Ads by Google Ads by Google

TALA MAi SAMOA

FAAMAONIA O PONAIVI NA MAUA O PONAIVI O MIKAELE TUMUA

 

O le taeao o le aso Lulu na sei mavae atu nei na tulai ai I le Faamasinoga Maualuga se tasi o molimau a leoleo, o se alii saienitisi mai Aukilani, Niu Sila, le susuga Timothy Edward Pal ma ia faaalia e faapea, o ponaivi na maua I Faleasiu, o ponaivi o le alii o Mikaele Tumua. Na molimau le alii saienitisi, ua faamaonia I a latou suesuega faasaienitisi e tutusa lelei vailaau po o le DNA o ia ponaivi ma ponaivi o lona tina o Sami Afa Tumua.

 

O se tasi lea o molimau I le faamasinoga o alii e toalima mai le afioaga o Faleasiu lea o lo o molia I le fasioti tagata faamoemoeina ona o le maliu o le alii o Mikaele Tumua, e 31 tausaga o Faleasiu I le 2010. O le lona fa ai lea o aso o faagasolo lenei faamasinoga.

 

O le masina o Setema o le tausaga na tea nei na faaleaoga uma ai e le Faamasinoga Maualuga ia taualumaga o lenei faamasinoga, ona o le tele o feteenaiga I molimau sa valaauina, faatasi ai ma le le toe maua o faila ma faamatalaga tusitusia a I latou sa faatalanoa I le aso na tulai mai ai le faalavelave I le 2010.

 

O molimau o lo o faatautaia ai nei le faamasinoga I le taimi nei, o molimau a I latou sa toe faatautaia ina ua e ni alii mai le afioaga o Faleasiu ni ponaivi o se tagata lea e masalomia o Mikaele Tumua ua maliu. O lo o faaauau pea lea mataupu ma o lo o tetee I latou e toalima ua molia I o latou moliaga.

 

 

ALO FAATAAMILO I MOTU O SAMOA LE VAA E LAGOLAGO AI LE FAATAUA LE OLA

 

O le aoauli o le aso Tofi na tea nei na taunuu mai ai I le ava I Apia le vaa alo o le ituaiga o le kayak e fai lona la, sa aloina e se alii leoleo Ausetalia sa galue I Samoa mo le lua tausaga, e lagolago ai taumafaiga e tetee atu I le faafitauli o le pule o le ola.

 

Na maitauina e lea alii Ausetalia o Andy Wharton le ogaoga o lenei faafitauli I le atunuu, ma sa ia faia ai loa lea malaga umi sa ia faataamilo ai I motu uma o Samoa mo aso e 13, e saili seleni ai e fesoasoani I le faalapotopotoga o le Faataua Le Ola, lea o lo o taumafai e tineia lea faafitauli mai le atunuu.

 

O le taumafaiga aupito I lata mai a le faalapotopotoga ua mafai ona o lea sailiga seleni a Wharton, o laina telefoni ua tatala nei mo I latou e fia fesiligia se fesoasoani I ni faafitauli o lo o feagai ai ma mamafa I o latou mafaufau ina ia ‘alo ese mai le pule I le ola. Ae lei tuuvaa atu lea alii I lana malaga saili seleni, sa faia se taumafataga sa auai sui o pisinisi ma le atunuu lautele ma sa foai ai se seleni tele e lagolago ai lana malaga faataamilo.

 

Na tuuvaa atu le malaga a lea alii mai le uafu I Mataututai agai atu I Siufaga I Savaii, taamilo ai I Salafai atoa, ma taamilo ane ai I sauté seia soo atoa Samoa ma toe taunuu ane ai I le uafu I Mataututai.

 

FALEPUIPUI IOPU TEMA MO LE 22 MASINA I LE TAUFAAVALEA

 

O 46 tausaga o se alii mai Puleia I Savaii, o Iopu Tema, ua faasalaina nei e le Faamasinoga Faaitumalo I le falepuipui I moliaga e tolu, e lua moliaga o le taufaavalea ma le moliaga e tasi o le maua lea o ni faamanuiaga I ni auala taufaasese.

 

E 22 masina o le a nofosala ai nei o ia I le toese. Na faaalia I faamaumauga a le Faamasinoga, o lenei alii sa ia faia ni auala e nono mai ai tupe a nisi o lona aiga faapea nisi o ana uo, faapea tagata sa latou faigaluega ma e oo mai lava I le taimi nei, e lei toe totogiina lava. Na muai valaauina lenei mataupu I le vaiaso na tea nei. Peitai na ia faailoa I luma o le Faamasinoga, ua uma ona ia toe totogiina uma tupe a I latou sa ia faaaogaina.

 

Sa tetee le itu a leoleo na mafua ai ona toe tolopo lenei mataupu, ina ia valaauina ai a latou molimau e faamaonia ai la latou faamatalaga. O le aso Lulu na sei mavae atu nei sa tutulai ai nisi sa faavalea e le ua molia. E le I talia e le tamaitai Faamasino o Mata Tuatagaloa le talosaga a Iopu Tema mo se isi avanoa sei toe totogi ai nei tupe, ona o lona talitonuga e le gata I le tuga o lana soligatulafono ua fai ua aafia ai le atunuu lautele, ao lea foi ua toe pepelo I le Faamasinoga.

 

AUSIA E LE MANUSINA LE AVANOA E TAUVA AI I LE IPU O LE LALOLAGI

 

O le a fai ma sui o le itulagi o le Pasefika I le tauvaga o le Ipu o le Lalolagi o le Lakapi a Tamaitai I Farani I le tausaga fou, ia le au lakapi taitoa 15 a tamaitai Samoa, le Manusina. Na ausia e le Manusina lea matatia I le vaiaso na tea nei, ina ua tulaga lua I le tauvaga sa tauva ai ma isi au e lima I Madrid, Sepania e saili ai au e lua e ofi atu I le tauvaga o le ipu o le lalolagi.

 

Na faaalia le agaga faafetai ma le faagaeetia o le alii faiaoga, le afioga Papaliitele Pita Fatialofa, ina ua mafai e lana au ona ausia lea matatia lea o le a fai ai nei ma sui o atunuu o le Pasefika I lea tauvaga taualoa. Faimai a ia, na matua faigata lava lea taamilosaga ona o le malolosi o au sa latou taaalo. I le latou taaloga muamua, e ta le afa o lo o sili Italia e 65 I le leai. Peitai na toe finau malosi le au I le afa lona lua ma e fa a latou sikoa na maua ma e ui na faiaina, ae na maua ai le latou ai ponesi e tasi ona ua fa a latou sikoa na maua.

 

O le ai ponesi lena na latou ausia ai le tulaga lua, ona sa tasi foi le faiaina a Italia I le taamilosaga ae lua manumalo pei foi o le Manusina. O le faatulagaga o ai o lea taamilosaga, na tulaga muamua Sepania e 14 ai, tulaga lua le Manusina e 10, tulaga tolu tutusa ia Italia ma Sikotilani e tai 9, sosoo ai Suetena ma Holani e leai ni ai.

 

TALIA LE EKALESIA MAMONA I LE FONO A EKALESIA SOOFAATASI

 

Ua aloaia nei le Ekalesia a Iesu Keriso o le Au Paia o Aso e Gata Ai e avea ma sui o le Fono a Ekalesia Soofaatasi a Samoa ina ua maea ona pasia I le fonotaga a le komiti faafoe I lona ofisa autu I Sogi I le vaiaso na tea nei. Na faaalia le agaga fiafia o le failautusi aoao o le Fono a Ekalesia Soofaatasi, le susuga I le Faafeagaiga ia Ma’auga Motu I le ofi atu o lea ekalesia I le fono.

 

Fai mai a ia, o se tulaga lelei le soofaatasi o ekalesia eseese o lo o I totonu o le atunuu. Na ia faailoa foi e faapea, so o se ekalesia lava e fia auai I le Fono o Ekalesia Soofaatasi, e ao I lea ekalesia ona talia ma usitaia faatuatuaga faakerisiano I le Tasi Tolu Paia, ma ua talia foi e le Ekalsia Mamona lea faatuatuaga. Ua atoa ai nei le 10 o ekalesia ua avea ma sui o le Fono a EKalesia Soofaatasi a Samoa.

 

Lilomaiava Andrew Fa’asau, Naenae Productions