Ads by Google Ads by Google

TALA MAi SAMOA

FAASALAINA I LE FALEPUIPUI LE AU FAATAU MARIUANA

 

Ua faasalaina e Faamasino Vui Clarence Nelson i le Faamasinoga Maualuga ia Talaiaega Faisauvale Mo’a ma Sivai Kepi i le falepuipui ina ua faamaonia o la moliaga o le umia o fualaau faasaina, ma le feaveaia o mariuana i Savaii ma le faamoemoe e faatau atu.

 

O le Aso Gafua na sei mavae atu nei na tulai ai i laua i luma o le Faamasinoga Maualuga mo le lauina o o la faasalaga ma na faasalaina Talaiaega i le 10 tausaga, ae faasalaina le tamaitai o Sivai Kepi i le fa tausaga.

 

Na saunoa Vui, o le silia ma le 10,000 sikaleti mariuana na maua i totonu o le atopau na malaga ma i laua ua molia i Savaii, o se tasi o vaega aupito i tele o mariuana ua maua e leoleo i Samoa. O le mamafa tuufaatasi o ia sikaleti e 9.6 kilokalama.

 

SOLO ATOA I LE FALEPUIPUI IA LUCKY NAUER I LE FASIOTI TAGATA

 

Na mausali lava le faaiuga a Faatonu o le Faamasinoga Maualuga i le iloiloga faalua o le faamasinoga o le alii fai pisinisi o Lucky Nauer, i le faamaonia o lona moliaga o le fasioti tagata faamoemoeina.

 

Ua faasalaina nei lea alii fai pisinisi mai Lotopa ma Satapuala i le solo atoa i le toese, ina ua faamaonia lona faaoo o le oti ia Fareni Viavia, o se tane mai Laulii i le 2006, i se laau malosi. O lea faaiuga na faia e Faatonu e toafa i luma o le Faamasinoga Maualuga i le Aso Faraile o le vaiaso na tea nei, le aso 24 o Me, 2013.

 

Na faaalia i luma o le Faamasinoga e faapea, o lea faalavelave sa fana ai e Nauer ia Fareni i Vaitele, i le maea ai o se la tuliga taavale. Na faaalia e le loia a Nauer i le Faamasinoga, o le faatolu ai lea ona iloilo o le mataupu a Nauer. O le uluai taimi sa faaleaogaina uma taualumaga ma e lei faailoa mai foi po o a mafuaaga. O Ianuari o le 2012 sa toe iloilo ai ma na aumai ai le faaiuga a Faatonu, e faamaonia le moliaga o le fasioti tagata faamoemoeina faasaga ia Nauer. Sa apili e Nauer lea faaiuga lea sa toe iloilo ai loa i le vaiaso na tea nei. Na faaalia, o le maea o le faia o le faaiuga a Faatonu i le Aso Faraile, sa sola ese ai Nauer mai le vaavaaiga a leoleo, ma sa auina atu leoleo i le malae vaalele i vaai i sola i fafo lea alii.

 

AMATA LE TIETIEGA UILA A LE “USO BIKE RIDERS” MAI NIU SILA E TETEE AI I LE KANESA

 

O le taeao o le Aso Gafua na amata ai le tietiega uila vili vae a nisi o alii Samoa mai Niu Sila ua faaigoaina le latou vaega o le USO Bike Riders, ua malaga mai i Samoa e tietie faataamilo i Upolu ma Savaii e faaali ai lo latou lagolagoina o taumafaiga e tetee atu i le faamai o le kanesa.

 

O le afa o le fitu i le taeao na faapotopoto ai lea vaega i luma o le maota o le malo i Matagialalua mo se sauniga puupuu ma se saunoaga faalaeiau a le alii palemia, le susuga Tuilaepa Sailele Malielegaoi ae lei amatalia le latou faamoemoe. Na saunoa faamalo le alii palemia i ia alii ona o lo latou lagalaga i mea lelei aua le soifua maloloina lelei o tagata o le atunuu.

 

O le USO Bike Riders na tuufaatasia e le alii o Chris Te’o ina ua maea ona ia auai i se moligafu’a e faataua ai le soifua maloloina i Niu Sila, faaopopo i ai ma le maliu o lona tama i le faamai o le kanesa. O lea na ia tuufaatasia ai lea vaega tietie uila vilivae e faataua ai le soifua maloloina lelei ma ia nofo malamalama ai tagata i le faamai o le kanesa aemaise o mea e ao ona fai e tetee atu ai i lea faamai. O le USO Bike Riders ua uma ona latou mai le itu i matu o le motu i matu o Niu Sila seia oo i le pito i lalo o le motu i saute o Niu Sila.

 

LOIA SILI: “E LE MAFAi ONA MOLIA FAUMUiNA I LE TULAFONO”

 

E lei solia e le minisita o Tupe, le afioga Faumuina Tiatia Liuga ni tuutuuga o se tulafono. O le faamatalaga lena mai le Loia Sili, le susuga Aumua Ming Leung Wai e tali atu ai i le talosaga a le vaega faaupufai o le Tautua Samoa ina ia molia loa le alii minisita ona o tuuaiga o le soona faaaoga o tupe a le malo, e pei ona taua i se tusi talosaga a sui e toa 19 o le HRPP. “Afai e lei solia e le alii minisita ni tuutuuga o le tulafono, o lona uiga e le mafai ona molia o ia,” o le faaaliga a le alii Loia Sili i se pepa o faamatalaga na faamatuu mai i le faaiuga o le vaiaso na tea nei.

 

Fai mai a ia, e lua ituaiga tagi e mafai ona faauluina i le Faamasinoga: o tagi o iloiloga faasolitulafono (criminal proceedings) ma tagi o iloiloga o mataupu savili (civil proceedings). Na faamalamalama e le Loia Sili e faapea, o tagi o iloiloga faasolitulafono e mafua ona ua solia e se tasi se tuutuu o tulafono a le malo, ma a faamaonia lea tulaga e faasalaina i se sala tupe pe nofosala i le toese. Na ia faaalia, e lei solia e le alii minsita se tuutuuga o tulafono a le malo.

 

FOAI E NIU SILA LE ISI $6 MILIONA TALA NIU SILA MO LE MALO SAMOA

 

O le amataga o le vaiaso nei na sainia ai e le Hai Komesina o Niu Sila i Samoa, le susuga Jackie Frizelle le tuuina mai o le $6 miliona tala Niu Sila e lona malo e fesoasoani ai i le malo Samoa i le faaleleia o mea na faaleagaina i le afa o Eveni. O le ofisa sili o pulega o le Matagaluega Mo Tupe Maua a le atunuu, le afioga Tupaimatuna iulai Lavea na fai ma sui o le malo e talia aloaia lea foai.

 

Na faaalia e Tupaimatuna, ua atoa ai nei le $12.6 miliona tala Niu Sila le foai a lea atunuu mo le malo Samoa aua galuega mo le toe faaleleia o mea na faaleagaina i le afa. E pei ona silafia, e tele mea totino na faaleagaina faapea faatoaga i lea afa, aemaise ai i latou e toa 14 na maumau ai o latou soifua. Na faaalia e Tupaimatuna, o lea foai ua toe maua nei mai Niu sila o le a faaagaaga le $2.6 miliona tala Niu Sila mo faalavelave faafuasei, ae faaaogaina le $4 miliona tala Niu Sila e fesoasoani ai i le faaleleia o le atinae tau turisi.

 

Saunia: Lilomaiava Andrew Fa’asau, Naenae Productions