Ads by Google Ads by Google

TALA MAI SAMOA

POLOAIA FAAMASINOGA TAOFIA FONOTAGA FAALETAUSAGA A LE SASNOC

 

Ua tuuina atu e le Faamasinoga Maualuga se poloaiga e taofia ai le fonotaga faaletausaga a le faalapotopotoga o taaloga a Samoa ma le komiti o le olemipeka (SASNOC) lea sa fuafua e faataunuuina i le po o le aso Faraile na sei mavae atu nei. O Faamasino Lesatele Rapi Vaai sa faatautaia lenei mataupu i le va o le itu tagi lea e aofia ai Patrick Fepuleai ma Talasa Atoa ma le itu tetee lea e aofia le peresetene o le SASNOC, le susuga Nu’u Tapasu Leung Wai ma le failautusi aoao, le susuga Lepale Niko Palamo.

 

O le talosaga e taofia ai le faataunuuina o le fonotaga faaletausaga a le SASNOC mai le usuia, na faauluina e Atoa ma Fepuleai ona e lei lava le taimi sa logoina ai sui o le faalapotopotoga. Na faaalia, na o le tasi le vaiaso na faalauiloa ai lea fonotaga ma o le fonotaga foi lea na tuu e filifilia ai ma sui o le komiti faafoe, lea e ta’i fa tausaga e seei ai, faapea isi mataupu. Peitai ina ua tuuina atu sui faatu a nisi o faalapotopotoga, na logoina i latou ua tuai ona sa tatau ona tuuina atu ia suafa o sui faatu i le lua vaiaso ae lei faia le fonotaga.

 

TALANOA I LE PALEMENE LE FAATAU ATU AANO TA’IFAU

 

Ua talosagaina e se minisita lagolago le malo ina ia tagai i le ono faatauina atu i fafo o le aano o taifau e fai ma auala e tau foia ai le faafitauli o taifau faalafua o lo o vaaia pea i le tele o nofoaga faitele. Na faatuina lea mataupu e le faipule o le itumalo Aana Alofi Numera Muamua, le afioga Toleafoa Apulu Faafisi i tauaofiaga a le palemene i le aso Tofi o le vaiaso nei, ao faagasolo felafolafoaiga a sui o le maota i le Tulafono mo le Faatonutonuina o Taifau 2013, lea afai e pasia e moomia ai le laiseneina uma o taifau i totonu o le atunuu.

 

O le a mafai ai foi ona molia i latou e ana taifau e le laiseneina. Sa lagolagoina e le toatele o faipule lea manatu a Toleafoa ma sa ia faatuina foi le faia o ni miliga taifau mo petipetiga e pei lava o tuuga solofanua. Na saunoa le faipule o le itumalo Gagaemauga No. 2, le afioga Levaopolo Talatonu ma ia faaalia lona lagolagoina o ia manatu ae na ia faaalia, e tatau ona tofo muamua e sui o le HRPP le aano o taifau.

 

Na saunoa le taitai o le Itu Agai, le afioga Palusalue Faapo II ma ia faaalia, na o le pau le mea e tatau ona faia o le faalalo o ia taifau ona o lo o lamatia ai e le gata o tagata lautele aemaise tagata tafafao maimoa mai fafo.

 

FAIA FAAIUGA FAAMASINOGA SAILIGA PULE I VAIE’E

 

Ua poloaia e le Faamasinoga ia itu e lua o le afioaga o Vaie’e, Safata ina ia faia se faaleleiga. O lea faaiuga na fofogaina e le sui peresetene o le Faamasinoga o Fanua ma Suafa, le afioga Faamausili T. Solo Brown i le aso Faraile na sei mavae atu nei. E pei ona lipotia muamua i a tatou tala, o lenei mataupu e mafua i se feeseeseaiga i le va o le alii sa avea muamua ma sui o le palemene, le afioga Tuia Paepae Letoa ma nisi o matai o le afioaga, ma le alii sa avea ma pule ma suetusi sili a le malo, le afioga Te’o Su’a Rimoni Ah Chong faapea nisi o matai o le afioaga.

 

Na faaalia e le Faamasinoga, na mananao uma ia itu e pule toatasi I le afioaga. Na muamua ona talosaga le itu a Te’o ina ia amanaia le latou itu e pulea le afioaga ma ia faataape le faiganuu a Tuia ma nisi o matai. Ona talosaga foi lea o Tuia i le Faamasinoga ina ia amanaia le latou itu e pulea le afioaga. Na te’ena e le Faamasinoga talosaga a itu e lua.

 

TEENA MALOSI E TUILAEPA FAAIPOIPOGA A ITUAIGA E TASI

 

E mausali le finagalo o le alii p[alemia, le susuga Tuilaepa Lupesoliai Sailele Malielelgaoi i le mataupu e faatatau i le faaipoipo o ituaiga tagata e tasi, po o le faaipoipo o le tane ma le tane faapea le tamaitai ma le tamaitai, e pei ona ua faatagaina nei i nisi o atunuu o le lalolagi.

 

“O lou manatu faataitai o Samoa i lea mataupu e faigofie lava, e matua leai ma se auala, augapiu ma se auala, e iloiloina ai lea mataupu i Samoa. E matua le iloiloina e le palemene a Samoa se ituaiga pili faapea, ao ou ola.”

 

O mafuaaga o le tetee malosi o le alii palemia i lea mataupu e faavae i talitonuga faakerisiano. “O le manatu malosi lea a le malo Samoa ma ekalesia eseese i totonu o le atunuu,” o a Tuilaepa. “Matou te tutu faatasi i le tetee atu i ia ituaiga faiga ona e faavae i le Atua Samoa.”

 

Na ia faaopopo, e tetee talitonuga faakerisiano i ia ituaiga amioga lea e taua i le Tusi Paia, o le mafuaaga na malaia ma susunuina ai Sotoma ma Komora. “O le mea lea na maua mai ai le faaupuga o le faasotoma,” o a Tuilaepa lea. “O le faaipoipo o tagata o le ituaiga e tasi o le agasala, ma o le a lava le ituaiga afifi e afifi ai lea ituaiga amioga, o le agasala lava. E inoino i ai le Atua.”

 

Saunia: Lilomaiava Andrew Fa’asau, Naenae Productions