Ads by Google Ads by Google

TALA MAi SAMOA

TOE AMATA FAAMASiNOGA O ALII E TOALIMA O LO O MOLIA I LE FASIOTI TAGATA

 

Ua toe amatalia le faamasinoga i le iloiloina o le mataupu lea o lo o molia ai ni alii se toalima mai le afioaga o Faleasiu i le moliaga o le fasioti tagata faamoemoeina. O lea mataupu na iloiloina muamua i luma o le Faamasinoga Maualuga, e le Faamasino Sili, le afioga Patu Tiavaasue Falefatu Sapolu. Peitai na toe faaleaogaina taualumaga o lea faamasinoga ona o se feteenaiga i molimau.

 

Na amata suesueina lenei mataupu i le tausaga e 2011 ina ua maua e ni tamaiti o le afioaga o Faleasiu, ni ponaivi o se tagata. i suesuega sa faia i ia ponaivi, na maua ai o ponaivi o se taulealea mai Faleasiu lava na maliu i le 2010 o Mikaele Tumua.

 

O lo o masalomia ai la i latou ia e toalima o lo o tetee i luma o le Faamasinoga Maualuga i le fasioti tagata faamoemoeina, e aofia ai Lemole Niko lea o lo o tulai ai le alii loia o Toleafoa Solomona Toailoa, Ulavale Lealofi lea o lo o tulai ai le tamaitai loia o Rosela Papalii, Sefo Muavesi lea o lo o tulai ai Richard Faaiuaso, o Sialii Amosa ma Toeaso Semo lea o lo o tulai ai Katopau Ainuu. E 33 molimau ua fuafua le itu a leoleo e valaauina, ae toafa faufautua o lo o fesoasoani i le tamaitai Faamasino o ida Malosi i le faatautaia o lea mataupu.

 

SAUNIA LAINA TELEFONI E LIPOTI AI LE FAAAOGAINA FAALETATAU O TAAVALE A LE MALO

 

Ua tali mai nei le komisi e pulea le aufaigaluega a le malo, le PSC i le tele o faitioga a le lautele o le atunuu i le faaaogaina faaletatau o taavale afi a le malo. O le amataga o le vaiaso nei ua tatala ai ni laina telefoni faapitoa ua saunia e le komisi i vili fua ma lipoti ane ai e so o se tasi o le atunuu lautele e aunoa ma se totogi, ni faasea e uiga i le faaaoga faasolitulafono ma le le talafeagai o so o se taavale a le malo.

 

O nei faamaumauga uma o le a faamauina e le komisi ma i ai ana sailiiliga mo le tuuina atu i le Kapeneta mo sana faaiuga. E fa laina telefoni vili fua ua saunia; o le 800-7721, 800-7722, 800-7723 ma le 800-7724. O isi ala o fesootaiga ua saunia foi e le PSC o se pepa faatumu i luga o le initaneti i le tuatusi o le www.psc.gov,ws ma le imeli ua faaigoaina o le reportvehicle@psc.gov.ws po o le itulau foi o le facebook i luga o le upega tafailagi o le facebook.com/samoapsc.

 

FALEPUIPUI I LE FAIAIGA FAAMALOSI I LE TAMAITAI E LE ATOATOA LE MAFAUFAU

 

E 67 tausaga o se tama e fai lona toalua ma lana fanau e toafitu ua faasalaina e le faamasinoga e nofosala i le falepuipui mo le lua ma le afa tausaga, ina ua faamaonia le moliaga o le faiaiga faamalosi ma se tamaitai e le atoatoa le malosi o lona mafaufau. E le o mafai ona faailoa le suafa o lea tamaitai, ao le ua molia o Usufono Tele’a mai Tufulele ma Fasitootai. O lenei mataupu na auina atu i le Faamasinoga e i latou na mauaina lea alii o faatinoina lea faiga aiga faamalosi i lea tamaitai e le atoa le malosi o lona mafaufau. Na ioe lea alii i moliaga faasaga ia te ia.

 

TALIA E LEOLEO LE FAUTUAGA A LE PALEMIA I FESOOTAIGA MA LE AU TUSITALA

 

Ua talia e le Matagaluega o Leoleo le fautuaga a le alii palemia, le susuga Tuilaepa Sailele Malielegaoi i sana tusi na tuuina atu i le matagaluega e tauala lea i le alii komesina, e fautuaina ai le matagaluega ina ia taofiofi le faia o faamatalaga i luga o televesi ma uaealesi faasalalau, ae ia tapena lelei ni a latou pepa o faamatalaga ma tuuina atu i le au tusitala ma le au faasalalau. O le mafuaaga o lea tusi a le alii palemia ona o lona talitonuga, o tusitala o lo o latou fesuisuiaina ia uiga o faamatalaga ma le tonu ai le aano sa’o o tali na tuuina atu. O lea na fautuaina ai e le alii palemia le tusi lelei o tali i pepa o faamatalaga e faamautinoa ai foi le mulimulitai ai o ofisa faasalalau.

 

O le tulaga la lea ua i ai nei ofisa faasalalau pe afai e manaomia le faamalamalamaga o ni mataupu, po o ni faalavelave e tutupu mai, ua fautuaina ai le au tusitala e tusi atu i le imeli pe faaaoga le fax ma o le a toe tali atu lava le matagaluega i ia ala o fesootaiga, ae le o toe mafai lava i le taimi nei ona faatino ni faatalatalanoaga i luga o televise po o luga o leitio.

 

MOLIA SE ULUGALII I LE UMIA MA LE FAATAU ATU O MARIUANA

 

O le aso 27 o Me ua tolopo i ai le mataupu a se ulugalii o lo o molia faatasi i le tulafono i moliaga o le umaina atoa ai ma le faatauina o le fualaau faasaina o le mariuana. O lea ulugalii o Tagoiaega Faitauvale Mo’a ma Sivai Kepi mai Faleatiu. O lo o molia Tagoiaega i le auina atu lea o lona toalua o Sivai e faatau atu le mariuana ma sa masalomia ai e leoleo lea tina ma lana atopau e tumu i mariuana i luga o le uafu i Salelologa. O le taimi nei o lo o tuli le faasalaga a se isi foi tina sa maua foi ma atopau mariuana i le uafu i Salelologa ma e lima tausaga lona faasalaga. O le ulugalii ua molia nei o lo o tetee i moliaga faasaga ia i laua.

 

AMATA FEMALAGAIGA A LE SAMOA AIR MAI FAGALII I AMERIKA SAMOA

 

O ananafi na amatalia ai femalagaiga a le kamupani vaalele o le Samoa Air mai le malae vaalele i Fagalii agai atu i Pago Pago, Amerika Samoa. i se faatalanoaga ma le alii pule sili o lea kamupani vaalele, le susuga Chris Langton, na ia faaalia ai lona agaga fiafia i le mafai ai ona latou soalaupule faatasi ma le kamupani vaalele o le Polenisia o nisi o faafitauli na tulai mai, na le mafai ai ona faataunuu ni a latou femalagaiga faavaomalo i le agai atu i Amerika Samoa, talu ona amatalia a latou femalagaiga i Samoa i le aso 18 o iuni o le tausaga ua tuanai.

 

Na faaalia e le alii pule o le Samoa Air, o le aso Lulu na sei mavae atu nei na taualuga ai a latou soalaupulega ma le pule sili o le Polenisia, le susuga Taua Fatu Tielu faapea le afioga i le sui palemia, le tofa Fonotoe Nuafesili Pierre Lauofo, ma foia ai nisi o vaega na taofia ai le faaaogaina e le Samoa Air o Fagalii mo ana faigamalaga mo Amerika Samoa, ae nao malaga i Savaii ma Faleolo sa mafai ona faatinoina. O le itula e 11 i le taeao ananafi le faigamalaga muamua a le Samoa Air mo Amerika Samoa

 

Saunia: Lilomaiava Andrew Fa’asau, Naenae Productions