Ads by Google Ads by Google

TALA MAi SAMOA

$600,000 LE TAU O LE OFISA O LE MINISITA O TUPE

 

Ua faitioina e le taitai o le Itu Agai, le afioga Palusalue Faapo II ma le vaega faaupufai o le Tautua Samoa, le minisita o Tupe, le afioga Faumuina Tiatia Liuga i le soona faamaumau o tupe a le atunuu e ala i tuuaiga e faapea e tolu ni ona ofisa o lo o faaaogaina, ma fesiligia ai le mafuaaga e ese ai o ia mai isi minisita o le Kapeneta, le tu ese o lona ofisa.

 

Na faaalia e le Itu Agai i le au tusitala e faapea, o ia ofisa e tolu a le minisita e aofia ai le ofisa i luga o le Faletupe Tutotonu a Samoa, o le ofisa i le maota tuai o femalagaiga a Niu Sila i Apia, ma le ofisa i le maota fou o le NPF i Savalalo.

 

Peitai o le faitioga na faateia ai le toatele, o le $600,000 lea na fa’aalu e fausia ma faatotoga ai le ofisa o le alii minisita i le maota fou o le NPF.

 

Na saunoa Faumuina, o lona ofisa i le Faletupe Tutotonu ua tuuina atu nei e faaaoga e sui o le Faletupe o le Lalolagi ma le Faletupe o Asia. O le ofisa lea o lo o i le fale sa faaaoga e le ofisa o Niu Sila, ua tuuina atu i le Ofisa o le Siosiomaga.

 

Fai mai a ia, o lona ofisa aloaia o lo o i ai nei o lo o i luga o le maota o le NPF ma o lea fale e pe a ma le $50 miliona lona tau aofai. Na saunoa le alii minisita o tulaga uma e fitoitonu i lona ofisa, e fua i le aoga o le ofisa ae le faia ma fua i le tau.

 

TOE FAALEAGA FOI E NISI UAEA TELEFONI A LE BLUE SKY

 

O lo o sailia nei e leoleo se tasi po o nisi foi sa latou faaleagaina uaea telefoni a le kamupani o le Blue Sky i Matafele. O le faalua ai nei ona tatipi o ta’aiga uaea e pei ona tulai mai ai foi i le masina o Mati lea na motusia ai foi fesootaiga i telefoni.

 

O uaea ua tatipi nei e le tagata e i totonu o se pa i le lotoa o lo o i ai le ofisa autu a le Blue Sky i Matafele. E oo ifo i le afa o le tasi i le aoauli o le aso Lua na sei mavae atu nei, ua pe tusa ma le 18 itula talu ona motusia fesootaiga a i latou e faaaogaina le tautua a le Blue Sky i le talafatai i Apia.

 

O le tau aofai o mea totino a le kamupani ua faaleagaina e pe a ma le $50,000 lona tau aofai. Ua ofoina e le kamupani le taui mo se isi e maua ai se faamatalaga e uiga i le faaleagaina o ana mea totino. O lo o faagasolo foi suesuega a leoleo e saili po o ai na faatinoina lea solitulafono, atoa ai ma i latou na faaleagaina uaea a le kamupani i le masina o Mati, lea lava e lei maua.

 

FAAUI I TUA MOLIAGA FAASAGA I LE TAMA SA PERITOMEINA LE FANAU I SATAOA

 

Ua faaui uma i tua e le Faamasinoga Faaitumalo ia moliaga e 27 faasaga i le tama matua o Fale Itagia, o se tama e 68 tausaga mai i le afioaga o Sataoa, lea na molia mai i le tulafono ona o tagi mai nisi o fanau tama laiti sa faatautaia e lea tama ni taotoga e peritome, lea na iu ina toe faanatinati atu i le falemai ona o aafiaga i o latou taotoga.

 

O lea faalavelave na tulai i le masina o Iuni o le tausaga na tea nei, ma o le masina o Oketopa lea na tolopo mai ai i le masina lenei le iloiloina o lea mataupu ma le tuuina mai o mau a le Ofisa o Leoleo. Peitai na toe talosaga le itu a leoleo mo se ina ia toe tolopo lea mataupu mo le taimi mulimuli ona o le tele o a latou molimau o le fanau laiti o lo o i totonu o aoaoga.

 

Na tuuaia e le tamaitai faamasino ia Mata Tuatagaloa le faatamala o le itu a leoleo ma le le faia o la latou tiute tauave i lenei mataupu. Na talosaga le itu a loia e faaleaogaina uma ia moliaga faasaga ia Fale.

 

E lei talia e Faamasino Mata Tuatagaloa le talosaga a le loia o lo o tulai mo Fale Itagia e faaleaogaina uma ia moliaga. O lona uiga o lo o i ai pea le avanoa a le itu a leoleo e toe faaulu ai lea mataupu.

 

FESOASOANI LE KAMUPANI O LE VAILIMA I LE TAITOAFITU I FALEALUPO

 

Ua agai nei le fesoasoani a le kamupani o le Vailima Breweries i le lagolagoina o le lakapi taitoafitu mo le motu tele i Salafai. Ua tauaaoina e le kamupani se siaki tupe e $15,000 mo le Iuni Lakapi a Samoa e fesoasoani ai i le faatautaia o le taamilosaga taitoafitu i Falealupo lea ua faaigoaina o le Taitoafitu i le Nofoaga e Goto Ai le La.

 

I se sauniga mo le tauaaoina aloaia o lea fesoasoani, na faaalia ai le agaga faafetai o le taitaifono o le faatinoga o le taitoafitu i le itu Asau, le susuga i le Faafeagaiga ia Fuamai Samuelu, ona o le moomia tele o le itu tau seleni e faatinoina ai taamilosaga faapenei.

 

O le vaiaso fou lea e faamoemoe e faatinoina ai lea taamilosaga ma e lata i le 20 ‘au ua maea ona faauluina. Na faaalia e le Iuni Lakapi a Samoa, o lo o i totonu o le kalena faaletausaga le faatinoga o le taamilosaga lenei i Falealupo.

 

TETEE LE MALO I LE TALA NA TUSIA E LE SAMOA OBSERVER

 

Ua tuuina mai se faasilasilaga a le Ofisa Faafailautusi o Faamatalaga ma Faasalalauga a le malo, ina ia faia se faasa’oga i se tala na lomia i le laupepa pito i luma o le nusipepa o le Samoa Observer i le Aso Lulu o le vaiaso nei.

 

Na faaulutalaina lea tala, “Lapataia e le Palemia ia Leoleo,” ma o lea ulutala ma le tala na lomia na faailoa mai e le ofisa faafailautusi a le malo e faapea e sese, ona sa faatatau lea tala i se tusi a le palemia na auina atu i leoleo.

 

O le upu ‘lapatai’ o lo o aumaia e le nusipepa i le gagana Peretania, e le o le faaperetania lea o le upu sa’o na tusia e le alii palemia i lea tusi. O le upu na faaaoga, o le ‘fautua atu.’ O lona uiga, o se faamatalaga na faia e fesoasoani ai i galuega a malu o le malo. O ia fautuaga a le alii palemia e faapea, e sili ai ona tusi ma lolomi lelei tali a leoleo e ala i pepa o faamatalaga ia e auina atu i le au tusitala ma le au faasalalau ina ia mautinoa ai le manino le feau ma le tulaga o lo o i ai leoleo i ni mataupu e fesiligia ai e le au tusitala.

 

Fai mai a ia, e sili atu lea faiga i lo o le faatalanoa i luga o TV ma leitio e aunoa ma le sauniuni lelei i faamatalaga o le a fai i saunoaga e tali atu i fesili a le au tusitala.

 

Saunia: Lilomaiava Andrew Fa’asau, Naenae Productions