le avanoa ia Laaulialemalietoa e toe totogi atu ai lana tupe ma sa ia onosai lava pe a talosaga atu le alii Fofoga Fetalai ina ia toe tuutuu atu I tua le aso e totogi atu ai lea aitalafu. Peitai, na uma lona onosai ina ua ia faitau I se tusitusiga I le nusipepa o le Observer, lea na lomia ai se lapataiga a le Fofoga Fetalai I le ono aveesea o tofi faipule a nisi o faipule e toatolu sa aafia I ni mataupu I le Faamasinoga. Na lipotia I lea tusitusiga se lafoga a le alii Fofoga Fetalai na ia taua ai le Tulafono o Faigapalota, lea o lo o lisi mai ai mafuaaga e ono faaleaoga ai le tofi faipule a sui.

O ia mafuaaga e aofia ai le faamaonia o ni moliaga faasaga I sui, o le tapunia o ni pisinisi a sui ona o le leai o se tupe ma le togitupe o nisi e molimau pepelo mo se sui. Na taua e Datt, o le faia e le Fofoga Fetalai o ia lafoga ae o lo o nofo aitalafu foi o ia, na uma ai ma lona onosai ma faapea ona fai loa lana loia ina ia totogi mai lana tupe. Ua maea nei la ona totogi lea aitalafu ma ua toe malaga atu i lea alii I fafo.

TETEE AFUALO O LO O IA NOFO AITALAFU I LE $1 MILIONA TALA

O lo o tetee malosi le alii faipule o le vaega faaupufai o le Tautua Samoa, le afioga  Afualo Dr. Wood Salele I tuuaiga e faapea e silia I le miliona tala o lo o ia nofo aitalafu ai I le Faletupe o le Atinae a Samoa. Na saunoa Afualo, e le taitai oo I se miliona tala le tupe e lei totogia.

O ia tuuaiga na alia’e I se tusi na tusia e Alofaaga Molipo e faapea e silia ma le miliona tala na nono mai I le Faletupe o Atinae e faatu ai se pisinisi taavale rental ma se faleoloa I Tulaele. Na tusia lea tusi ina ua talosagaina e Afualo le faavaeina o se komisi faapitoa e suesueina faiga le amiotonu I totonu o le malo. Na taua e Molipo, “ua e le savali I aiaiga o lea nonogatupe e pei ona sainia ma le faletupe ma ua tele tausaga e lei maea lava ona totogiina lea nonogatupe. E te fai mai o lo o faaletonu le tamaoaiga o le atunuu ae o lo o faaletonu foi lou tamaoaiga.” Pei o lo o tetee malosi Afualo I ia tuuaiga.

Fai mai a ia, e le taitai oo I se miliona tala le aofaiga o lo o totoe ma o lo o faia lava peimeni o lea nonogatupe. Na ia taua foi, o lea nonogatupe na fai e lana fanau I lalo o lona igoa ma e leai foi sona aafiaga I pisinisi a lana fanau. Na saunoa afualo, ua ia fautuaina lana fanau e tapuni le pisinisi taavale rental ae toe faatau taavale e toe totogi ai lea nonogatupe.

Saunia: Lilomaiava Andrew Fa’asau, Naenae Productions