FAAMANATU LE 34 TAUSAGA O LE HRPP

O le Aso Tofi na sei mavae atu nei na atoa i ai le 34 tausaga talu ona faavaeina le Vaega Faaupufai e Puipuia Aia Tatau a Tagata (Human Rights Protection Party HRPP), lea o lo o taitaia le faigamalo i le taimi nei.

O se faatasiga tele na faataunuuina i le nofoaga tutotonu o le HRPP i Mulinuu ma sa amatalia le sauniga i le minute o le fifilemu e manatua ai se tasi o sui o le faafaletui ua loa tausaga o lana tautua ma sa avea foi o ia ma minisita o le kapeneta i tausaga ua tuanai, le afioga Taua Tavaga Kitiona Seuala, lea ua faiilagi le folauga.

O le taitai o le HRPP, le afioga i le alii palemia ia Tuilaepa Lupesoliai Dr. Sailele Malielegaoi na ia momoli le faafetai i le atunuu ona o la latou lagolago, aemaise o lo latou faatuatuaina pea o le faafaletui e taitaia le faigamalo mo le 31 ai lenei o tausaga.

FILIFILIA SUI O LE KOMITI FAAFOE O LE SASNOC

Ua maea nei le faiga filfiliga a le faalapotopotoga o taaloga a le atunuu, le SASNOC i sui o le laulauafono a taitaia le faalapotopotoga mo le isi fa tausaga, i le latou fonotaga faaletausaga lea sa usuia i le po o le aso Tofi na tea nei.

Ua filifilia nei le alii loia o Fepuleai Patrick Fepuleai i le tofi peresetene e sui tulaga ia Nu’u Tapasu Leung Wai lea ua filifilia i le tofi failautusi aoao. O le filifilia o Nu’u Tapasu Leung Wai i le tofi failautusi aoao, ua sui tulaga ai i le afioga Aveau Lepale Niko Palamo, o se tasi ua loa tausaga o lana tautua i le itu tau taaloga.

Na taofia e le Faamasinoga Maualuga le usuia o le fonotaga faaletausaga a le SASNOC ona e lei atoa le lua vaiaso na logo ai sui o le faalapotopotoga. O isi tofiga taua na filifilia ua aofia ai le afioga Togatalima Faafouina Milford mai le faalapotopotoga o fusuaga, atoa ai ma le afioga Lefau Harry Schuster e avea ma sui peresetene. O le susuga Tala Pauga Tala ua filifilia e avea ma teutupe.

FAAFETAIA E LE TOOMAGA MO E PUAPUAGATIA TEUTEUGA O LE TULAFONO

Ua matua faafetaia e le peresetene o le faalapotopotoga o le Toomaga Mo E Puapuagatia, le tamaitai o Lina Chang, le pasia aloaia ai o teuteuga i le tulafono e faaopopo ai faasalaga i soligatulafono tau feusuaiga e pei o le mataifale ma le faiaiga faamalosi. Mo se faataitaiga, afai e faamaonia se tasi i le moliaga o le faiaiga faamalosi, o le faasalaga mamafa lea ua tuuina atu nei i ai i lalo o lea tulafono fou, e solo atoa i le toese i Tafaigata.

E talitonu le tamaitai peresetene, o se tulaga maualuga lea o le faatauaina pea e le malo o lo latou faalapotopotoga ma a latou taumafaiga ina ia tafi esea ia faiga ma sauaga mataga faasaga i alo ma fanau faapea tina ma tamaitai i totonu o aiga. Fai mai a ia, o le pasia ai o lenei tulafono e le taumate o le a fesoasoani tele i a latou galuega i le faalauteleina o fesoasoani i alo ma fanau ua le malu i o latou aiga ona o ia sauaga mataga.

O lo o lalo nei o le vaavaaiga malu a le Toomaga ia nisi o alo ma fanau ua aafia i sauaga tau feusuaiga i totonu o o latou aiga.

FAATAUINA ATU NISI O FANUA O MAGIAGI I NISI MAI MOATAA

O lo o teena malosi e le pulenuu o le afioaga o Magiagi, le susuga Tuiono Uini Letoafa Keni nisi o lipoti ma tala aave e faapea, ua tuuina atu le latou mataupu tau fanua i le Faamasinoga o Fanua ma Suafa, mo nisi o o latou fanua lea ua maua faamatalaga e faapea ua maea ona faatauina atu  i nisi mai le afioaga o Moataa.

Na saunoa manino le alii pulenuu, o lea mataupu e le fou ia i latou ma ua leva foi ona nofouta i ai le pulega a alii ma faipule o Magiagi. Ae peitai, e leai se latou tagi ua tuuina atu i luma o le Faamasinoga o Fanua ma Suafa faasaga lava i lenei mataupu. Peitai na ia faaalia, ua nao faamaumauga mai nisi o faamasinoga o fanua ma suafa ua tuanai lea na latou maua ai, na faatauina nisi o fanua i le va o le tausaga e 1921 ma le 1929.

Fai mai a ia, o lo o i ai le fuafuaga a le latou afioaga e logo muamua afioga i Sa’o Alii ia Asi ma Patu i lenei mataupu. Ae o le taimi nei, e leai se tulaga nanati e tuuina atu lea mataupu pe faatalatalanoaina foi. Ae i ai se taimi e feiloai ai le afioaga pe afai e moomia ona faia se feiloaiga.

Na fesiligia foi le pule sili o le Matagaluega o Faamasinoga, le afioga Masinalupe Tusipa Masinalupe e uiga i lenei mataupu, ae na ia faaalia, e lei oo atu lava se mataupu faapea i lo latou matagaluega.

FAALEAOGAINA LIPOTI E FAAPEA UA PEPESI LE FIVA TAIFOI

Ua faaleaogaina e le Matagaluega o le Soifua Maloloina ia lipoti e faapea ua toe aafia foi le atunuu i le faamai o le Fiva Taifoi lea e mafua mai i siama mai fale le taua.

Na faaalia e le alii fomai, le afioga Leausa Toleafoa Dr. Take Naseri e faapea, ua leva ona i ai lenei faamai ma o lo o fautuaina pea le atunuu ina ia amanaia lapataiga mai le matagaluega e faataua e pei o le fufulu mama o lima pe a maea se galuega po o le faaoga o le fale le taua, faapea le faamama o nofoaga o lo o i ai maota ma laoa ina ia faaititia ai lenei faamai.

O lo o faaauau pea asiasiga faaitumalo o lo o galulue faatasi ai ma Komiti Tu Mama i nuu ma afioaga e faamalosia le soifua i se soifuaga mama o tagata uma. O auga o lea faamai e aofia ai le five maualuga, manava tata, tiga o le ulu ma isi, ma e moomia lava le vave fesootai atu i se fomai mo se fesoasoani. Ua fautuaina foi matua ina ia tagatagai totoa i le fanauiti. Na faamautu foi e le alii fomai le leai o se fesootaiga o se maliu i le vaiaso na tea nei ma lea faamai e pei ona lipotia.

Saunia: Lilomaiava Andrew Fa’asau, Naenae Productions