Ads by Google Ads by Google

TALA MAI SAMOA

LU’I E LE AU FAIFAATOAGA LE ALII PALEMIA

 

Ua tuuina atu e le au faifaatoaga o lo o faala, aipefu ma faatimu i Fugalei i le faatauina o fua o a latou faaeleeleaga, ia se feau mo le alii palemia, le susuga Tuilaepa Sailele Malielegaoi. “Se’e tasi i a matou seevae,” o le saunoaga lea a Malu Faalavai o Saleaumua.

 

 “E tatau ona e sau mo se aso se tasi e te nofo i le la ma le pefu, ona vaai lea pe mafai ona e faia ni lafoga faavalevalea e pei ona e faia soo.” O lafoga faavalevalea o lo o taua e le alii fai faatoaga na tali atu ai le alii palemia i se faatalatalanoaga ma se tusitala o le nusipepa o le Samoa Observer e uiga i faasea a le Itu Agai ona o le tuai o le fausia o le maketi i Fugalei. Na saunoa Tuilaepa, “Ua ou fai atu soo i lenei mataupu.

 

O nisi o ia tagata e mananao e faatau fua o a latou faaeleeleaga i le la. E oo lava i le taimi o i ai le maketi tuai i Fugalei, sa i ai lava tagata sa faatau fua o a latou faaeleeleaga i le la.” Na ia faaalia foi e faapea, o le faala e le o se mea leaga. “O le la e maua mai ai le vaitamini D3 lea na te aveesea le masima mai meaai ma tuu i ponaivi ina ia malolosi ai ponaivi,” o a Tuilaepa.

 

FAAMANINO MOLIAGA FAASAGA IA LEVAOPOLO

 

O moliaga faasaga i le alii faipule o le itumalo Gagaemauga Numera 2, le afioga Levaopolo Talatonu Vaai, o moliaga ua faaulu faasaga ia te ia e le Ofia o Tiute o le Matagaluega o Tupe Maua. I se pepa o faamatalaga mai le Loia Sili, le susuga Aumua Ming Leung Wai, na faamalamalama mai ai moliaga mai leoleo ma moiaga mai le Ofisa o Tiute. Na faaalia, o moliaga mai le Ofisa o Tiute e faavae i tuutuuga o le solitulafono i lalo o le Tulafono o Tiute 1977.

 

O tuuaiga o solitulafono e aofia ai I lalo o lea tulafono e pei o le auina faanana mai o oloa po o le faasese o pepa e faaulufale mai ai oloa, ma e iu i le faaulu o moliaga i lalo o lea tulafono. Ae o isi moliaga e faavae i tuutuuga o solitulafono i lalo o isi tulafono e pei o le Tulafono o Solitulafono, e faauluina ia moliaga e leoleo. Na faaalia ai foi e faapea, o moliaga e faaulu e le Ofisa o Tiute, e suesue e sui o le Ofisa o Tiute i totonu o taualumaga o le faamasinoga.

 

FASI LONA TAMA FAI I LE FAGU PIA MA LE AGAESE

 

E 34 tausaga o se taulealea mai Salani, Falealili o Esau Pu’apu’a, na tulai i luma o le Faamasinoga Faaitumalo e tali atu i le moliaga o le faaoolima i lona tama fai, e faaaogaina ai se fagu pia ma se agaese. Na saunoa le tamaitai faamasino o Mata Tuatagaloa, o nei amioga o ni amioga le talafeagai tele aemaise o lo o tulai mai i le va o le tama ma le atalii.

 

Na apoapoai le tamaitai faamasino i le o lo o molia ina ia iloa ava ma matau i lona tama, e ui e le o sona tama moni, ae o ia sa tausia o ia mai lona laititi. Na tulai le tama lea na aafia lona ao i lenei feeseeseaiga ma talosaga i le Faamasinoga Faaitumalo ina ia toe faaui i tua lana tagi ona ua ia faamagalo i lona atalii e ui i le tiga o le mea ua ia faia ia te ia. Ua faapafala ai nei la se faaiuga a le Faamasinoga i lenei mataupu peitai, e ono masina ua tuuina atu i le alii o Esau Pu’apu’a e mataitu ai lana amio pe toe tulai mai uiga le mafaufau sa ia faaalia i lona tama fai.

 

FAAAUAU POLOKALAMA  ATILI FAALELEIA O LE AOAOINA FANAU

 

O le auina atu o le fesoasoani ma le lagolago mo faiaoga, o nisi ia o polokalama faaauau a le Matagaluega o Aoga, Taaloga ma Aganuu. Na faaalia e sui sooupu a le matagaluega, o le faamoemoe ia lelei le aoaoina o taiala fou ua fausia e faaauau ai pea le aoaoina o mataupu faatulagaina mo aoga tulaga lua, na faatinoina ai ni fonotaga mo ulu aoga, e pei ona faaauauina ai i le motu tele i Salafai i le vaiaso ua tuanai i le faletalimalo o le Rosalote i Sapapalii, ao le Kolisi o Leififi mo Upolu nei.

 

Ua faaalia e le matagaluega, o loo ai pea le faamoemoe e faagasolo asiasiga ma fonotaga faapenei i le lumanai, ina ia fesoasoani pea i le aufaigaluega aua alo ma fanau o le atunuu. Ua talisapaia e ulu aoga le faanaunauga ina ia avea foi i latou ma taitai e faasoa ma toe tufa atu i susuga i faiaoga aua fuafuaga mo le siitia ai o tulaga o le aoaoina o alo ma fanau o le atunuu.

 

Saunia: Lilomaiava Andrew Fa’asau, Naenae Productions