Ads by Google Ads by Google

TALA MAI SAMOA

TOE FA'AMALAMALAMA TULAGA I LE TEINEITIITI NA 'AVE FA'AMALOSI

Ua te'ena e le ofisa sili lagolago o le ofisa o femalaga'iga a Samoa, le susuga Togatalima Fa'afouina Milford, ia le fa'amatalaga a se tasi o alo teine o le atunu'u lea sa lipotia I a tatou Tala Mai Samoa I le aso To'onai na te'a nei e fa'apea, sa 'ave fa'amalosi (abduct) o ia e se ulugali'i palagi mai Amerika I le la va'a faila I le 10 tausaga talu ai a o fa'atoa 15 ona tausaga ma sa fa'apologa o ia.

O lea tama'ita'i o Melisa Pepe o Fagafau I Savai'i ma sa ia fa'aalia I se feiloa'iga ma le 'au tusitala I le vaiaso na t'ea nei e fa'apea, sa tele ni tausaga o folau ma lea ulugali'i palagi I le la va'a faila ma sa i'u ina oso I le sami ma sola 'ese ai mai lea ulugali'i ina ua taunu'u I Filipaina. Peita'i na saunoa le susuga Togatalima Fa'afouina Milford, na maioio lelei lava le fuafuaga a lea tama'ita'i e malaga 'ese atu ma le ulugali'i e ana le va'a faila aua sa o'o atu I lo latou ofisa e fai lona tusi folau. Ae na ia fa'aalia, e maofa le mafaufau I le filifiliga na fai e lea teineitiiti I lena vaitaimi ao 15 ona tausaga, lea sa ia malie ai e folau ma lea ulugali'i I se va'a faila. Ina ua taumafai Melisa e toe fo'i mai I Samoa mai Filipaina, sa fa'afaigata ona ia tu'ua lea atunu'u ona o lana tama teine na fanau ai I Filipaina. Na saunoa Togatalima, o lea fa'afitauli sa faia ai loa e lona ofisa se tusi folau mo lea teineitiiti aua o lona tina o le Samoa ma sa mafai ai loa ona malaga mai I la'ua.

O le 2009 na toe taliu mai ai I Samoa ia Melisa Pepe ma lana tama teine o Angelina na fanau I Filipaina I se tama Filipaina. Ua toe fai nei le isi ona aiga I Savai'i ma ua maua le isi a la pepe teine ua lua masina. O lo o gasolo lelei lo la aiga.

TA'OTO I LE PALEMENE LE TULAFONO E MAUTINOA AI NOFOA O SUI TAMA'ITA'I

Ua ta'oto nei I le laulauafono a le palemene le tulafono e mautinoa ai nofoa o tina ma tama'ita'i I totonu o le maota fono a Samoa. O le tulafono e teuteua ai le f'aavae e fa'amautu ai le tu'uina atu o le 10 pasene o nofoa o le palemene I tina ma tama'ita'i. A pasia lenei tulafono, ua mausali loa le lima o nofoa mai nofoa e 49 o le fono aoao faitulafono a le atunu'u I le isi paea'iga, e tu'uina atu I tina ma tama'ita'i.

Ua mae'a ona saunoa fa'amanino le ta'ita'i o le malo, le susuga Tuilaepa Sailele Malielegaoi I lenei tulafono, ma afai e leai se tama'ita'i e filifilia I le isi faiga palota lautele o le a soso'o, ona filifilia mai lea o sui tauva tama'ita'i e to'alima sa tauva ma o lo o pito I luga I le faiga palota e avea ma sui fa'aopopo o le palemene. Ua tolopoina nei galuega a le maota o le palemene se'ia aulia le aso 6 o Mati ma o le a auiliili ai iloiloina o lea tulafono aua le nofo silafia o le mamalu o le atunu'u.

FA'ATUPULA'IA GASEGASE O FATUGA’O

Ua matauina le fa'atupulaia pea o le fuainumera o tagata o lo o a'afia I gasegase o fatuga’o I tausaga ua tuana'i, talu ona fa'atuina le fale fa'amama toto a Samoa I le fitu tausaga talu ai. I fa'amaumauga a le matagaluega o le soifua maloloina, mai le tausaga e 2010 I le 2011, na fa'amauina ai le silia I le 70 o I latou na a'afia, ma a fa'atusa atu I le tausaga e 2005, e na o le to'aono. Na fa'aalia e le ali'i minisita o le soifua maloloina, le afioga Tuitama Talalelei Tuitama I totonu o le palemene e fa'apea, o ia fuainumera e aofia ai I latou o lo o asiasi mai I totonu o le atunu'u ma gasegase toaitiiti o lo o aga'i atu mo le fa'amamaina le tumau o le toto.

Na saunoa le ali'i minisita, o lo o taumafai malosi le matagaluega e tineia ma solo'esea o gasegase ua fa'aigoaina o fa'amai oti po o fa'amai le pipisi e pei ona sa fa'aigoaina ai, e ala I polokalama 'ese'ese a le matagaluega o lo o aga'i atu I afio'aga I tua ma u'unaia le totoina o fuala'au aina, fa'aopopo I ai ma polokalama fa'amalositino aua le fa'aititia ai o le tino puta, ae maise le aloe se ai mai nei gasegase ina ia fa'aititia ai le aofai o tagata e a'afia o latou fatuga’o.

MOLIA SE TAMA I LE FAIAIGA I LONA LAVA AFAFINE MONI

O le vaiaso nei na fa'aauauina ai le fa'amasinoga o se tama o lo o molia I moliaga e valu e aofia ai le faiaiga fa'amalosi, mataifale, o le faia o ni 'upu taufa'amata’u ma fa'ao'ogalima mataga I lona lava afafine moni. E le o mafai ona fa'ailoaina le igoa o lea tama ina ia puipuia ai le ua a'afia. Ae o se mata'upu lenei e le fou I luma o le fa'amasinoga maualuga, o le a'afia ai pea o alo tama'ita'i I sauaga mataga I totonu lava o o latou aiga e tu'uaia ai o latou lava tama moni. I fa'amaumauga a le f'aamasinoga I le mata'upu o lo o su'esu'eina nei na ta'ua ai e fa'apea, na faia e lea tama ia uiga mataga I lona afafine ao malaga I atunu'u I fafo le tina o le aiga.

O le 2008 na faiaiga fa'amalosi ai o ia I lona afafine a o momoe I le po, ma sa ia fa'amata’u ia te ia na te fasiotia o ia pe a iloa e se isi. O isi moliaga e lua na tula'i mai I le 2010 lea sa ia toe faiaiga fa'amalosi ai fo'i ia te ia toe fa'amata’u o ia. O le 2011 sa ia toe taumafai fo'i e fai ia lava soligatulafono mataga. Peita'i na ta’u loa e le teineitiiti I lona aiga ma sa fa'apea loa ona logo leoleo, ma sa taofia ai lava o ia. E tolu moliaga o lo o molia ai o ia, o le fa'ao'olima mataga, o le mataifale ma le faiaiga fa'amalosi. Na fautuaina e le ali'i fa'amasino ia fa'atonu e to'afa ina ia silasila toto’a I nei moliaga e valu ma ia fa'amaonia e aunoa ma se masalosaloga ma fai I ai la latou fa'ai'uga. Ua fa'atulaga nei le aso 20 o Fepuari e lauina ai le i'uga o lea tama. O le tama'ita'i loia o Rosela Viane Papali'i o lo o tula'i mo le ua molia, ao le ofisa o le loia sili o lo o tula'i mo le itu a leoleo.

KASIANO LEAUPEPE: E LE O LE LOTU UA MATITIVA AI, O LE LE LAVA O LE FA'ATUATUA

Ua tali mai le fono a ekalesia so'ofaatasi a Samoa I le mata'upu o lo o fa'asea ma tu'uaia ai e ni isi le lotu e fa'apea, o le mafua'aga o le matitiva o tagata ma fa'atino solitulafono e pei o le gaoi I totonu o fale faigaluega, ona o tupe o lo o foai I le lotu ma le tele o mea fai a ekalesia. Ua te'ena nei manatu e le sui ta'ita'ifono o le fono a ekalesia so'ofa'atasi, le susuga I le tiakono Katoliko ia Kasiano Leaupepe. O ia manatu na laga e sui o le fa'alapotopotoga o le 'au faipisinisi a le atunu'u ina ua tula'i mai le tele o solitulafono I totonu o fale faigaluega, o le gaoi.

O lea mata'upu na laga I totonu o le palemene e le afioga I le faipule ia Levaopolo Talatonu e fa'apea, o le mafua'aga tonu lea o le fa'aletonu o le fa'asoa a matua. Peita'i na saunoa le sui ta'ita'ifono o le fono a ekalesia so'ofa'atasi, o Samoa a ia o le atunu'u faitau Tusi Paia, ma o le Tusi Paia fo'i e fa'atonutonu ai olaga o ona tagata. E le o fa'atauanauina pe poloaia malosi e le lotu ona tagata lotu ina ia avatu ni tupe tetele. O le mea lena e fai I lou loto fuatia ifo. Fai mai le Tusi Paia, a leai ni au galuega, e gaogao lava lou fa'atuatua, Fai mai a ia, e ala ona gaoi le tagata, o le lava o le fa'atuatua, ma pa’u a lava o ia I fa'aososoga a le fili, e gaoi lava.

FAITIO MALOSI E TUILAEPA LE FAIGAMALO A FITI

Ua faitioina malosi e le palemia o Samoa, le susuga Tuilaepa Sailele Malielegaoi le faigamalo fa'avaitaimi a Fiti ma na ia fa'aalia, e le mafai ona taunu'u se faigapalota lautele I lea atunu'u I le 2014. Ua fa'amatalaina e Tuilaepa ia tautinoga a le faigamalo fa'amiliteri a Fiti e fa'apea e faia le faigapalota lautele I le isi lua tausaga o se miti I totonu o se paipa. Fai mai a ia, o ia tautinoga a le faigamalo e gaogao ma taufa'asese ma na ona fa'atupu ai o se fa'amoemoega le taunu'u I tagatanu'u o Fiti ma isi atunu'u o le lalolagi. Ua laga e ni isi o atunu'u popolega ona o le tofia o sui o le militeri e ta'ita'ia matagaluega a le malo, o se faiga ua fa'amatalaina e Tuilaepa e fa'apea, ua tofia ta'ita'i'au e leai ni tomai ma ni agava'a I galuega tau tautua lautele I tofiga maualuluga o matagaluega a le malo.

Na saunoa Tuilaepa, ua toeitiiti tula'i mai ni vevesiga I Fiti e pei o vevesi o lo o va'aia nei I atunu'u Arapi. Fai mai a ia, e le mafai ona taotaomia e se tasi tagata lautele aua e matautia atu le malosiaga o lo o I tagata lautele nai lo o fana. Na saunoa Tuilaepa, ana fa'apea e tupu I Samoa le tulaga o lo o tula'i mai nei I Fiti, e o'o atu I le 100,000 tagata o le a savavali I solo tete'e mai mauga, fa'atoaga ma itu uma o le atunu'u I magaala o Apia, e aofia ai tina matutua o le a savavali ma tau'ave fa'aauupega ni salu.